Pakistan
Us der alemannische Wikipedia, der freie Dialäkt-Enzyklopedy
|
|||||
| Amtssprooche | Urdu, Englisch | ||||
| Hauptstadt | Islamabad | ||||
| Staatsform | Präsidiali Bundesrepublik | ||||
| Präsident | Asif Ali Zardari | ||||
| Ministerpräsident | Yousaf Raza Gillani | ||||
| Flächi | 803.940 km² (35.) | ||||
| Iwohnerzahl | 162.419.946 (Stand 2005) (6.) | ||||
| Bevölcherigsdichti | 198 Iwohner pro km² (38.) | ||||
| Währig | Pakistanischi Rupie | ||||
| Zittzone | UTC+5 | ||||
| Nationalhymne | Pak sarzamin shad bad | ||||
| Kfz-Kennzeiche | PK | ||||
| Internet-TLD | .pk | ||||
| Vorwahl | +92 | ||||
 |
|||||
 |
|||||
Pakistan isch e Staat, wo am 14. August 1947 us dr mehheitlich muslimische Regione vu Britisch-Indie bildet worre isch. Sini Nachbäre sind Iran und Afghanischtan im Weschte, China im Norde, und Indie im Oschte. Na in Britisch-Indie händ sich d'Muslim unter em Ali Jinnah zämegschlosse und scho früe en eigene muslimisch-indische Staat gwünscht. Im Jahr 1947 isch denn die Trennig cho. Sie isch aber sehr bluetig gsi. Bsunders ide ethnisch gmischte Provinz Pandschab isch es zu grosse Bevölkerigsuustusch cho. Sikhs sind in Millione nach Indie uusgwanderet oder gflohe, Muslim sind us ganz Indie und us de Provinz Pandschab nach Pakistan uusgwanderet oder gflohe.
Hauptsprach sind Urdu und Englisch worde. Urdu isch eigentli Hindi mit arabische Buechschtabe. Englisch isch us de Ziite von de Engländer sehr präsent. Urdu wird aber nur vo de muslimische Iiwanderer us Indie gschproche. Die iiheimische Schprache sind Pandschabi (40%) i de Provinz Pandschab, Sindhi (15 %) i de Provinz Sindh im Süde, Paschto (15%) im Weschte und Belutschisch (4%) i de Provinz Belutschistan. Andere Schprache werded na ganz im Nordoschte gschproche. Pakistan isch aber nach 1947 sehr es zerrissenigs Land gsi. Des isch eimol d Indus-Region (West-Pakistan) gsi un uf dr andere Site s Delta vum Ganges un Brahmaputra (Ost-Pakistan). Dezwische sin 2000 Kilometer mehrheitlich hinduistischs Indie gläge. D Hauptstadt vu dem Staatsgebilde isch in Westpakistan gläge, d Bevölchrigsmehheit aber in Ost-Pakistan gsi, wo sich immer wiider benoochdeiligt gfüehlt het. Im damalige Ostpakistan hät d'Bevölkerig aber nur Bengalisch gsproche. Sie händ Urdu nöd verschtande und händ ihri eigeni Gschicht. Das und die grosse Dischtanze händ grossi Problem bracht zwüsched dene zwei Landesteili.
Nooch em indisch-pakistanische Chrieg 1971 isch Ost-Pakistan als Bangladesch mit Hilf vo Indie unabhängig worre.
Bi dr Deilig vu Britisch-Indie in e islamische un e hinduistische Staat isch es au zueme "Bevölcherigsusdusch" chumme, wo die bisher grösst Vertriibig in dr Menschheitsgschichte gsi isch mit an die 20 Millione zwangsumgsiidelte Lüt. Das sind Sikhs und Hindus gsi. Im Gägezug sind Muslim von Indie nach Pakistan cho. En prominente Pakistani, der ehemaligi Präsident, Pervez Musharraf isch in Dehli, der Hauptschtadt vo Indie uf d'Welt cho. Er isch aber scho als Chind nach Pakistan cho.
Grossi Spannige zwüsched Indie und Pakistan beschtönd wege de umschtrittene Provinz Kaschmir. Die hät sich 1947 Indie aagschlosse gha. D'Bevölkerig isch aber mehrheitlich muslimisch. Pakistan hät darum die Provinz ebefalls beaschprucht. Sie hät denn Kaschmir zumene Teil besetzt. Zwüsched de beide Länder isch es siit dem immer wieder zu Chrieg cho. Pakistan unterschtütz au Rebellebewegige in Kaschmir.
Haupstadt vu Pakistan isch sit 1958 Islamabad. Vorher isch die gröschti Stadt vo Pakistan, Karachi, ganz im Süde, d'Hauptstadt gsi. Islamabad isch ganz noi baut worde.
Pakistan isch fascht ganz muslimisch, es lebed aber ganz verschiedeni Mensche und Kulture i dem Land. Im Weschte, im Gebirge a de Grenze zu Afghanischtan lebed vili Paschtune. Sie spreched Paschto. Sie sind au e grossi Minderheit im Nachbarstaat Afghanischtan. D'Regierig kämpft i de Grenzgebiet gege muslimische Extremischte. Im Südweschte lebed Belutsche, sie sind au im Iran z'finde. Aber au wenigi Chrischte und Hindus gits na in Pakischtan. Sie lebed vor allem in Lahore und in Karachi.
 Wenn dr meh züe dem Thema weisch, no schrib s dezüe und entfern nochher d Markierig {{Stumpen|1}}.Wenn de no nie e Stumpe erwitert häsch, no findsch do Hilf dezüe. |
