Stuttgart

Us der alemannische Wikipedia, der freie Dialäkt-Enzyklopedy
Hops zue: Navigation, Suech


Wappa Deitschlandkart
Wappa vo de Stadt Schduagert
Stuttgart
Deutschlandkarte, Position vo de Stadt Schduagert hervorghobe
48.7755555555569.1827777777778245Koordinate: 48° 47′ N, 9° 11′ O
Basisdata
Dialekt: Alemannisch
Hauptvariante: Schwäbisch
Bundesland: Bade-Wirttebärg
Regierongsbezirk: Schduagert
Landkroes: Stadtkreis
Heh: 245 m i. NHN
Fläch: 207,4 km²
Eiwohner:

597.939 (31. Dez. 2012)[1]

Bevelkerongsdicht: 2884 Eiwohner je km²
Boschtloetzahle: 70173–70619
Vorwahl: 0711
Kfz-Kennzoeche: S
Gemeindeschlüssel: 08 1 11 000
Stadtgliederung: 23 Stadtbezirk mit 151 Stadtdoil
Adress vo dr
Stadtverwaltong:
Marktplatz 1
70173 Stuttgart
Webpräsenz: www.stuttgart.de
Oberbürgermeister: Fritz Kuhn (Grüne)
Dialäkt: Schwäbisch

Schduagert isch d'Haubdschdadd ond mid a weng mee wia 600.000 Aewohnr[2] de greeschd Schdadd vom deitsche Bondesland Bada-Wirdaberg. Schduagert isch au de greeschd Schdadd em schwäbisch-allemannischa Sprochgebiat und de sexdgreeschd Schtadt en Deidschland. D'Agglomradzjo, also d Schdadt mid em Omland, omfassd ogfähr 2,6 Milljona Aewohner. D Schdadt ischt urschprenglich badisch gwäa und schbäter wirdabergisch worra.

Em Omland vo dr Schdadt seid mr dr Nama môl Schduergerdt, môl Schduagrd[3], d Schduagerder selbr saget eher Schduagert.

D Geografii ond s Klima[ändere | Quälltäxt bearbeite]

Des urschprengliche Schduagert (de heitig Kernschdadt) leit schee neigschnugglet ens Dal vom (heit verdohlda) Näsabach und seina Zuaflüss. Des Dal effnet sich zom heitige Schdadtdoel Bad Cannschdatt am Nägger. D Heiser send bis nuf a d Heng vom Dalkessel baut, so dass-mer vo deet an wonderscheena Iberblick hot iber dui ganza Schdadt. Midda em Schdadtgebiat ond a de Heng am Rand wuud au no schdellaweis Wei abaut.


Blick ibr da Dalkessel mit-em Fernsehdurm em Hendergrond

D'hegschde Schdell isch d Berhardsheeh en dr Näh vom Schdadtdoel Vaihenga, wo durch d Uffschiddong vo Abfäll vom Bau vo dr Audoboh entschdande isch, mid 549 Meder iber NN, d'diefschd Schdell isch am Nägger en Mihlhausa mid 207 Meder iber NN, deet, wo dr Fluss us-em Schdadtgebiat nausfluißt.

S Glima isch feichdmäßigd mid warme Sommer. De durchschniddlich Lufdtembradur leit bei 9,4 °C.

D Fleche vo dr Schdadt leit bei 207,36 Quadradkilomeder.

D nägschdglägene greeßre Schdädd send Frankfurt am Main (150 km nerdlich), Mincha (190 km eschdlich), Mailand (370 km siadlich) ond Paris (500 km weschdlich)[4].

A bissle Gschicht[ändere | Quälltäxt bearbeite]

Em heitiga Ortsdoel Bad Cannschtatt hot's au scho vor dr Remerzeit a Siidlong gäa. Fir a kurza Zeit isch deet a reemischs Reiterkaschtell agleggt gwäa.

Schduagert selber isch vermuatlich om 950 n. Chr. vom schwäbischa Herzog Liutolf als a Gschdiat („Stuotengarten = Stutengarten“) agleit worra. Drom hot d Schdadt au a Ressle em Wabba. Dui Siidlong beim Gschdiat isch zo de badischa Markgrafe komma und vo selle 1219 zo-ra Schtadt erhoba worra. Um 1251 isch d Schdadt als Mitgift an de wirdabergische Grafa iiberganga ond hot sich schbätr zor Residenzschdadt vo Wirdaberg entwicklet.

Nôch 1495 hend sich z Schduagert ondr de Herzeg vo Wirdaberg (bis 1805) oft schleachde ond guade Zeida d Hend gäa. So hot’s oinrseits 1524/25 an graußa Bauraufschdand gäa, wo zo-ma Kriag ausgwachsa ischt, ond au dr 30-jährige Kriag vo 1618/48 hot d Eiwohner arg leida lau. Hot Schduagert drvoo noh rond 9.000 Eiwohner gheet, send’s am End vom Kriag bloß noh rond 4.500 gwäa. Zwischadure hot’s abr au emmr wiidr môl a Bliadezeit gäa, wo sich durch a graußa Bautädigkeit auszoichnet hot. Vo 1724 bis 1734 hot Schduagert sein Stadus als Hauptstadt vom Herzogtum Wirdaberg vrlaura; en sellra Zeit hot dr Herzog Eberhard Ludwig d Residenz nôch Ludwigsburg vorlegt ghet.

Vo 1803 bis 1805 ischt Schduagert d Hauptschdadt vom Kurfirschdatom Wirdaberg ond vo 1806 bis 1918 vom Kenigreich Wirdaberg gwäa. Hauptsächlich ondrem Wilhelm I. (1816 bis 1864) isch s kuldurelle Leaba so richdig ufbliaht. Dô drnôch bis zor Johrhondrtwende hot d Induschtrii emmr meh an Boda gwonna. Drom send au emmr meh Leit en dui Stadt zoga. 1810 hot Stuegert rond 21.000 Eiwohner ghet, 100 Johr schbätr send’s scho 286.000 gwäa. Em Zwoeda Weltkriag ischt Ennaschdadt durch viir Fliagerôgriff Ende Juli ond Midde Septembr 1944 granadamäßig heegmacht worra. Dia Bomba hend fascht älle hischdorische Gebeide vrnichdet. Bloß a baar wenige vo-nen send nôch-em Kriag reschdauriirt odr en ihrer urschbrenglicha Form wiidr ufbaut worra.

Nôch dr Grendong vom Bundesland Bade-Wirdaberg 1952 isch Schduagert dr Regierongssitz vo deam Bondesland worra.

Eigmoindonga[ändere | Quälltäxt bearbeite]

  • 1836: Berg
  • 1860: Häslach, Gablaberg ond Oschdheim
  • 1901: Gaisburg
  • 1905: Cannschdatt, Ondrtirkheim ond Wanga
  • 1908: Degerloch
  • 1922: Botnang, Kaldadal, Hedlfenga, Obrtirkheim ond dr Rot- ond Schwarzwildpark
  • 1929: Hofa
  • 1931: Zuffahausa ond Rodaberg
  • 1933: Feierbach, Weilemdorf, Mihlhausa ond Zazahausa
  • 1936: Heumada, Rohr, Sillabuach ond Uhlbach
  • 1942: Birkach, Riidaberg, Mairenga, Sonnaberg, Fasanahof, Pliinenga, Hohaheim, Schdammheim, Vaihenga, Bisnau ond d Solidiid

D Bolidig[ändere | Quälltäxt bearbeite]

Schduagert isch mit-em Sitz vom Landdag, vo dr Landesregierong ond vo an Haufa Landesbeherda s bolidische Zendrom vom Land.

Gmeinderot[ändere | Quälltäxt bearbeite]

Zämmesetzig vum Gmeinderot
Partäi Wahle vu 2009 Wahle vu 2004
SPD 10 Sitz 14 Sitz
CDU 15 Sitz 21 Sitz
FDP 7 Sitz 4 Sitz
Bündnis 90/Di Griene 16 Sitz 11 Sitz
Wehlervereinigunge 9 Sitz 7 Sitz
Anderi Partäie 3 Sitz 3 Sitz
Gsamt 60 Sitz 60 Sitz
Quälle: Statisdischs Landesamt vu Bade-Württebärg

Stadtobrhaibtr seit 1800[ändere | Quälltäxt bearbeite]

  • 1799 bis 1804: Christian Heinrich von Günzler (* 1758; † 1842)
  • 1805 bis 1811: Gottfried Eberhard Hoffmann
  • 1811 bis 1813: Karl Eberhard von Wächter (* 1758; † 1829)
  • 1813 bis 1819: Karl Friedrich von Dizinger (* 1774; † 1842)
  • 1820 bis 1833: Willibald Feuerlein (* 1781; † 1850)
  • 1833 bis 1861: Georg Gottlob Gutbrod (* 1791; † 1861)
  • 1862 bis 1872: Heinrich von Sick (* 1822; † 1881)
  • 1872 bis 1892: Theophil Friedrich von Hack (* 1843; † 1911)
  • 1893 bis 1899: Emil von Rümelin (* 1846; † 1899)
  • 1899 bis 1911: Heinrich von Gauß (* 1858; † 1921)
  • 1911 bis 1933: Karl Lautenschlager (* 1868; † 1952)
  • 1933 bis 1945: Karl Strölin (* 1890; † 1963), NSDAP
  • 1945 bis 1974: Arnulf Klett (* 1905; † 1974), pardeilos
  • 1974 bis 1996: Manfred Rommel (* 1928; † 2013), CDU
  • 1997 bis 2012: Wolfgang Schuster (* 1949), CDU
  • vo 2013 ôô: Fritz Kuhn (* 1955), Gräane

D Kuldur on d Sähnswirdigkaeda[ändere | Quälltäxt bearbeite]

De Schlossblatz on des neie Schloss im Zentrom

Schduagert hod viile Musea ond archidegdonische Bauwerg z bieda.

D Musea[ändere | Quälltäxt bearbeite]

Dr Eigang vo dr Nuia Schdaatsgalerii
S Kunschdmuseum vo dr Schdadd am Schlossplatz
S nuie Mercedes-Benz Museum z Ondrtirkheim
S nuie Porsche Museum em Schdadtdoil Zuffahausa
S Schdaatliche Museum fir Naturkunde em Schloss Rosaschtoi
  • D Schdaadsgalerii a dr Konrad-Adenauer-Strôß, wo em Land Bada-Wirdaberg gheert, bestoht us-ma alda ond ama nuia Doil. Dr alde Doil schdammt us-em Johr 1843. Dô dren send d Werk vo de eldre Kinschtler wia zom Beischbiil vom Rembrandt, Peter Paul Rubens, Jerg Ratgeb, Hans Holbein ond em Lucas Cranach ausgschdellt. De nui Staatsgalerie ischt 1984 drzuakomma. Archidekt ischt dr James Sterling us Schoddland gwäa. E deam nuia Doil kô mr an Haufa Gemälde vo Kinschtler us-em 20. Johrhondert ôgugga, z. B. vom Oskar Schlemmer, vom Pablo Picasso ond vom Claude Monet. [5]
  • S Konschdmuseum, wo em Besitz vo dr Schdadd ischt, geit’s erscht seit-em Johr 2005. S schdoht direkt an dr Keenigstrôß am Rand vom Schlossplatz. Entworfa hend’s dia Berliner Archidekda Hascher ond Jehle. Dô dren fend mr hauptsächlich moderne Plaschdiga ond Bilder. De bekanndeschde Môler, wo d Werk drvo ausgschdellt send, send dr Otto Dix, dr Willi Baumeister, dr Adolf Hölzl ond d Rebecca Horn. [6]
  • Et weit weg vo deam Bauwerk stôht s Konschdgebeide am Schlossplatz 2, wo dr Konschdverae Schduegert sei Galerii dren hot. [7]
  • S Linda-Museum am Hegelplatz hot a graußa Sammlong fir Entressenda vo dr Velkerkunde. S gheert em Land Bada-Wirdaberg ond zehlt zo de greeschde Musea vo dera Art en Eiropa. De oinzlne Abdeilonga send fir d Bereich Afrika, Orient, Siidasia, Oschtasia, Siidsee, Nordamerika ond Siidamerika. [8]
  • S Schdaadliche Museum fir Nadurkunde vordoilt sich uf zwoi Gebeide, wo sich em Rosaschdoe-Park befendet: De greescht Sammlong kô mr em Leewador-Museum ond da Rescht em Schloss Rosaschdoe ôgugga. [9]
  • S Hegel-Museum isch em Geburdshaus vom deitscha Philosopha Georg Wilhelm Friedrich Hegel en dr Eberhardstrôß ondrbrôcht. Seller isch deet am 27. Auguscht 1770 uf d Welt komma. Ôôgugga kô-mr de vrschiidene Staziona vo deam seim Lebensweg. Drzua erfehrt mr au noh, wia s Leaba en dr dômôliga Zeit z Schduagert ausgsäha hot. [10]
  • S Landesmuseum Wirdaberg isch em Alda Schloss ondrbrôcht. Au des Bauwerk grenzt an da Schlossplatz ôô. Dô dren kô mr ondr andrem da wirdabergischa Kronschatz ond sonscht noh an Haufa Sacha vo dr Schdoezeit bis zor Gegawart ôôgugga. A Außaschdell vo deam Museum befendet sich em Fruchtkaschda neaba dr Stiftskirch, wo mr Musiginschtrument aus viir Johrhondrt besichdiga kô. [11]
  • S Mercedes-Benz-Museum em Schdadtdoel Ondrtirkheim zuiht vo älle Schduagardr Musea de meischde Bsuachr ôô. Der schbegdakuläre neie Bau hot em Johr 2006 s alde Mercedes-Benz-Museum, wo sein Platz em Werksgelände gheet hot, aagleest. Zeigt wuud d Gschicht vom Audomobil aus 120 Johr. [12]
  • Au s nuie Porsche-Museum em Schdadtdoel Zuffahausa – ereffnet am 21. Januar 2009 – ischt a Audo-Museum. Au der Bau weist a zemlich schbegdakulära Archidegdur auf, gschdaldet vom Wiiner Archidegdur-Biro Delugan Meissl. D Firma Porsche präsendiirt deet uf rond 5.600 qm Ausschdellongsfleche rond 80 Fahrzeig ond drzua noh an Haufa kloenere Sacha. [13]
  • S Museum Straßenbahnwelt em Schdadtdoel Bad Cannschdatt hot em Johr 2009 s alde Strôßabôhmuseum, wo en Zuffahausa gwäa ischt, aagleest. Uf-ra Ausschdellongsfleche vo 2.500 qm wuud em ehemaliga Schdrôßabôh-Depot, wo enzwischa ondr Denkmalschutz schdôht, d Gschicht vo de Strôßa ond Ibrlandbahna us dr Region Schduagert präsendiirt. [14]
  • Au mit-ma Freilichtmuseum kô Schduagert ufwarda: Em Schdeddischa Lapidarium en dr siidlicha Ennaschdadt an dr Mörikestrôß send älle sehenswerde Ibrrescht vo dr Schdadd emma wondrscheena Renaissance-Garda ausgschdellt.[15]
  • Schduagert ischt oene vo de greeschde Gmoenda vo Deitschland, wo mehrere Weiôbaugebiet hot. Drom derf au a Weibaumuseum et fehla. Sell fend mr en dr Alda Keldr em Schdadtdoel Uhlbach. Deet wuud d Gschicht vom Weibau aus 2.000 Johr präsendiirt. [16]
  • S Fuierwehr-Museum em-a alda Fabrikgebeide em Schdadtdoel Minschdr zeigt d Gschicht vo dr Fuierwehr z Schduegert aus de ledschde 100 Johr uf-ra Fleche vo 2.500 qm. An Doel vo selle 25 Fuierwehr-Audos schdandet au uf dr Freifleche rom. [17]
  • S Schweinemuseum em Jugendschdiilbau vom alda Schduegerder Schlachthof zeigt an graußa Sau-Haufa – ibr 40.000 Ausschdellongsstickla – vo Schbarschweinla, Glicksseila ond andre Renglschwanzviicher aus Konscht ond Kitsch. Dui Eirichdong bezeichnet sich selbr als s greeschde Museum vo sellra Art weltweit. [18]
  • S Deitsche Landwirtschaftsmuseum em Schdadtdoel Hohaheim zeigt auf-ra Fleche vo 5.700 qm d Gschicht vo dr Landwirtschaft en Deitschland. Betriiba wuud des Museum vo dr Universidet Hohaheim, wo friher amôl a landwirtschaftlicha Hochschual gwäa ischt. [19]
  • S Haus der Geschichte hot sein Platz zwischa dr Nuia Schdaadsgalerii ond dr Musikhochschual. Des Landesmuseum zeigt an Stroefzug durch d Gschicht vo Bada ond Wirdaberg vo dr Zeit vom Napoleon bis zor Gegawart. [20]
  • Ganz en dr Näh vom Hehapark Killesberg – em Feierbacher Weag 46 – schdoht s Theodor-Heuss-Haus, wo dr erschde deitsche Bundespräsident nôch-em End vo seira Amtszeit bis zo seim Dood gwohnt hot. Des Museum gheert ara Schdifdong ond ischt em Johr 2002 vom dômôliga Bundespräsidenda Johannes Rau eigweiht worra. S Wohnzemmer, s Arbeitszemmer ond s Esszemmer send mit lauder originale Mebl ond Gegaschdend vom Heuss rekonschtruiirt worra. Drzua geit’s noh a Ausschdellong mit Ton- ond Filmdokument, wo s Leaba ond s Werk vo sellem Môô zeiget. [21]

D Archidegdur[ändere | Quälltäxt bearbeite]

Schlesser[ändere | Quälltäxt bearbeite]

S Alde Schloss vom Schillerplatz aus gseha
  • S Nuie Schloss ischt ab 1748 nôch de Plee vom Leopold Retti als herzoglicha Residenz baut ond 1807 vom Nikolaus Thouret vollendet worra. Heit isch dô dren s Kuldusminischderiom ondrbrocht. De bsondrs feschdliche Sääl en deam Barockbau werret vo dr Landesregirong zom Repräsendiira gnutzt. Em Zwoeda Weltkriag isch des Schloss arg beschädigt ond vo 1958 bis 1964 wiidr ufbaut worra.
  • Et weit weg drvoo schdoht s Alde Schloss, wo uf-na Wasserburg us-em 13. Johrhondert zruckgoht. Baut worra isch’s 1553 bis 1578. Heit isch dô dren s Wirdabergische Landesmuseum ondrbrôcht. Dr môlerische Arkadahof vom Schloss wuud reglmäßig fir kuldurelle Vorôschaldonga gnutzt, z. B. fir d Ereffnong vom jährlicha Weihnachtsmarkt.
  • S Schloss Solitude am weschdlicha Schdadtrand ischt vo 1763 bis 1767 em Uftrag vom Herzog Karl Eugen vo Wirdaberg als Jagdschloss ond zom Repräsendiira baut worra. Hauptbaumoischtr isch dr Philippe de la Guêpière gwäa. Uf dr Siidseid send deam Schloss d Kavaliirsbauda vôrglagret, wo zor Zeit vom Karl Eugen deam sei Milidärakademii (d Hohe Karlsschual) ihrn Sitz ghet hot. Dr berihmdeschde Schialer vo sellra Akademii isch dr jonge Schiller gwäa.
  • S Schloss Hohaheim am Rand vom gleichnamiga Schdadtdoel uf de Filder ischt 1785 bis 1791 an dr Schdell vo-ra middlalderlicha Wasserburg baut worra. Au vo sellem Rokokoschloss isch dr Karl Eugen vo Wirdaberg dr Bauherr gwäa. Heitzodag wuud des Schloss vo dr Uni Hohaheim gnutzt.
  • Au s Bäraschlessle em Rot- ond Schwarzwildpark hot em Herzog Karl Eugen friher als Jagdschloss deant. Vorglicha mit-em Schloss Solitude fellt’s abr arg bescheida aus. Heit hot’s dô dren a Wirtschaft mit Selbschdbediinong, wo s ganz Johr offa hot.

A baar vo de Kircha[ändere | Quälltäxt bearbeite]

D Leonhardskirch em Schdadt-Zentrom
  • D Schdifdskirch am Schillerplatz mit ihre zwoe oogleiche Dirm isch d Hauptkirch vo dr Evangelischa Landeskirch vo Wirdaberg. Der schbädgodische Bau ischt 1327 bis 1347 entschdanda. Drenna send ondr andrem em Chordoel au d Grabdenkmäler vo de wirdabergische Grafa.
  • A schbätgodischer Bau ischt au d evangelisch Leonhardskirch am Leonhardsplatz. Baut worra isch-se vo 1463 bis 1474. Bsondrs hervorheba muaß-mr des Chorgschdial us-em 15. Johrhondert.
  • Us dr gleicha Zeit schdammt au d Hoschbidalkirch en dr Bichsastrôß (1471 bis 1493). Sehenswert dô dren ischt hauptsächlich dui Kreizigongsgrubb em Chor, wo vom Heilbronner Bildhauer H. Seyffer gschdaldet worra ischt.
  • Deitlich elder wia dia Kircha em Zentrom vo Schduagert isch d evangelisch Veitskirch em Schdadtdoel Mihlhausa. Dui ischt vo 1380 bis 1390 baut ond seither kaum vrendret worra.
  • Uf-em Wirdaberg, wo friher môl sellem gleichnamiga Lendle da Nama gäa hot, thront d Grabkabell, a klassizischdischer Bau, wo dr Keenich Wilhelm I. als Mausoleom fir sei friah vrschdorbena Frau Katharina, ara Schweschtr vom russischa Zara, hot baua lau. Wia dr Keenich selbr s Zeitliche gsegnet ghet hot, hot’r dô dren au sei ledschda Ruah gfonda. Archidekt isch dr Italiener Giovanni Salucci gwäa.
  • Vo selle viile moderne Kircha, wo’s d Schduagert nadirlich au hot, sei schdellvrtretend d Kreizkirch vom Schdadtdoel Hedlfenga erwehnt. Se schdammt us-em Johr 1929 ond ischt oes vo de ganz wenig Beischbiil fir an Sakralbau vo dr Bauhaus-Archidekdur. Dr Kinschtler Paul Trüdinger hot sich dô drmit selbr a Denkmal gsetzt.
  • Ganz en dr Näh vom Ondrtirkheimer Bôhhof stôht d Evangelisch Schdadtkirch, wo so om 1660 rom baut worra ischt. Wia mr dui gega Ende vo de 1960ger Johr grendlich renoviirt hot, send Fresga us-em 17. Johrhondert freiglegt worra, wo em Jesus seine zwelf Aposchtl zeiget. Als Kontrascht zo dera alda Konscht geit’s ao noh was Moderns: d Josefgschicht us-em Alda Teschdament als Bildrziklus en Linolschnidd, gschaffa vom schwäbischa Môler ond Grafiker HAP Grieshaber.

Dirm[ändere | Quälltäxt bearbeite]

Dr Dagbladd-Durm em Johr 2006
Dr Killesbergdurm
  • S wichdigschde Wahrzoeche vo dr Schdadt isch dr 217 Meder haue Fernsehdurm uf-em Hoha Bopser. Egal, vo weelra Richdong mr uf Schduagert zuafährt, sellan Durm kô mr scho vo weidem seha. Vo de Aussichtsplattforma aus hot mr bei-ma scheena Wedder an tolla Blick, wo weit ens Land nei gôht.
  • A guada Aussicht uf d Schduagerter Ennaschdadt hot mr vom Bôhhofsdurm am End vo dr Keenichschdrôß aus. Er ischt 56 Meder hau ond – wia dr ganz Hauptbôhhof – vom Archidekda Paul Bonatz plant worra.
  • Mit-em 61 Meder haua Dagbladd-Durm en dr Eberhardstrôß kô Schduagert glei mit-ma Suberladiv ufwarda: Seller Bau isch s erschde Hochhaus vo Deitschland gwäa, wo aus Schdahlsichtbedoo baut worra ischt. Mancha Quella behaupdet sogar, dass’r s erschde Hochhaus en dera Art vo dr ganza Welt gwäa sei soll. [22] Besichdiga kô-mr dean Durm leidr et. [23]
  • Dr Killesbergdurm em Hehapark Killesberg hett eigentlich scho zo dr Indrnazionala Gardabauausschdellong (IGA) 1993 baut werra solla, abr dômôls isch dr Schdadt s Geld ausganga. Vrwirklicht worra isch des Projekt erscht acht Johr schbätr vom Schduagerter Vorscheenerongsvorei. Eigweiht worra isch der 42 Meder haue Durm mit seine viir Pladdforma am 17. Juli 2001.
  • Dr Schelladurm an dr Weberstrôß schdammt us-em Johr 1564. Er isch a Ibrbleibsl vo dr alda Schdadtmauer. Schbädr hot-ma a dreischdockigs Haus dranôbaut, wo em 19. Johrhondert Leit dren gwohnt hend. Em Zwoeda Weltkriag ischt der Bau bis uf da massiva Schdomba vo de Bomba heegmacht worra, abr Ende dr 70er Johr wiidr ufbaut worra. Heit ischt deet dren a Wirtschäftle ondrbrôcht, d Weinstube Schellenturm.
  • Dr Bismarckdurm e dr Nähe vom Killesberg ischt 1904 zom Ôdenka an da Reichskanzler Otto von Bismarck baut worra. Finanziirt worra isch’r vo dr Schdudendaschaft vo dr dômôliga Technischa Hochschual Schduagert. Archidekt isch dr Wilhelm Kreis gwäa.
  • Uf dr hegschda Schdell vom Schdadtdoel Bad Cannschdatt hot 1891 dr Vorscheenerongsvorei Cannschdatt da 25 Meter haua Burholzhofdurm e dr Form vo-ma reemischa Kaschdelldurm baua lau. Ganz droba hot dr Gottlieb Daimler a Durmschduub finanziirt. Nuffschdeiga kô mr uf dean Durm bloß, wenn droba a Fahn ghisst ischt.

Sonschdige[ändere | Quälltäxt bearbeite]

S Dobblhaus vom Le Corbusier ond em Pierre Jeanneret
S Roihahaus vom Mart Stam
  • Vo dr Archidekdur her dui mit Abschdand bedeidenschde Wohnôlag isch d Weißahofsiidlong uf-em Killesberg. Deet hot em Johr 1927 dr Deitsche Werkbund d Ausschdellong Die Wohnung vrôschdaldet. Älle Archidekda, wo dômôls indrnazional Rang ond Nama ghet hend, send beteiligt gwäa, z. B. dr Mies van der Rohe, dr Le Corbusier, dr Jacobus Johannes Pieter Oud, dr Victor Bourgeois, dr Walter Gropius, dr Hans Scharoun ond dr Mart Stam. Au wenn em Zwoeda Weltkriag a baar vo selle Heiser a Opfer vo de Bomba worra send, isch dui Ôlag emmr noh beeidruckend. Em Haus vom Le Corbusier ischt a klois Museum ondrbrôcht, wo d Gschicht vo dera Siidlong zeigt.
  • Et weit weg drvoo befendet sich d Kochahofsiidlong, s krasse Gegastick zor Weißahofsiidlong. Ondr dr Leidong vom konservadiva Archidekda Paul Schmitthenner hend d Nazis deet 1933 25 Heiser us Holz ufschdella lau, wo als tipisch „deitsch“ bezeichnet worra send. Deutsches Holz für Hausbau und Wohnung hot dui Modellsiidlong ghoißa.
  • Zom Rahmaprogramm vo dr IGA 1993 hot em Norda vo dr Schdadt au dui Ausschdellong Expo Wohnen 2000 gheert. 13 Archidekda us 11 Lender hend rond 100 Wohnonga mit farbige Fassada ond zom Doel gwagde Forma gschaffa. Dô drmit hend-se a Zukonftsvisioo zeigt, wia s moderne Wohna en-ra Großschdadt em 21. Johrhondert ausseha kennt.
  • Am Berliner Platz schdôht s grauß Konzerthaus, wo vo 1955 bis 1956 baut worra ischt on vo de Schduagerter da bescheidena Nama Liederhalle kriagt hot. Dô dren geit’s abr et bloß Konzert; s fendet au jedes Johr a baar greeßre Bäll drenna schdadd, z. B. dr Landespresseball.
  • A Turischda-Addrakzioo ischt ao d Markthalle ondrhalb vom Schillerplatz, wo 1912 em Jugendschdiil baut worra ischt. Dô dren siht’s a bissle aus wia uf-ma oriendalischa Basaar. An rond 50 Marktschdend kô-mr älle megliche Fisch, Gwirz, Floesch, Obst, Gmias ond endrnazionale Delikadessa kaufa.

Andre Sähnswirdigkaeda[ändere | Quälltäxt bearbeite]

  • Zwischa dr Liederhall ond em Linda-Museum leit dr Hobbalau-Friidhof, wo 1626 ôglegt worra ischt ond heit ondr Denkmalschutz schdôht. Deet wuud jetzt neamr meh vorgraba. Zom Ôgugga lohnet sich dia scheene alde Beem ond d Greber vom Hauff, vom Schwab ond vom Schubart.
  • Z Cannschdatt schließlich fend-mr dui Sähnswirdigkaed, wo jedas Johr am meischda Bsuachr ôlockt: d „Wilhelma“. So hoeßt dr Zoo vo Schduagert. Des ischt abr et bloß a Park fir dia rond 8.000 Viicher, sondern dr oezich zoologisch-bodanischa Garda vo ganz Deitschland.

Orkeschtr[ändere | Quälltäxt bearbeite]

  • S Radio-Sinfonieorchester (RSO) Stuttgart ischt ois vo deane drei Orkeschtr, wo zom Sidweschtrundfunk (SWR) gheeret. Sei Repertoire setzt sich aus Werk vo dr klassischa Musik zamma, en dr Regel vo dr Romantik bis zor Moderne. Älle Konzert wend uffzoichnet ond em Radio gsendet.
  • S Staatsorchester Stuttgart ischt en erschdr Linie s Orkeschtr vom Schduagerter Opernhaus ond schbiilt bei de Uffihronga vo de Opra ond vom Ballett. A baar Môl em Jôhr geit des Orkeschtr abr au Sinfoniikonzert en dr Schduagerter Liederhalle. Dr Träger vom Orkeschtr isch s Land Bada-Wirdaberg. Grendet wôrra isch der Klangkörper scho 1589, au wenn’r selbigs Môl noh Württembergische Hofkapelle ghoißa hôt.
  • D Stuttgarter Philharmoniker send a schdeddischs Orkeschtr, wo’s seit 1924 geit. S Repertoira gôht en de gleich Richdong wia beim RSO. Hin ond wiidr wirket d Philharmoniker abr au bei Uffihronga vo Opra em Opernhaus mit.
D SWR Big Band bei dr Abschlussvorôschdaldong zor Bundesgardaschau 2011 en Koblenz
  • S Stuttgarter Kammerorchester ischt oiner vo de jengschde Klangkerper en dera Schdadd. Grindet wôrra isch-es 1945, also glei nôch-em Zwoida Weltkriag, vom Karl Münchinger.
  • Reladiv nei (1965) ischt au s Bach-Collegium Stuttgart, wo d Gächinger Kantorei bei ihre Konzert begleidet ond wia dui vom Helmuth Rilling grindet wôrra ischt, wenn au elf Jôhr schbäter.
  • A ganz andra Musikrichdong vrtridd – wia scho dr Nama sait – d SWR Big Band. Grindet wôrra isch dui 1951 vom Erwin Lehn (1919 bis 2010) ondrem Nama Südfunk-Tanzorchester. Neaba-m Jazz macht dui Grubbe abr au gehobena Danz- ond Ondrhaldongsmusik.
  • Außer selle Profi-Orkeschtr geit’s z Schduagert abr au – wia en fascht jedra Schdadd – noh an Haufa Amadeer-Musizirende, wo meischdens emma Vorei zammagschlossa send.

Theater[ändere | Quälltäxt bearbeite]

S Opernhaus em Schlossgarda
S Schauschbiilhaus em Schlossgarda
  • D Wirdabergische Schdaatstheater em Obra Schlossgarda vrdoelet sich uf drei Bihna:
    • Dô drvo isch s Opernhaus, wo Ôfang vom 20. Johrhondert vom Archidegda Max Littmann baut worra ischt, am schenschda. Ufgfihrt wend deet Opra vo alde ond zeitgnessische Kombonischda en moderne Inszeniironga vo indrnazional bekannde Regisseur. Bisher ischt dui Eirichdong sechsmôl vo dr Zeitschrift „Opernwelt“ mit-em Titl „Opernhaus des Jahres“ auszeichnet worra. En sellem Gebeide hot au s Schduagerter Ballett sein feschda Schbiilplatz. So zemlich en jedra Säsoo geit’s oe odr mehrere Uruffihronga vo jonge Choreografa.
    • Glei neabam Opernhaus schdôht s Schauschbiilhaus, wo sich hauptsächlich em gsellschaftskridischa Theater vorschriiba hot. Der moderne Bau ischt 1962 eigweiht worra.
    • S Kammertheater hôt sein Platz seit 1983 em Bau vo dr Nuia Schdaatsgalerii uf dr andra Seit vo dr Konrad-Adenauer-Strôß.
  • Zo de Schduagerter Schauschbiilbihna gheeret zwoe Heiser:
    • D Komeedie em Marquardt en dr Bolzstrôß pfleagt a ghobenes Bulvartheater ond brengt ao jedes Johr wenigschdens oemôl a Schdick em schwäbischa Dialekt raus, oft sogar als Uruffihrong.
    • S Alde Schauschbiilhaus en dr Kloina Keenichschdrôß hot neaba Klassiker au moderne Theaterschdick ond manchmôl ao a Musical em Programm.
  • Em Schduagerter Weschda beim Feiersee hot seit 1998 s Theater der Altstadt sei Bleibe, wo meischdens moderne Schdickla schbiilt, manchmôl ao mit Musig ond em schwäbischa Dialekt.
  • Et bloß Theater, sondern ao Jazz, Rock, Pop, Ballett, Klassik ond Kabarett kô-mr em Theaterhaus em Norda vo dr Schdadt en dr Siemensschdrôß erleaba. Deet machet ao an Haufa Kinschtler Schdazioo, wo grad uf Turnee send.
  • Em Friidrichsbau bei dr Schduagerter Berse wuud de Zuaschauer Varieté vom Feinschda bodda.
  • S Renitenztheater e dr Bixaschdrôß pfleagt neabem litrarischa ond polidischa Kabarett ao noh Traveschdii ond a ôschbruchsvolla Ondrhaldong.

Grauße Feschdivideeda, wo en jedam Johr schdaddfendet[ändere | Quälltäxt bearbeite]

Weilauba uf-em Marktblatz
S Cannschdaddr Volksfescht
  • Ende April/Ôfang Mai fendet emmr uf-em Cannschtaddr Wasa s Frialengsfescht schdadd. Dô geit’s – wia beim Volksfescht em Herbscht – a baar Biirzelt ond an Haufa Fahrgschäft, bloß a Nommr kloener. Drfiir dauret des Fescht lenger, nemlich guad drei Wocha.
  • Em Juli gaschdiirt midda en dr Schdadd – uf-em Karlsblatz – dr Hamburger Fischmarkt. Des ischt a graußa Hocketse, wo d Hamburger Fischhendler kulinarische Schbezialideeda vo ihrer Hoemet serviiret. Nadiirlich geit’s au ebbes zom Drenka.
  • Emmr zwoe Wocha vôr d Sommrferia ôfanget fendet am Samschdich uf-em Killesberg s Lichdrfescht schdadd. En dr Werbong hoeßt’s, des wär d Nacht der 100.000 Lichter. Dr Heheponkt ischt a riisigs Feierwerk, wenn’s ganz naacht ischt. Falls-es a sellem Dag regna sott, vorschiabt sich des Fescht om oe Woch.
  • Ôfang Auguscht fendet rond om da Theadrsee s Sommerfescht schdadd. Des isch ebbes fir de ghoobene Ôschbrich: Dô wend ema Haufa weiße Partyzelt edle Wei, Schampanjer ond Meeresfriicht serviirt, ond entschbrechend send au d Preis.
  • Glei a baar Wocha schbätr – Ende Auguscht/Ôfang Sebdembr – fendet uf-em Marktblatz ond uf-em Schillerblatz ond uf sellem Schdrôßadoel, wo dia zwoe mitnandr vorbendet – zwelf Däg lang s Schduagerter Weidorf schdadd. Dô wemmlet’s no so vo Lauba, wo-mr edle Wirdaberger Wei schlotza ond Schbezialideeda us dr Schwäbischa Kuche wia zom Beischbiil Saure Kuddla, Mauldascha, Saure Kardofflrädla ond Soeda mit Lensa ond Schbätzla essa kôô.
  • Meischdens en dr ledschda Sebdembrwoch fangt uf-em Wasa s Cannschdaddr Volksfescht ôô, wo 16 Däg lang dauret. Nôch-em Minchner Oktobrfescht isch dees s graischde Fescht vo ganz Deitschland, wo emmr a baar Milliona Besuacher aufweisa kôô.
  • Am Donnrschdag vôr-em erschda Advent schdardet dr Schduagerter Weihnachtsmarkt ond gôht bis zom 23. Dezembr. Dô drbei handlet sich’s om oen vo de graischde Weihnachsmärkt vo ganz Eiropa. D Budena send uf-em Marktblatz, en dr Hirschschtrôß ond uf-em Schillerblatz ufgschdellt.

Schtudgart 21[ändere | Quälltäxt bearbeite]

Hauptartikel: Stuttgart 21

Schtudgart 21 hoißt mr a weng überkanditelt des Projekt, bei demm dr Hauptbahnhof zo nemm Durchgangsbahnhof umbaut werre soll. Dr alte Bahnhof wird doderzua ondertunnelt und zom Toil abgrissa. Des Projekt koscht en Haufe Geld, abr bei Züg, wo weiter fahret, spart mr dodadurch a wengle Zeit und Aufwand, weil d Fahrtrichtung net wechslet und dodamit au dr Lokführer oder gar d Lok net vo henda nach vorna im Zug muaß. Weil dii alte Schinna zum Toil ufglöst werred, geits au en Haufe neies Bauland midde i de Stadt, was abr iiberhaupt net ausraicht um d Koschta zu decka.

Zom Flughafe na soll au a neie Schdrecke baut werre, wo weiter a de Autobahn A8 endlang noch Ulm na got. Dodamit wird d ICE-Verbindung Ulm-Schduagert um ainiges schneller.

D Wirdschafd[ändere | Quälltäxt bearbeite]

Schduagert isch dr Haobdsitz vo mährere große Induschdrii-Ondernehma mit Schwerponkt em Bereich Audomobil ond Maschenabau wia em Daimler, em Bosch, em Porsche ond em Mahle ond s hod Deidschland-Niiderlassonga vo viile indernationale Induschdrii-Ondernehma wia d IBM ond Hewlett-Packard.

Med 408 ha Wengert isch Sturgert d sextgreschte Waibaugmaind em wirttebergische Waibaugebiat.[24] Hauptsächlich werd Trollinger uf 37% vo de Waibaufläche abaut.[24] A gringere Roll spillt de Riesling met 18% und de Lemberger met 9% vo de Fläche.[24]

Schduagert en dr Litradur[ändere | Quälltäxt bearbeite]

Dr Eduard Merike uf ra Lidografii vom Bonaventura Weiß us-em Johr 1851

Dass ibr so a graußa Schdadd wia Schduagert an Haufa Fachlitradur geit, vrschdôht sich vo selbr. Mit sellem Begriff send zom Beischbiil soddiche Werk gmoint, wo sich mit dr Gschicht vo dr Schdadd, seira Wirtschaft, dr Landschaft, de Sehenswirdichkeida ond so weidr befasset. A kloina Auswahl dô drvoo ischt em Abschnidd Litradur uffgfihrt. Jetzt abr soll’s om d Epik, d Lyrik ond om d Dramatik ganga.

Zo de bedeidenschde schwäbische Dichter zehlt dr Eduard Mörike (1804 bis 1875). Seine ledschde Lebensjôhr hôt der guade Môô z Schduagert vorbrôcht. Deet hôt’r am Keenigin-Katharina-Schdift, ama Gymnasium fir Mädla, Ondrricht en Litradur ond Deitsch gäa. A litrarisch Denkmal gsetzt hôt’r Schduagert mit seira Märles-Novelle Das Stuttgarter Hutzelmännlein, gschriiba zom Doil em schwäbischa Dialekt, was mr sonscht vo deam Dichter et gwehnt ischt. Rond 130 Jôhr schbätr isch dui Gschicht vom Mörike seim Landsmôô Felix Huby (* 1938) zo-ma Theaterstickle fir Kender vrarbeidet wôrra, wo 2003 em Schduagerter Schauschbiilhaus zom erschda Môl uff d Bihne komma ischt. De meischde Leit abr isch dr Huby bloß bekannt durch seine Kriminalroman om da Kommissar Bienzle, wo au z Schduagert schbiilet ond etliche drvoo firs Fernseha vrfilmt wôrra send.

Joachim Ringelnatz, vor 1925

Guad eigfanga hôt de schwäbisch Mentalideet dr säxische Schriftschdeller Joachim Ringelnatz (1883 bis 1934). En seim Gedicht Stuttgarter Wein- und Bäckerstübchen schildret’r, wia’s emma alda schwäbischa Wei-Stiible dômôls so zuaganga ischt. Gega End vom Gedicht ziagt’r s folgende Fazit:

Setze mich so ganz bescheiden hin
und vergaß auch nicht, sehr laut zu grüßen.
Dennoch ließen Blicke mich leicht büßen,
dass ich kein Stuttgarter bin.[25]

En seim Schlissl-Roman Monrepos oder Die Kälte der Macht schildret dr Manfred Zach (* 1947) da Uffstiig ond da Fall vom fikdiva schwäbischa Schbitzapolidiker Oskar Specht. S schbricht an Haufa drfiir, dass mit dr Titlfigur dr einschdige bada-wirdabergische Minischdrpräsident Lothar Späth gmoint ischt.[26]A graußer Doil vo deam Werk schbiilt en dr Villa Reizenstein, em Sitz vom Minischterpräsidenda vo sellem Lendle. Des Bauwerk mit seine Schalthebl vo dr Macht schbiilt abr au em Karl Napf (* 1942) seim autobiografischa Roman Der wahre Jakob – Das wundersame Leben des Emmerich Pulcher[27] ond em Manfred Rommel (* 1928) seira Biografii Trotz allem heiter[28] a graußa Roll.

Au uff manche auslendische Dichter hôt Schduagert so an graußa Eidruck gmacht, dass-se dui Schdadd litrarisch vorarbeidet hend. Als Beischbiil seiet dr deenische Märlesdichter Hans Christian Andersen (1805 bis 1875), dr Schweizer Journalischt Victor Tissot (1845 bis 1917) ond dr irische Dramatiker Samuel Beckett (1906 bis 1989) erwehnt. Em Andersen sei Märle Die alte Kirchenglocke hôt an wôhra Kern: dô dren gôht’s om-an Doil vom Leaba vom Friedrich Schiller ond wia-nem nôch seim Ableaba uff-em Schduagerter Schlossblatz a Denkmal gsetzt wôrra ischt, entwôrfa vom deenischa Bildhauer Bertel Thorwaldsen. Richdich ens Schwerma kommt dr Tissot en seim Werk Reportagen aus Bismarcks Reich, wenn’r an Schduagert denkt: Es wird Zeit, dass wir diese so anmutige Stadt mit ihrer überaus gefälligen Wesensart verlassen, diese Stadt, in der die Bevölkerung ihre Gutmütigkeit bewahrt hat selbst unter der Pickelhaube. Stuttgart bleibt Deutschlands Lächeln, während Berlin nur die Grimasse ist.[29] [[Datei:Samuel Beckett by Reginald Gray.jpg|miniatur|hochkant|Dr Samuel Beckett, 1961 porträdiirt vom Reginald Gray Dr Beckett schliaßlich ischt emmer môl wiidr en sellra Schdadd gwäa, om firs Fernseha vom dômôliga Siddeitscha Rondfonk (SDR) – heit Sidweschtrondfonk – ois vo seine Theaterstickla zo inszeniira. Dr SDR hôt hôt den dera Zeit sein Sitz en dr Neggrstrôß ghet, ond deet isch dr Becket schbaziira ganga, wenn grad Drehpausa gwäa send. Dôbei send-em d Vers fir sei Gedichtle La rue Neckar, uff Deitsch Die Neckarstraße, eigfalla, wo so ôôfangt:

Ne manquez pas à Stuttgart
la longue Rue Neckar.

S gleiche en dr Ibrsetzong vom Karl Krolow:

Vergesst nicht beim Stuttgart-Besehen
die Neckarstraße zu gehen.[30]

Nôch selle zwoi Zeila môg sich mancher, wo dui Strôß kennt, vorwondert d Auga reiba ond sich frôga, was denn bidde deam Môô an sellra ooscheinbara Strôß so gfalla hôt. Dr Gäg schliaßlich ischt, dass deet et bloß heitzodag nix los ischt, sondern au friher nix los gwäa ischt.

En ihrem muaderschbrôchiga Dialekt hend au a baar Autora greimde Vers uff ihr Hoimetschdadd gmachet, so zom Beischbiil dr Otto Keller (1875 bis 1931). Vo deane viile Gedicht, wo z Schduagert handlet, wend zwoi mit a baar Ausziig rauspickt:

dr Otto Keller (1875-1931)

S Parabli
A Bauer guckt sich Schtuagert a,
schtolz fahrt er en d’r Schtroßabah.
Er kommt net ause m Schtauna raus,
so schee ond groß isch Haus an Haus.
Des lohnt sich scho, potz sappermoscht,
wo d’ Fahrt bloß a paar Pfenneng koscht!

Sein Schirm, den loihnt der guate Ma
dicht neba sich so ogschickt na,
dass d’ Schpitza, wia’s mitonder goht,
em Laufgang mittla drenna schtoht.
Er merkt’s net – d’ Schtadt ischt halt so schee –,
Uf oimol, boms! – d’r Schirm isch hee![31]

„Gottliab“
I ka’s net saga, wia mer halt
so arg d’r Nama “Gottliab” gfallt.
Der hot en Klang, so wonderschee,
i woiß koin scheen’ra Nama meh,
ond duah-n-e me au no so b’senna,
ond wer’s net glaubt ond zweifelt dra,
sag oimol laut bloß vor sich na:
„Gottliab!“

Au bei d’r Liesbeth z’ Kaltatal,
do isch dees grada so d’r Fall;
wenn äls d’r Gottliab schafft d’ ganz Woch,
no lobt s’en meh wia bodahoch:
“I han en Ma, ‘s isch net zom saga,
i brauch me ‘s ganz Johr net z’beklaga,
ond Räusch -, ‘s ganz Johr fascht hot’r koin,
ihr liabe Leit, ‘s giebt halt bloß oin
„Gottliab!”[32]

D Friedrich-E.-Vogt-Stäffela

Kaldadaal ischt a Schdadtdoil em Siida vo Schduagert. Dô drmit hôt’s au dr Reigschmeggde Werner Veidt (1903 bis 1992) ghet, wo z Tamm bei Ludwigsburg uffgwaxa ond so zo-ma Schwôba wôrra ischt. Dr sell hôt seira Anna Scheufele aus Kaltetal mit sechs zwelfzeilige Schtrofa a litrarischs Denkmal gsetzt:

Oh Anna Scheufele – aus Kaltetal,
Tochter vom Bürschtebender.
Du bischt mein Schtern, mein Ideal,
meine Zarah Zylender![33]

Des Gedichtle isch schbäter au vrtont ond vom Dichter selber uff Schallpladd gsonga wôrra. Dô klengt’s glei viil schwäbischer, wia wenn mr da Tekscht vo-nem liist! Au etliche Reim als Grondlag fir Liader hôt dr Schduagerter Schbrôch-Wissaschaftler Friedrich E. Vogt (1905 bis 1995) gmachet, zom Beischbiil Dia steile Stuagerter Stäffela, Zwische’m Hauptbah’hof und ‘em Schloßplatz ond Was tät mr au …?![34]

Bekannde Leit, wo z Stuegert uf d Welt komma send[ändere | Quälltäxt bearbeite]

ond wo an Artikl driibr exischdiirt

  • Georg Rodolf Weckherlin (1584 bis 1653), a schwäbischer Dichter
  • Georg Wilhelm Friedrich Hegel (1770 bis 1831), a deitschr Philosoph ond evangelischr Theolog
  • Gustav Schwab (1792 bis 1850), a deitschr Dichtr ond evangelischr Theolog
  • Emilie Zumsteeg (1796 bis 1857), a deitscha Kombonischdin, Pianischdin, Chorleitere ond Musikschriftstellere
  • Wilhelm Hauff (1802 bis 1827), a deitschr Dichtr
  • Eduard Paulus (1837 bis 1907), a deitschr Dichtr, Kunschthischtorikr ond Archäolog
  • Isolde Kurz (1853 bis 1944), a deitscha Dichtere
  • Cäsar Flaischlen (1864 bis 1920), a deitschr Dichtr ond Schriftsteller
  • Hermann Abert (1871 bis 1927), a deitscher Musikwissaschaftler, Musikschriftsteller, Hochschuellehrer ond Musikforscher
  • Otto Keller (1875 bis 1931), a schwäbischr Schriftstellr, Dichtr ond Kombonischt
  • Hermann Keller (1885 bis 1967), a deitscher Musikwissaschaftler, Kombonischt, Organischt ond Hochschuellehrer
  • Walter Georgii (1887 bis 1967), a deitscher Pianischt, Musikwissaschaftler ond Hochschuellehrer
  • Oskar Schlemmer (1888 bis 1943), a deitschr Môler, Bildhauer ond Bihnabildner
  • Willy Reichert (1896 bis 1973), a schwäbischr Volksschauschbiiler ond Sängr
  • Hermann Reutter (1900 bis 1985), a deitschr Kombonischt, Hochschuellehrer ond Pianischt
  • Friedrich E. Vogt (1905 bis 1995), a schwäbischer Dialektschriftsteller
  • Oscar Heiler (1906 bis 1995), a schwäbischr Volksschauschbiiler
  • Max Strecker (1906 bis 1991), a schwäbischer Humorischt, Volksschauschbiiler, Schriftsteller ond Sänger
  • Helmut Bornefeld (1906 bis 1990), a deitschr Kombonischt, Orglsachvorstendiger, Grafiker ond Autor vo Fachlitradur
  • Erich Hermann (1911 bis 1984), a schwäbischer Volksschauschbiiler, Humorischt ond Sänger
  • Lore Fischer (1911 bis 1991), a deitscha Sängere ond Geigere
  • Herbert Liedecke (1912 bis 1998), a deitscher Konzertorganischt, Pianischt, Hochschuellehrer ond Orglsachvrstendiger
  • Karl Münchinger (1915 bis 1990), a deitscher Dirigent ond Musik-Pädagog
  • Oscar Müller (1921 bis 2003), a schwäbischer Volksschauschbiiler, Humorischt, Radiomoderator ond Sänger
  • Ilse Künkele (1925 bis 1992), a deitscha Schauschbilere
  • Ruth Mönch (1926 bis 2000), a deitscha Schauschbiilere, Sengere ond Moderatorin
  • Dieter Eppler (1927 bis 2008), a deitschr Schauschbiiler
  • Manfred Rommel (1928 bis 2013), a deitscher Kommunalpolitiker
  • Willy Seiler (1930 bis 1988), a deitscher Schauschbiiler, Senger ond Moderator
  • Michael Pfleghar (1933 bis 1991), a deitscher Film- ond Show-Regisseur, Drehbuachautor ond Fernsehproduzent
  • Wolle Kriwanek (1949 bis 2003), a schwäbischer Rockmusiker
  • Karlheinz Hartmann (* 1950), a schwäbischr Volksschauschbiiler
  • Albin Braig (* 1951), a schwäbischr Volksschauschbiiler
  • Barbara Bosch (* 1958), a deitscha Kommunalpolidigere
  • Karoline Eichhorn (* 1965), a deitscha Schauschbiilere

Litradur[ändere | Quälltäxt bearbeite]

  • Otto Borst: Stuttgart – Die Geschichte der Stadt, Konrad Theiss Verlag Schduagert ond Aala, 1973, ISBN 3-8062-0114-5
  • Susanne M. K. Baur, Doris Schöpke-Bielefeld: Stuttgart – Die Stadt und ihre Stäffele, Scribo Verlag, 2012. ISBN 978-3-937310-24-4
  • Elisabeth Kabatek: Gebrauchsanweisung für Stuttgart, Piper Verlag GmbH, München 2012, ISBN 978-3-492-27614-6
  • Uwe Bogen und Thomas Wagner: STUTTGART – Eine Stadt verändert ihr Gesicht, Sutton Verlag GmbH Erfurt 2012, ISBN 978-3-9540009-8-2
  • Andrea Jenewein / Frank Rothfuß: Stuttgart – Kesseltreiben und Höhenrausch, Gmeiner Verlag GmbH, Meßkirch, 2013, ISBN 978-3-8392-1471-8

Quellen[ändere | Quälltäxt bearbeite]

  1. Statistisches Bundesamt – Gemeinden in Deutschland mit Bevölkerung am 31.12.2012 (XLS-Datei; 4,0 MB) (Einwohnerzahlen auf Grundlage des Zensus 2011)
  2. Statistisches Landesamt Baden-Württemberg
  3. Aussprache & Eigenheiten, bei Schwabissimo
  4. Lufdliniaendfernong onlain berechna
  5. D Webseid vo dr Schdaadsgalerii
  6. D Webseid vom Konschdmuseum
  7. D Webseid vom Konschdverae
  8. D Webseid vom Linda-Museum
  9. D Webseit vom Nadurkundemuseum
  10. D Seit ibrs Hegel-Haus us-em Stuegert-Reisefihrer
  11. D Webseit vom Landesmuseum
  12. D Webseit vom Mercedes-Benz-Museum
  13. D Webseit vom Porsche-Museum
  14. D Webseit vo dr Strôßabôhwelt
  15. D Webseit vom Lapidarium
  16. D Webseit vom Weibaumuseum
  17. D Webseit vom Fuierwehr-Museum
  18. D Webseit vom Schweinemuseum
  19. D Webseit vom Landwirtschaftsmuseum
  20. D Webseit vom Museum
  21. D Webseit vom Theodor-Heuss-Haus
  22. So jedafalls des vo dr Marketing und Tourismus GmbH Regio Stuttgart erschdellde Heftle Türme der Region Stuttgart uf dr Seit 14 ond des Biachle Stuttgart für Stuttgarter 2011 (S. 12), wo e dr Marco-Polo-Buachroih erschiina ischt.
  23. Ällerloi Wissenswerdes ibr d Gschicht vom Dagbladd-Durm mit Bilder
  24. 24,0 24,1 24,2 Jede vierte Gemeinde in Baden-Württemberg mit Weinbau. Pressemitteilung 270/2011. Statistisches Landesamt Baden-Württemberg, 10.8.2011. [1].
  25. Aus tausend grünen Spiegeln, rausgäa vom Thomas Vogel, Konrad Theiss Verlag, Stuttgart, 1995, ISBN 3-8062-1159-0, S. 116
  26. http://www.spiegel.de/spiegel/print/d-8903510.html
  27. Deutsche Verlags-Anstalt Stuttgart/München, 2003, ISBN 3-421-05456-8
  28. Deutsche Verlags-Anstalt Stuttgart/München, 1998, ISBN 3-421-05151-8
  29. Aus tausend grünen Spiegeln, a. a. O., S. 117
  30. Aus tausend grünen Spiegeln, a. a. O., S. 115
  31. Otto Keller: Schnitz ond Zwetschga, Verlag Karl Knödler Reutlingen, 1994, ISBN 3-87421-132-0
  32. Otto Keller: Sacha ond Sächla, Verlag Karl Knödler Reutlingen, 1978, ISBN 3-87421-071-5
  33. Werner Veidt: Oh Anna Scheufele, Verlag Karl Knödler Reutlingen, 1991, ISBN 3-87421-040-5
  34. Friedrich E. Vogt: Nachlese, Silberburg-Verlag Tübingen, 2005, ISBN 3-87407-663-6

Weblink[ändere | Quälltäxt bearbeite]

 Allmänd (Commons): Stuttgart – Sammlig vo witere Multimediadateie