Burkina Faso

Burkina Faso Burkina Faso
Wahlspruch: Unité, Progrès, Justice (frz., „Eiheit, Fortschritt, Grächtigkeit“)
Amtsschpraach(e)	Französisch
Hauptschtadt	Ouagadougou
Schtaatsform	Republik
Schtaatsoberhaupt	Blaise Compaoré
Regierigschef	Premierminister Tertius Zongo
Flächi	274.200 km²
Iiwohnerzahl	13.730.258 (Zensus 2006)
Bevölkerigsdichti	51 Iiwohner pro km²
BIP/Iiwohner	411 US-$ (2005)
Währig	CFA-Franc BCEAO
Unabhängigkeit	vo Frankriich am 5. August 1960
Nationalhymne	Le Ditanyè
Ziitzone	UTC
Kfz-Kennzeiche	BF
Internet-TLD	.bf
Vorwahl	+226

Burkina Faso ([bʊrˌkiːnaˈfaːzo]; dütsch: „Land vo de Ufrächte“) isch ä Schtaat in Weschdafrika. S Land isch bis 1960 under französischer Kolonialherrschaft gsi und het sit em Afang vo siiner Unabhängigkeit bis 1984 Obervolta gheisse.

Dr Binneschtaat lit in de Savanne vom sudanische Hochplateau, het im Norde Deil am Sahel und gränzt an Mali, Niger, Benin, Togo, Ghana und d Elfebeichüschde. Burkina Faso ghört zu de ärmschte Länder uf dr Wält, zeichnet sich hüte aber dur ä gwüssi Schtabilität und die kulturelli Vilfalt vo siine Ethnie, wo friidlig zsämmeläbe, us. D Mossi si öbbe d Hälfti vo der Bevölkerig. Rägelosi Periode, wo mit groosser Hüfikeit widrchömme, verursache mänggisch groossi Not bi dr Bevölkerig, wo hauptsächlig vom Buure läbt.

Dr Präsident isch sit 1987 dr Blaise Compaoré, wo s Land sit em Putsch gege dr panafrikanisch-sozialischtisch orientierti Thomas Sankara semiautoritär regiert und es schtabils wirtschaftligs Umfäld gschaffe het. Burkina Faso organisiert under anderem s panafrikanische Filmfestival FESPACO us, wo alli zwei Johr stattfindet.

Etymologii

Der Name Burkina Faso isch zweischbrööchig; Burkina isch Moré und bedütet öbbe „dr Unbeschtächlig, dr Integer, dr Ufrichtig“. Faso schtammt us dr Schbrooche Dioula und heisst „Vaterland“ (fà: „Vater“, só: „Haus, Dorf'“). Burkina Faso bedütet aso wörtlig „s Vaterland vo de ufrichtige Mensche“. D Bewohner vo Burkina Faso nenne sich Burkinabè, wobii das Wort nit flektiert wird. D Pluraländig -bè isch us dr dritte Hauptschbrooch vom Land, em Fulfulde (d Schbrooche vo de Fulbe), gnoh. Im amtlige dütsche Schbroochgebruch isch d Iiwohnerbezeichnig Burkiner vorgschriibe; Kritiker säge, ass eso der Wunsch vo de Burkiner, ass mä au in Fremdschbrooche ihri Eigebezeichnig wurd bruuche, übergange wurd. Burkinabe wird mänggisch as Synonym in nitoffizielle Teggschd bruucht.

Quälle

Dä Artikel basiert uff ere fräie Übbersetzig vum Artikel „Burkina_Faso“ vu de dütsche Wikipedia. E Liste vu de Autore un Versione isch do z finde.