Hamburg

D’Hansestadt Hamburg (uf platt Hamborg, gsproche wie Hamborch) isch mit fascht 2 Mio Iwohner d zweitgröaschti Stadt in Dütschland und au a eignes Bundesland. Hamburg isch, wiils au an Hafa hätt, die virtriichscht Stadt fu Europa. S Wahrzeiche vun Hamburg isch de Michel ("St. Michaelis") ibberm Haffe mit sinner Turmspitz uff Säule, wo mer durre luege kaa. De Michel isch vun de Bauwerk vu Hamburg für d Sonderprägung vun de Zwei-Euro-Münz usm Johr 2008 usgwählt worre. Bekannt isch Hamburg durch sin Fischmarkt und em Viertel St. Pauli, wo sich au de Hamburger Berg befinded.

[ändere] D Wirtschaft

Binnenalster

Jungfernstieg, ca. 1895

Hamburg isch durch sin Haffe, sin Flughaffe, sinne Bahnhöf und sinne Aanbindung aan d Autobahne a großes Wirtschaftsbiet. D wichtigschte Wirtschaftszwiig sind d Konsumgüterindustri, d Luftfahrtindustri (de drittgröschte Standort in de Welt), d Logischtik, Chemi, Elektrotechnik, Maschine- und Schiffbau, Mineralölwirtschaft, Banke un Medie.

Im Johr 2007 sind nach ener Übbersicht, wo jeds Johresend vun dr Zitung "Hamburger Abendblatt" usgäbbe wird d fünf gröschte Firme (gmesse aan dr Zahl vu de Bschäftigte): d Airbus Deutschland GmbH usem Flugzeugbau, d Deutsche Lufthansa AG mitem Luftverkehr und de Wartung vun Flugzeug, d Asklepios Kliniken Hamburg GmbH mit de privatisierte Krankehüüser, d Deutsche Bahn AG mit Persone- und Gütertransport und Logischtik, s Universitätsklinikum Hamburg-Eppendorf als e Krankehuus und au für d Wisseschaft.

HADAG-Fähre uff der Elb

Containerterminal im Hafe Hamburg.

[ändere] D Mediewirtschaft

Hamburg isch d Mediehauptstadt vu Ditschland. In de umtriebige Mediebranche und bi de IT-Entwickler vu Hamburg sin um die 110000 Persone beschäftigt. Altbekannti Unternehme sind d Verlage Axel Springer, Gruner + Jahr, Heinrich Bauer, Ganske, Spiegel un Zeit. Do dezu kummet de Norddeutsche Rundfunk, s Studio Hamburg, wo Film gmacht werret, und d dpa Tochter news aktuell.

Au in de Werbebranche, de Fotografi und de Musikinduschtri hot Hamburg en wichtige Platz.

A bsundre, schnell wachsendi Branche isch d Spiilinduschtri. So um die 150 Spieler-Agenture mit 1700 Bschäftigte entwicklet Computerspiil für d junge und alte Lit.

[ändere] De Tourismus

Rund 4,7 Millione Übernachtunge werret im Johr z Hamburg zählt. Im Fremdeverkehr schaffet 140000 Lit. D Bsuecher kummet vor allem us England, us de Schwiiz mit (147000 Übernachtunge), us Russland und us de arabische Länder.

Dezu bsuechet Hamburg im Johr so 111 Millione Tagesgäscht wege de Messe, Uusstellunge, Veranstaltunge, Tagunge, Kongress und it zletscht um eppes bsundres iiz'kaufe. Am Cruise Terminal kummet witere Tagesgäscht mit Krüüzfahrtschiff aa. Det leggt mindeschtens eimol im Johr d Queen Mary 2 aan.

[ändere] Dr Haffe

Durch d Erwiiterung vun de EU nach em Oschte hot grad de Containerverkehr ibber de Haffe en große Ufschwung gnumme. De Haffe wächst stark. Drum wird de Uusbau vum Haffe und es Uusbaggere vun de Elb virschi triebe. D Bschäftigti im Hafe hond jetzt de Stand vun 160000 Personne erriicht. Knapp 10 Millione Standardcontainer sind ibber Hamburg gange. Gröschti Partner im Containerhandel sind China, andri asiatischi Länder, Russland, Pole, Finnland und Schwede. De Containerumschlag wächst im Johr so um die 10%. D Konkurrenzhäffe z Nordeuropa sind Rotterdam, Bremerhaven und Antwerpen.

Dr Usbau vum Containerhaffe uf 18 Millione Standardcontainer mit ere ständige Modernisierung isch bis zum Johr 2015/16 vorgesähe.

[ändere] D Logistik

D Logischtikunternehme wie de Speditione, d Haffebetrieb, d Schifffahrt und d Kurierdienschtleischter planet de Umschlag, d Lagerung und de Transport und hond en Vorteil vun de Globalisierung. Es gitt z Hamburg 1400 Logischtikbetrieb mit um die 230000 Beschäftigti im Iizugsgebiet vu Hamburg. Z Hamburg gitts mehreri Studiegäng an de TUHH, Universität Hamburg und d Hamburg School of Logistics, wo mer es Werkzig fir d Praxis lärne kaa.

Hamburg hott fir d asiatische Länder de Vorteil vun ener guete Usgangs-Lag zu de Verbruucher und Inveschtore vu Mittel- und Oschteuropa. In und um Hamburg gitts ibber 100 japanische Unternehme mit so 7000 Bschäftigte. So isch Hamburg nach Düsseldorf de zweitwichtigste Standort z Ditschland.

[ändere] D Luftfahrtinduschtri

Hamburg hot e bsundre Stellung in de Luftfahrtinduschtrii bim Flugzeugbau mit em Airbus-Werk z Finkenwerder, bi de Wartung und Instandhaltung vu Flugzeug mit de Lufthansa Technik, mit em Flughaffe selber und bi de Spezialkenntnis vu de 300 klonere Zulieferbetrieb für d Luftfahrtinduschtri. Die hond au bsunderi Lösunge fir d Kabinegestaltung ("Kompetenzzentrum Kabine") breit.

[ändere] Iikaufe z Hamburg

Die Geschäft fir de Massekonsum ligget in de Spitaler Stroß und in de Mönckebergstroß. E bsunders Wareaagebot findet mer in de Stroß "Neuer Wall". Wege em nasse Wetter z Hamburg gitts e Netz vu Iikaufspassage. Die erstrecket sich vu der Shoppingpassag bim Mönckebergbrunne bis zur Gänsemarktpassage am Gänsemarkt.

[ändere] Verkehr

Hamburg hot de Flughafe Fuhlsbüttel und isch so au mit de alemannische Schwiiz (Züri und Basel), mit em alemanische Ditschland (Friedrichshafe, Memminge, Karlsrue/Baden-Baden, Mannheim, Schduagert) und mit em Vorarlberg und em alemannische Liechtesta ibber Innsbruck direkt verbunde. Alli Tag startet und landet, wenn vil los ischt, bis zu 460 Flugzeug. So um die 12 Millione Fluggäscht im Johr kommet det durre. Es gitt dett 65 Fluggsellschafte und die flieget direkt 120 Städte aa. Im Johr 2009 goht a neue S-Bahn-Linie direkt vum Flughafe zum Hauptbahnhof. Immer meh Däne us Jütland orientieret sich uff de Flughaffe Hamburg und itt uff de Flughaffe vu Kopenhagen.

Denn krüüzet dett au en paar Autobahne d Elbe. Onne durche Elbtunnel, des isch die A 7 vun Lindau (österriichischi Grenz) uf Flensburg (dänische Grenz). Die andere isch die A 1 von Saarbrücke (französischi Grenz) uf Oldeburg z Holschtein. Und onne, di goht als A 255 vun de A 1 direkt zude Elbbrücke und als a breiti Stroß in d Innestadt.

Hamburg hot vir Bahnhöf: Harburg, Hauptbahnhof, Dammtor und Altona. Fürs Centrum nehmet er am beschte de Hauptbahnhof.

Es gibt nebbe dem Hauptbahhof au en Busbahnhof, wo bsunders nach em Oschte Langschtreckeverbindunge hot.

Am Haffe kommet hüt meischt Containerschiff und in letschter Zit immer mehr Krüüzfahrtschiff. Die Infahrte könnet er au in Wedel am "Willkommt Höft" aluege.

A kurzi Verbindung in de Haffe nach der Elbinsel Steinwerder isch von de Landungsbrücke durch de Alte Elbtunnel usem Johr 1911. D Autos müsset mitem Fahrstuel uff es Niveau unter der Elbe bracht werre. D Fueßgänger könnet uff enere Stäggi oder mit ener Rolltrepp abe fahre. Dett unte gitts nur onne Fahrspur und zwei Birgersteig für d Fueßgänger. D Röhre isch kunschtvoll in wiiß kachlet. Im Monat bnutzet so um die 20000 Autos und um die 100000 Fueßgänger de Alte Elbtunnel.

Kreuzfahrtschiff Freedom of the Seas an de Landungsbrugg im April 2006

Bsonders isch Hamburg natürlich für sin öffentliche Verkehrsverbund bekannt. De umfasst U-Bahne, Busse, S-Bahne, en paar vun de Hafefähre und goht au in de sogehossene Hamburger Speckgürtel, des sind die Gmeinde für d´ Häuslebauer z Niidersachse und Schleswig-Holschtein.

Denn gibts au guete Fahrradweg. Die sind an der Stroßesiit vun de Trottoir und rot pflaschtert, domit d Fueßgänger und d Autofahrer uffpasset.

Für d Fueßgänger sind etzet im Zentrum kleine Wegweiser-Täfele ogbracht worre. So ka mer zue de wichtigschte Ziil in dr Inneschtadt kumme, ohni z frage und ohni in de Schtadtplan zu luege.

Zwei größere Wanderweg passieret durch Hamburg: de europäische Fernwanderweg vu Nord nach Süd und usserdem en Zuebringer zum Jakobsweg uff Santiago de Compostela, wo Via Baltica hosst und vu Usedom uff Osnabrück füert.

[ändere] Politik

[ändere] S Roothuus

S Hamburger Roothuus, 53° 33' 01" N, 9° 59' 34" O

S Roothuus isch 55 Johr nach em große Brand vun 1842 in de Johre 1886-1897 wider uffbaut und bezoge worre. Es stoht uf 4000 Pfähl und hot 647 Rüüm. Es isch mit der Börse und Handelskammer durch en Innehof verbunde. Im Innehof stoht de Hygieia-Brunne und erinnert aan d Cholera-Epidemi vun 1892. Im Roothuus schaffet de Senat und d Bürgerschaft und haltet dett ihre Sitzunge ab. D Tourischte könnet s Roothuus bsichtige und intressierti Birger könnet de Birgerschaftssitzunge zuhöre (Karte bim Ratsdiener bsorge). A Bsunderheit isch, dass Staatbsuech ällwell erscht d Roothuustrepp nuufschnaufe misset, wiil de Erschte Birgermeischter se dett obbe im stehe empfängt.

Als e dynamische Weltstadt hot Hamburg fir sinne neui Birger en "Welcome Center z Hamburg und Informatione fir qualifizierte Fachkräft kriege.

[ändere] D Wahle

D Bürgerschaft tagt im Rothuus. Die wird alle vir Johr vun de Bürger gwählt. Ab 2008 gitts etzet onne Stimm für d Landeslischte vun de Birgerschaft und 5 Stimme für d Wahlkreislischt vun de Bürgerschaft. So kaa mer Kandidate us sinnem Wahlkreis in d Bürgerschaft bringe durch panaschiere und kumuliere.

Nach de Wahl wählt denno d Birgerschaft de Erschte Bürgermeister. Der Erschte Bürgermeischter bstimmt (oder entlässt) d Senatore. Des goht aber numme, wenn d Bürgerschaft iiverschtande isch.

D Birgerschaft erloot Gsetz, bstimmt übber de Huushalt und kontrolliert de Senat.

Uff de regionale Ebene gitts no d Bezirksversammlunge, wo au gwählt werre. Aber d Birgerschaft und de Senat könnet Bezirks-Theme aan sich ziehe und allei entscheide.

[ändere] Stadtplanung

Durch d regelmäßige Kataschtrophe, wo Hamburg heimgsuecht hond, wie de Große Brand, d Bombardierung un d Fluet isch immer wieder d Substanz zerstört worre. Bi der Glegeheit hond se au glei vollkomme neu baut. D Spitzhack hot also au vill zerstört. Es gitt numme in Spure no mittelalterliche Baute, bispiilswiis d Krameramtswohnunge bim Michel.

Im Anfang vum 20. Johrhundert hot de Oberbaudirektor Fritz Schumacher Hamburg intressante Gebäude us Backstein im Heimatstil errichte losse: s Hamburg Museum, d Oberfinanzdirektion, d Hoschschuel fir bildende Künscht, d Jarreestadt.

In de 1970er Johr isch die City Nord baut worre. Dett sind vill Parkgarage und vill Bürohäuser uff em friehere Kleingartegeländ bim Stadtpark baut worre. Mer hot die Büros usem Stadtzentrum umgesiedelt und moderner gstaltet.

E neus Bauprojekt isch d HafenCity. Bis 2020 werret dett fir 12000 Mensche Wohnunge und fir 40000 Büroarbeitsplätz baut. Dodurch wird denn d Innestadt um 40 % in de Haffe erwiitert. Scho etzet sind mangi Fläche zsammehängend bbaut und bewohnt. D erschte Abschnitt im Weschte um de Sandtorkai, de Dalmannkai sind scho zum Teil bewohnt.

De Elbphilharmonie (im Bau bis 2011) soll denn umfasse drei Konzertsäl, a Plaza zum Promeniere, Wohnunge, en Hotel und en Parkhus.

In dr Mitti am Sandtorpark und am Überseequartier wird im Johr 2008 grad baut.

De öschtliche Teil bim Magdeburger Hafen soll bis 2011 gestaltet werre.

[ändere] Wisseschafte und Hochschuele

[ändere] Bibliotheke

D große Inschtitutione z Hamburg hond Bibliotheke mit bsunderi Schwerpunkt, wo vo de Öffentlichkeit bnutzt werre könne. D Staats- und Universitätsbibliothek hot Biecher us alle Fachgebiet, aber au ibber Indianer- und Eskimosproche, Fischerei aan de Küste und uff Hochsee. D Universitätsbibliothek vu de Technische Universität Hamburg-Harburg hot als onnen vu mehreri Schwerpunkt de Schiffbau und d Logistik. D Stiftung Centralbibliothek für Blinde hot Hörbüecher uff CD, Kassette und in Blindeschrift und verleiht se per Blindeposcht aan Blinde. D Deutsche Zentralbibliothek für Wirtschaftswissenschaften isch d gröschte Bibliothek für Wirtschaft vu de Welt. D Hochschule für Angewandte Wissenschaften hot unter ihre Fachbibliotheke au welle fir Mode und Pflege.

[ändere] Hochschuele

Z Hamburg gitts 16 Hochschuele, wo vum Land, vo Private, vum Verteidigungsminischterium, vu de Hamburger Verwaltung ud vu de evangelische Kirch unterhalte werret. Dett studieret 70000 Studente und vu denne sind widder 9000 usm Usland.

[ändere] Kultur

[ändere] Musik

D Hamburger Symphoniker spielet in de Laeiszhalle und bi de Hamburger Roothuskonzerte und sind international beriehmt.

[ändere] Kunschtwerk und Monumente

Vum schwiizer (alemannische?) Künschtler Bernhard Luginbühl vu Bern und etzet us Mötschwil gitts zwei Plaschtike z Hamburg. Am Haffe, uff de Promenade zum Schutz geges Hochwasser "Johannisbollwerk", des isch gegenibber vun de Schwedische Kirch für d Seelüt, isch onn Kunschtwerk us Iiseschrott mittere Bezeichnung Hafentorfigur aazluege. Die sieht us wie a Libelle, isch 25 t schwer und 1981/1982 usm Ruderschaft vunnem nie z Wasser glossene Riesetanker entschtande. A wiitere abschtrakte platte Figur us Iise stoht uffm Platz vor de "Hamburger Kunsthalle" und hosst Kleiner Zyklop vu 1967.

Störtebeker-Denkmal vu Hansjörg Wagner in Hamburg

In der Näh vum neue Cruise Terminal und de Marco Polo Terrasse, uff de Mittelinsel vu de Schtroß "Großer Grasbrook", schtoht e Denkmal us Bronze vu 1982 vum Hansjörg Wagner, dees aan de Seeräuber Störtebeker erinneret. Uffm Sockel schtoht geschribbe "Claas Störtebeker, Godeke Michels, 1401, Gottes Freund, der Welt Feind." Der isch dargschtellt wie en ufrechte Maa, aber mit gfesselte Händ. Des isch der, so wird s gesagt, nachdem er köpft worre isch, ohne Kopf so wiit wie s möglich gsi isch, aan sine uffgschtellte Kumpane vorbei gwankt, um so vill wie möglich zu rette. Selle letschte Bitt hond ihm d Ratsherre itt abgeschlage und denn erfüllt.

[ändere] Bsondere Musee

Des Museum BallinStadt, Auswandererwelt Hamburg liggt am Veddeler Bogen, bstoht us drei flache Doppelhalle, wo 2006/2007 nach alte Plän widder uffbaut worre sind zur Erinnerung aan die rund 5 Millione Mensche, wo zwische 1850 und 1934 über Hamburg usgwandert sind. D Uuswanderer sind d Lüt, wo im 19. und 20. Johrhundert über de Hamburger Haffe, über Bremerhaffe, Rotterdam und andere Häffe nach de Vereinigte Schtaate, nach Kanada und nach de südamerikanische Schtaate usgwandert sind. Im Uswanderermuseum kaa me in de Halle 1 koschtelos in Datebanke nach sinne usgwanderte Vorfahre sueche. Für d Halle 2 und 3 mueß mer Iitritt zahle. Es wird mit Bildle, Dokument und teilwis mit nachgeschprochene Bericht und em Rundgang in de Halle 2 zeigt, wie d Lüt, wo arm gsi sin oder verfolgt worre sind, sich hond erscht durch die ville Grenzübergäng domols in Europa durchwurschtele müesse, wie se auf Gsundheit und gnüegend Geldvorrät prüft worre sind, wie se übers Meer hond fahre müesse und denno z New York oder woanders villicht sogar wieder zruckgschickt worre sind. Und selbscht im Iiwandererland hond se no betroge werre könne. In Halle 3 isch en Schlofsaal vun de Ballinschtadt in Hamburg nochempfunde worre. Zue dem Museum kaa mer mit de S 3, Station Veddel fahre oder wemmers romantischer maag mittener Barkasse vun de St. Pauli Landungsbrugge, Brugg 10. Dees isch die "Maritime-Circle-Line", wo vun de Landungsbrugg uff de Norderelbe zum Uuswanderermuseeum und uff Umwege widder zruck fahrt. D Barkasse brucht zsamme 95 Minute bis se widder aan de Ausgangspunkt kummt. Zrick kaa mer a paar mol unterbreche und s Haffemuseeum, d HafenCity mit de Musee vun dr Speicherstadt und am Schluss s Museeumsschiff Cap San Diego aaluege.

S Internationale Maritime Museum im umbaute historische Kaispeicher B mit zehn Bödde (Stockwerk) zwische Magdeburger Haffe und Brooktorhaffe wird am 26. Juni 2008 uffgemacht. Uff fascht 16000 Quadratmeter Usstellungsfläch kaa mer us 3000 Johr Schifffahrts- und Marinegeschichte Berichte vu Zeitzeuge, Dokumente, Gmälde, Bildle, Fotos und Modelle vu Schiffe (au us Elfebei, Silber und Gold), Globe, Biecher und Bauplän vu Schiffe aaluege. D Usstellungsstück hott de Privatsammler Peter Tamm stiftet. Es isch it wie andre Schifffahrtsmusee national, sundern uff d ganze Menschheitsgschichte ussegerichtet. D Theme sind Entdeckungsfahrte, Navigation, Kommunikation, Schiffbau, Segelschiff, Seeschlachte, Handel und Tiefsee. Nebbebei kaa mer so au sellen alte Speicher aaluege und en Iidruck kriege, wie es im Hamburger Haffe frieher zuegange isch.

S Haffemuseum (no im Uffbau) isch in dr Näh vum Stadtteil Veddel im historische Kaischuppe 50 A und wird vu de Circle Line aagefahre. S wird de Hamburger Schiffbau und d Schiffahrt uff de Elbe zeigt. Es isch us de Zeit vor de Container, wo no Stückguet gelagert und umschlagge worre isch. Mer kaa innener große Halle Usstellungsstück aluege oder am Kai Museumsschiff bsueche.

S Deutsche Zollmuseum im alte Zollamt an de Kornhausbrugg zeigt d Geschicht vum Zoll mit Uniforme, Schmuggelversteck und Tiere, wo it importiert werre dirfe, weil se geschützt sind. Vor em Museum im alte Zollkanal liggt no en Zollschiff.

S Miniatur Wunderland am Kehrwieder in de Speicherstadt isch d gröschte Modelleisebahn vun de Welt. D Züg rollet uff ener Fläch vun 4000 Quadratmeter mit ener Kulisse us Landschafte vun Ditschland, de Schwiiz, USA und Skandinavie. D ganze Aanlag mit 830 Züg, ibber 10000 Wagge und 200000 Figürle isch scho oft im Fensehe zeigt worre. Alle Viertelstund wird Bleuchtung vun de Aanlag vum Taggeslicht uff d Nachtbleuchtung umgstellt.

D Speicherstadt Kaffeerösterei am Kehrwieder in de Speicherstadt isch a Röschterei, wo innem 250 Quadratmeter große frühere Lagerruum mit Bohle us Eicheholz d Kaffeesäck us de ganze Welt rum ligget, de Kaffee no mit alte Maschine gröschtet wird und wo mer im selbe Raum aan Tisch a Tässle Kaffee vun de Kaffeesorte Arabica oder Robusta usprobiere kaa. Do kaa mer ungfähr 20 Sorte us unterschiedliche Länder kaufe.

S Museumsschiff Rickmer Rickmers aan de Landungsbrück isch en drei-mastigs Seggelschiff us Stahl, 97 m lang und vu 1896, wo zerscht Güeter bfördert hot. Denn isches e portugiesisches Seggelschulschiff worre und zletscht im Johr 1983 na Hamburg kumme, wo mers etzt bsichtige kaa. Am Bug bfindet sich a gschnitzte Gallionsfigur.

S Museumsschiff Cap San Diego isch es gröschte Museums-Frachtschiff, wo bei Bdarf no fahre kaa. Gwöhnlich liggts aber an dr Überseebrück. Dett kaa mer ibbernachte. Im Johr 1961 isch es gbaut worre und scho veraltet. Dees kummt durch d Container-Schiff.

D Kunschthalle am Glockegießerwall hott ville Bilder und Skulpture vum Mittelalter bis heut und isch mit 500000 Bsuecher im Johr s beschtbsuechte Museum in Hamburg. Meischterwerke gitts vum Caspar David Friedrich, Munch und de Brücke-Maler. Dees hot au en neue Teil, dees isch de "Kubus", mit ville moderne Kunschtwerk für d Schpezialischte.

S Museum fir Kunscht und Gewerbe bim Bahnhof zeigt aagewandte Kunscht vun der Antike bis in unsere Tag. Es hot a bsunders reichhaltige Sammlung vu Taschteinschtrumente, dees sind Klavier, Cembalo, Spinett. Denn gitts dett au a Jugendstil-Ausstellung mit komplett eigrichtete Zimmer. Außerdem hond se a Sammlung us ville Manufakture mit Prozellan und Fayence. Denn gitts no islamische Kunscht mit kunschtvoll ausgarbeitete Ornamente und a japanische Abteilig mit Schwerter.

S Museum fir Kommunikation Hamburg am Gorch-Fock-Wall hot us 400 Johr Usstellungsstück, wie sich frieher de Austausch vu Nachrichte abgspielt hot. Briefe, Zensur vu de Poscht, Telegraphelinie, Flascheposcht, aber au Computerisierung.

S Ernst Barlach Haus im Jenischpark hot a Sammlung vun Skulpture us Holz, Bronze, Porzellan und Zeichnunge vum Bildhauer Ernst Barlach in de typische beugte und beutelte Haltung. Mit 26 gitt es dett en Drittel vu sinne Holzskulpture. Denn sind im Museum au no 150 Plaschtike beherbergt.

Denn gitts au no d KZ-Gedenkstätte Neuengamme, Jean-Dolidier-Weg 75, wo zwische 1938 und 1945 über 100 000 Häftlinge us ganz Europa unter unmenschliche Bedingunge bi der Herstellig vu Backsteine geschuftet hond und Zehntausende im Hauptlager und in de ibber 80 Außenlager umbracht worre sind. Über dees Geländ kaa mer en Rundgang mache, d Gebäud und d Gedenkschtätte bsichtige und dett nachdenke.

[ändere] Veranschtaltunge

De Marathon isch eimol im Johr am End vum April. Do beteiliget sich so um die 16000 Läufer us de ganze Welt und rennet vu de Reeperbahn zur Elbchaussee, vorbei aan de Landungbrugg, aan de Außenalschter und am Stadtpark, durch d City Nord und zruck durch d Viertel rechts vu de Alschter bis zu de Messehalle. Ugefähr 800000 Zuschauer jubelet und feueret d Läufer aa.

De Haffegeburtstag wird jeds Johr um de 7. Mai rum an drei Tog gefeiert zwische Kehrwiederspitz, Baumwall und de Landungsbrugge. Vor allem gitts Imbissbudde, aber me ka au d Einlauf- und d Auslaufparade vu 300 Schiff, bi denne au vill Seggelschiff mit drei und vir Maschte sind, agucke. Meischt isch au s russische Seggelschiff "Mir" und de schnellschte Großsegler vu de Welt d "Sedov" und s Schwesterschiff vu de gsunkene Pamir d "Kruzenshtern" (d friehere Padua) debi. Bi der Schiffbsichtigung ("Openship") ka mer Segler, Marineboot, Rettungsboot und Zollschiff besueche. Zum Haffegeburtstag kummet ibber eine Million Mensche und es isch e dichts Gwühl.

Des Schduagerter Weindorf gitts ommal im Johr für drei Woche vo Ende Juni bis Mitte Juli uffm Rathausplatz. Do könnet denno d'Hamburger, d'Tourischte, d verschprengte Alemanne und schpeziell d'Schwobe a Gläsle vun de Schduagerter, sonschtige Württemberger und vun de badische Wein schlotze und au Brezzel und Schupfnuedele (Buebespitzle) esse. Zum Dank hond die elf Wirtslüüt (Schduagerter und a paar usm Remstal, Neckartal, Schwarzwald und us Reutlinge) am Schtintfang am Haffe (unterhalb vun de Jugendherberg) en kleine Wiinberg mit 75 Rebschtöck aapflanzt. Die Truube werret im Herbscht im Flugzüüg uf Schduagert mitgnomme und dett keltert und glagert. So um die 50 Fläschle vum Schtintfang Cuvé ("Hamburger Stintfang Cuvée") innere Qualität vun em Qualitätswii werret denn im nächschte Johr bim Weindorf em Präsident vun de Hamburger Bürgerschaft übergebbe.

de „Michel“ überm Hafe

De Hamburger Motorradgottesdienscht (Mogo) wird in jedem Johr am Anfang vum Juli gfeiert. So um die 50 000 Mensche mit 35 000 Motorrädle parket uff de B 4, Ludwig-Erhard-Schtroß, zwische dem Holschtewall (Holstenwall) und dem Rödingsmarkt, feieret de Gottesdienscht im (evangelische) Michel oder höret em uffm Vorplatz zue und denket aan die Motorradfahrer wo im letschte Johr verunglückt sin. Denno machet se im Konvoi a 40 km lange Fahrt ibber d Autobahn in d Umgebung. D Autofahrer künnet denn aan de Uuffahrte längs vun de Schtrecke it uff d Autobahn fahre. Jedder kriggt a gelbs Bändle zum feschtmache am Motorrädle. Des losset se dett au s ganze Johr no flattere.

De Termin für d Messe "Du und Deine Welt" isch nach de Summerferie im November. Die Mess isch für d Verbruucher us Hamburg und sinne Umgebig gmacht. Es kummet 800 Uussteller us 30 Länder. Mer kaa dett Neus us de Bereich Lebbe, Wohne, Mode, Schmuck, Gsundheit, Handwerker und Energieschpare aschaue und au kaufe. Aber uff derre Mess gitts auch a paar Imbissschtänd us aller Welt und usm allemannische Gebiet: usm Schwarzwald, em Elsass und öfter au us de Schweiz.

Musicals gitts dees ganze Johr über und es gitt en schtarke Tourischteschtrom nach Hamburg mit Übernachtunge, Bsuech vum Musical und Einkaufsbummel durch des Netzwerk vun Iikaufspassage.

De Fischmarkt isch jedde Sunntig morge. Dett werret am Hafenanleger a paar Fischle verkauft, aber hauptsächlich Obscht, lebende Hüener, Kleidung und Pflanze und mer muess uffpasse und d Qualität prüefe. S' isch abber ällwell a Mords Gaudi und a dichts Gedräng.

[ändere] Sehenswirdigkeite

De orangefarbene Info-Point bim Cruise Terminal gitt e guete Ibbersicht üb d neue HafenCity und d Elbe.
Vum Michel isch e guete Rundsicht uff de Haffe.

[ändere] Us vergangene Zite

Es gitt en guete 300 Johr alte Bruuch, dass de Türmer vum Michel (vun d Kirch St. Michaelis) am Morge um zehne und am Obend um nüne vom Turm en Choral uff ener Trompete in alle vier Himmelsrichtunge bläst.

An d französische Bsatzung im Johr 1813/1814 erinneret en schteinerner Sarkophag, wo etzet im Park Planten und Blomen absits im Gebüsch schtoht. Dees isch am Rand zur St. Petersburger Straße, geggenibber vun de Messehalle B4. Damals hond die Franzose alle Hamburger, wo nind me zum Esse ghabt hond im bittere Winter us de Schtadt gwiise, wiil se a Belagerung vun de Schtadt gfirchtet hond. Über 1000 Hamburger sind dabei druffgange.

A Wächterhüsle in wiiß mit Säule im dorische Schtil isch alles, wo zrugggbliibe isch vun ennere Abschperrung am Millerntordamm zwische Glacischaussee und Holstenwall. Det isch en Metallgitter über d Schtroß zu enem zweite Wächterhüsle gange (des etzet abgrisse isch) und det hond se die Lüt kontrolliert, wo nach Hamburg hond inne wolle.

S Denkmol vum William Lindley aan de Stroß Vorsetzen erinnert aan die Zit nachm Große Brand. Do hot der Lindley us England ab 1842 en Trink- und Abwassernetz baue losse und danoch hots konne Cholera mehr gäbbe.

An d große Flut vun 1962 erinnert a Markierung us Iise am Huus Rödingsmarkt 27. Die isch in ca. 1,20 m Höh mit em Zuesatz, das de große Schturmflutkatastrophe vum 16. zum 17.2. 1962 308 Menschelebe gfordert hot.

D Oberhafenkantine in de "Stockmeyerschtroß" an der Oberhafenbrugg isch unter em Denkmalschutz innem schiefe Backschteihüüsle mit zwei Stockwerk und dett ka mer ab em Juni 2008 wieder, wies früener d Hafenarbeiter gmacht hond, ungekünschtelte Veschper und norddeutsche Hausmannskoscht esse. Dees isch e alte "Kaffeeklappe" im ehemalige Freihafegebiet, wo im Johr 2007 durch e Sturmflut ibberschwemmt und fascht zerstört worre isch.

Des Zollenspieker Fährhaus liggt am Elbufer zwische Hamburg und Geesthacht und isch so um die 750 Johr alt. Dett hond die Hamburger Zoll kassiert und etzet isch dees a Restaurant mit ener schöne Terrasse, am Wochenende en Treffpunkt vun Motorradfahrer und en Fähranleger für d Überfahrt mit der Elbfähre uf Hoopte.

[ändere] Griene Fleckle

[ändere] D Binnen- und Ussenalschter

D Alschter isch en Erholungsgebiet fir d Seegler, d Jogger und d Spaziergänger. Um de Ussenalschter num sinds 7400 Meter. Mit em Alschterdampfer oder em Alschtercabrio kaa mer druff fahre. Markanti Kunschtwerk, wo mer bim Umelaufe sieht, sind: am Schwanenwik a hohi Säule mit "Drei Männer im Boot" vum Edwin Scharff, an de Kennedybrück en polierte Stoa mit drei Löcher ("Rhythmus im Raum") vum Max Bill und in der Näh vum Aaleger Fährdamm "Drei Drachensteigenlassende Kinder" vum Gerhard Brandes.

[ändere] Planten un Blomen und Wallringpark

Dees isch a Parkanlag vum Fersehturm bis zu de Reeperbahn. Die isch entstande usem alte Zoologische Garte, em botanische Garte und de Wallanlage wo militärisch beditungslos worren isch. Im Planten und Blomen gitts en Apothekergarte, en Rosegarte, en japanische Garte, Spiilplätz fir d Kinder und Musikufführunge aan de Wochenend im Summer.

[ändere] De Hamburger Stadtpark

Des isch en Park im Norde vun Hamburg mit Wiise, Wald, em See, em Planschbecke fir d Kinder, em Planetarium und erre Freilichtbühne. Dees isch en echte Erholungspark fir d Bevölkerung us de Nachbarschaft.

[ändere] D weltoffne Stadt

[ändere] D hanseatische Lebbensart

D Hanseate standet für Kontinuität, holet sich en Vorteil itt durch Striit, sondern verhandlet, anerkennet klugi und gueti Gedanke, sind fründlich, ehrlich und nett. Sie lueget als Kauflit abber immer nach em handfeschte Vorteil. D Kultur isch ihne itt so wichtig.

D Schwiizer möget bi de Hamburger de formelle, traditionelle und hanseatische Ufftritt. D Liechtestaner schätzet bi de Hamburger d Offenheit und es Understatement. (Dees isch a Art vun „Untertrybig“. De Hamburger hauet itt uff de Putz, au wenn ses guet könntet.)

[ändere] Städtepartnerschafte

Chicago, USA, siit 1994
Dresden, Ditschland, siit 1987
León, Nicaragua, siit 1989
Marseille, Frankriich, siit 1958
Ōsaka, Japan, siit 1989
Yokohama, Japan, siit 1992. Haffepartnerschaft.
Prag, Tschechie, siit 1990
Schanghai, China, siit 1986
Sankt-Petersburg, Russland, siit 1957
Prokuplje, Serbie

[ändere] Umgangssproch und Mundarte

Bis ins 19. Johrhundert isch Niiderditsch d allgmeini Umgangssproch in de Stadt gsi. Denoch isch es vum Hochditsche immer mehr verdrängt worre und ab dr Mitte vum 20. Johrhundert praktisch nümmi geschwätzt worre.

Ville Hamburger verstandet es Hamburger Platt no und werfet, wenns grad passe tuet, e paar Satzbrocke in d Runde ("snacken").

De Hamburger Dialekt isch anders wie de Bremer Dialekt. Er unterscheidet sich au vum Plattditsche in de andere nordditsche Regione.

De niiderditsche Iischlag kaa mer also im Hochditsche ällwil no merke. E Abart isch es Hamburger „Missingsch“.

Es Ohnsorg-Theater in Hamburg isch e Fleckle, wo d Ufführunge in niiderditsch ablaufet.

D'Stadt Hamburg het es sich aber au nit nämme lo, dr offiziell Internetuftritt au uf Plattditsche z'mache, au wenn säll unter dr Rubrik "international" lauft.

Siit de 1960er Johr werdet in bestimmte Viertel durch d starke Iwanderung nebbe de ditsche Sproch au anderi Sproche gsproche (portugiesisch im Hafeviertel („Portugiesenviertel“), türkisch und kurdisch in Altona, St. Georg, Veddel und Wilhelmsburg) oder russisch und polnisch.

[ändere] Alemannischi Spuresuech z Hamburg

Z Hamburg gitts praktisch konne Fasnet und wenn ibberhaupt, denn es Koschtüm-Saalfescht LILABE nooch (!) em Aschermittwoch am End vum Februar. Es gitt en Verein vun de Badener ("Verein der Badener von Hamburg und Umgebung"), a badischs Wiihuus und und en Bistro mit elsässischi Spiis und Trank.

[ändere] Webgleicher

(de) Treffe vun Badener, Partnerstadt Friburg im Breisgau