Ganges

Us der alemannische Wikipedia, der freie Dialäkt-Enzyklopedy
Hops zue: Navigation, Suech
de Ganges bi Rishikesh

De Ganges (skt. गंगा oder गङ्गा, Gaṅga f.) isch ann vo de wichtigte Flüss vo Indie und Bangladesch und ghört zu de sibe hailigste Flüss vom Hinduismus. Sini Quele liget im Himalaya und er flüsst in Bengalische Golf. Sini Längi bitrait 2511 Kilometer.

Flusslauf[ändere | Quälltäxt bearbeite]

De Ganges entspringt im mittlere Himalaya. De obersti Lauf bis zum Zämefluss vom Alaknanda werd aber Bhagirathi gnennt. Im Bergland flüsst er geg Südweste und verloot den de Himalaya bi Haridwar, wo aini vo de sibe hailige Stätte am Ganges isch. Denn flüsst de Ganges imene grosse Boge südwärts und denn ostwärts. Z Bengale wendet er sich geg Süüde und bildet denn z Bangladesh zäme mit de Ärm vom Brahmaputra und em Meghna ais vo de grösste Flussdelta weltwiit, wo in Golf vo Bengale mündet.

Am Fluss liget meriri wichtigi Städt. Am Zämefluss mit de Yamuna lit Allahabad und witer flussabwärts Varanasi, eini vo de hailigste Städt vo Indie. Im indische Staat Bihar lit Patna und am ene Siitearm am Westrand vom Gangesdelta lit Kalkutta (Kolkata).

Religiösi Bidüütig[ändere | Quälltäxt bearbeite]

de Ganges bi Varanasi

Im Hinduismus isch d Ganga e Göttin und zält zu de hailigste Flüss, nebet de Yamuna und de Sarasvati, wo hüt nüme lokalisiert werde cha. D Ganga entspring im Himmel und stürzt imene Wasserfall uf d Erde. De Shiva fangt si uf sim Chopf uuf, well sus d Erde vo de Wucht vom Wasserfall zertrümmered wör. Dargstellt werd d Ganga as e jungi Frau ufemene Gangesdelfin oder ufeme Makara, emene krokodilartige mythische Wese.

Am Fluss liged meriri religiösi Stätte, wo i de Regle em Shiva ghailigt sind, do d Ganga as Nebefrau vom Shiva gelt. Zu de bikannte Orte ghöret im Himalaya Rishikesh und underhalb devo Haridwar. Allahabad het sini Bidütig well do d Yamuna, und noch ainige Traditione au die nödsichtbari Sarasvati, zämeflüüset. Em bikanntiste isch Varanasi, bikannt för sini grosse Liicheverbrennigsplätz. Wer i de Ganga badet, werd vo Sünde und schlechtem Karma grainigt.

Nutzig[ändere | Quälltäxt bearbeite]

De Ganges isch enorm wichtig för d Biwässerig vom Land und dient au Milione vo Mensche as Trinkwasserresource. Allerdings isch s Wasser vom Fluss üsserst dreckig und bsunders im Underlauf mit Industriiabwasser öberbilastet. Do d Kapazität vo de Liicheverbrennigsplätz z Varanasi nüme lenget, werdet d Liiche nöm vollständig verbrennt und denn mitsammt de Äsche in Fluss grüert, wa zu de Verbraitig vo Chrankete füert.