Höhe über dem Meeresspiegel

Us der alemannische Wikipedia, der freie Dialäkt-Enzyklopedy
Hops zue: Navigation, Suech

D Höchi über em Meeresspiegel git a, wievil Meter (m) oder Fuess (ft) en Ort überem Meeresspiegel lit.

Näbed de Meter isch au s Englisch Höhemaass aagee.

Grundsätzlichs[ändere | Quälltäxt bearbeite]

Um d Höchi über em Meeresspiegel chöne z bestimme, muess mer emol en langjöhrige Mittelwert vom Meeresspiegel ame bestimmte Ort berächne. Verschidni Länder händ en underschidliche Bezugspunkt, es wird de Pegel vo verschidnige Meer gnoo. Und drumm gits au Abwichige a de Gränze vo Nochberstaate, wo au scho zu Panne gfüert händ.[1] Genau so underschidlich wie d Bezugspünkt, sind au d Bezeichnige und Abchürzige, wo brucht werded, um d Höchine i de Länder z beschriibe.

Im Alemannische Sprochruum[ändere | Quälltäxt bearbeite]

Dütschland[ändere | Quälltäxt bearbeite]

Z Dütschland hät d Bezeichnig Normalnull (NN) bis Endi 1992 gulte. Sither heissts Normalhöhennull, abgchürtzt NHN. Vor de Umstellig, wia au sither, nimmt mer de Meeresspiegel vo de Nordsee z Amschderdam als Nullhöchi.

Frankriich[ändere | Quälltäxt bearbeite]

In Frankriich isch de Mittelwärt vom Mittelmeer z Marseille de Messpunkt. D Höchi wird mit mètres au-dessus du niveau de la mer (Meter über dem Meeresspiegel), abgchürtzt m bezeichnet.

Fürstetum Liechtestei[ändere | Quälltäxt bearbeite]

Im Ländle gälted di gliiche Maass, wie i de Schwiz (lueg witer une).

Öschdriich[ändere | Quälltäxt bearbeite]

Z Öschdriich nimmt me de mittleri Meeresspiegel vo Triest a de Adria als Usgangswert. Drumm heissts denn Meter über Adria und d Abchürtzig m ü. Adria, m.ü.A. oder müA, umgangsprochlich au Seehöhe oder Adriahöhe.

De Pierre du Niton bi Gämf

Schwiz[ändere | Quälltäxt bearbeite]

I de Schwiz isch wie in Frankriich s Mittelmeer z Marseille de Bezugspunkt. De eigentlichi Messpunkt isch aber de Pierre du Niton, en Fels im Gemfersee, wo e Markierig mit de Höchi vo 360,6 Meter über em Bezugspunkt z Marseille hät. Und so heissed d Höchene i de Schwiz Meter über Meer, abgchürtzt m ü. M., m ü.M. oder ganz eifach m.

D Strooss zum Tote Meer - genau uf Meereshöchi.

Höhepünkt / Tüüfpünkt[ändere | Quälltäxt bearbeite]

De högschti Punkt uf de Wält über em Meeresspiegel isch mit 8'848 m im Himalaya zfinde. Z Westeuropa isch die högschti Erhebig i de Alpe, de Mont Blanc mit 4'810 m.

Wies e Höchi über em Meeresspiegel git, so gits natürli au e Tüüfi under em Meeresspiegel. De tüüfschti Punkt z Europa isch z Holland, wo ganzi Landstrich drü bis vier Meter under em Meeresspiegel ligged. S Death-Valley (Tal des Todes) im Weste vo de USA hät sin tüüfschte Punkt fascht 86 Meter under de Meereshöchi. De tüüfschti Punkt uf em Festland isch d Oberflächi vom Tote Meer zwüsched Israel und Jordanien. Si schwankt zwüsched - 422 und - 423 Meter under em Meeresspiegel. De Marianegrabe im Pazifik isch mit 11'034 m de tüüfschti Punkt uf de Wält.

Einzelnochwys[ändere | Quälltäxt bearbeite]

  1. Planungspanne: Rheinbrücke mit Treppe Spiegel online, Artikel vom 14. Januar 2004