Fidschi

Us der alemannische Wikipedia, der freie Dialäkt-Enzyklopedy
Matanitu Tu-Vaka-i-koya ko Viti (Fidschi)
फ़िजी गणराज्य (Hindustani)
Republic of the Fiji Islands

Republik Fidschi-Insle

{{{ARTIKEL-FLAGGE}}}
{{{ARTIKEL-FLAGGE}}}
{{{ARTIKEL-WAPPEN}}}
{{{ARTIKEL-WAPPEN}}}
Wahlspruch: Rerevaka na Kalou ka Doka na Tui

(Fidschi: für „Heb Furcht vor Gott und Ehr für d Königin“)

Amtsspraach Fidschi, Hindustani und Änglisch
Hauptstadt Suva
Staatsoberhaupt Ratu Epeli Nailatikau
Regierigschef Frank Bainimarama
Flächi 18.333 km²
Iiwohnerzahl 827.900 (Stand: 16. Septämber 2007, Census 2007)
Bevölkerigsdichti 45,16 Iiwohner pro km²
Bruttoinlandsprodukt nominal (2007)[1] 3.409 Mio. US$ (Rg. 145)
Brutto­inlands­produkt pro Iiwohner 3.921 US$ (Rg. 86)
Human Development Index 0,741 (108.)[2]
Währig 1 Fidschi-Dollar = 100 Cents
Unabhängigkeit vom Vereinigte Königriich am 10. Oktober 1970
Nationalhimne Meda Dau Doka/(God Bless Fiji)
Zitzone UTC+12
Kfz-Kennzeiche FJI
Internet-TLD .fj
Vorwahl +679

Fidschi (uf Fidschi: Matanitu Tu-Vaka-i-koya ko Viti, ängl.: Fiji Islands) isch en Inselstaat im Südpazifik nördlig vo Neuseeland und östlig vo Australie. Fidschi isch sit 1970 unabhängig und sit 1987 e Republik mit dr Hauptstadt Suva uf dr Insle Viti Levu.

Geografii[ändere | Quälltäxt bearbeite]

Fidschi isch en isolierti Inselgruppe im Südwestpazifik und lit öbbe 2'100 Kilometer nördlig vo Auckland, Neuseeland. Vo Dütschland bruucht mä öbbe 20 Stunde zum uf Fidschi zfliege. D Küste isch im Ganze 1'129 Kilometer lang. Dr Archipel bestoht us 332 Insle mit ere Gsamtflechi vo 18'333 Quadratkilometer. 110 vo de Insle si bewohnt. Usserhalb vom Fidschi-Archipel ghört no d Insle Rotuma im üsserste Norde und s Atoll Ceva-i-Ra im üsserste Südweste zum Staatsgebiet vo Fidschi.

D Hauptinsle Viti Levu (10'429 km²) und Vanua Levu (5'556 km²) umfasse fast nüün Zähntel vo dr Landflechi und ihre Ursprung isch wie dä vo de meiste vo de Fidschiinsle vulkanisch, die chliinere Insle si us Koralleriffe entstande. Uf de beide grosse Insle lige zerklüfteti Gebirgschettene, umgee vo schmale Küstenebene und vorglagerete Koralleriff. Dr höchst Bärg isch mit 1.324 Meter dr Mount Victoria (hütig Name: Tomanivi) uf Viti Levu. Näbe Viti Levu und Vanua Levu si no Taveuni (470 km²), Kadavu (411 km²) und Gau und Koro (je 140 km²) von ere gwüsse Grössi.

S Klimadiagramm vo Suva

Es herrscht e dropisch-heissfüechts Klima mit Tämprature vo 16 bis 32 Grad Celsius. In dr niiderschlagsriichere Summerzit vom Novämber bis zum April git s dropischi Wirbelstürm (Zyklone) im Südpazifik. Statistisch wird d Inselgruppe in 10 Johr vo 10 bis 12 Wirbelstürm bedroffe, zwei bis drei drvo verursache schweri Schäde. In de Wintermönet vom Mai bis zum Oktober bringe beständigi Südostwind chüehleri Luft. Die drifft uf warmi äquatoriali Luft (South Pacific Convergence Zone) und verursacht Wolkebildig und Räge. Die Wätterlage, wo dur Passatwind verursacht wärde, bringe bsundrigs an dr bärgige, dicht bewaldete Südostküste vo dr Hauptinsle (Viti Levu) starke Räge. Die westlige Häng mit lichtem Baumbestand und Grasland si wäsentlig drochener. Über zwei Drittel vo dr Landflechi vo Fidschi si bewaldet und nume e chliine Deil si Matte.

Die grösste Stedt si (Stand 16. Septämber 2007): Nasinu 75'719 Iiwohner, Suva 75'225 Iiwohner, Lautoka 44'143 Iiwohner, Labasa 33'397 Iiwohner, Nausori 24'630 Iiwohner und Nadi 11'871 Iiwohner.

Bevölkerig[ändere | Quälltäxt bearbeite]

D Bevölkerig vom Land bestoht zu 57 % us Aaghörige vo dr ursprünglige melanesische Bevölkerig und zu öbbe 37 % (schwankend) us Inder. Sit em Johr 1987 hai e Hufe Inder Fidschi verloo. Im Jahr 1996 hai sich 58 % vo de Iiwohner als Christe, 34 % as Hindu und 7 % als Muslim bezeichnet.

D Amtssprooche si Fidschi, wo zu de austronesische Sprooche zelt, Hindustani und Änglisch. Die indischstämmigi Bevölkerig schwätzt Fidschi Bat (au Fiji Talk), e Variante vom Hindustani, wo au Amtssprooch isch.

Öbbe 32 % vo dr Bevölkerig vom Land isch under 14 Johr alt, 65 % zwüsche 15 und 64 und 4,5 % isch über 64 Johr alt. D Wachstumsroote isch 2006 knapp 1,4 % gsi, bin ere Geburteroote vo 22,55 Geburte pro 1000 Iiwohner und Johr und ere Dodesroote vo 5,65 pro 1000 Iiwohner und Johr. D Läbenserwartig lit bi dr Geburt bi öbbe 69,9 Johr (67,3 für Manne, 72,5 für Fraue).

Fuessnote[ändere | Quälltäxt bearbeite]

  1. International Monetary Fund, World Economic Outlook Database, April 2008
  2. Human Development Index

Weblingg[ändere | Quälltäxt bearbeite]

 Commons: Fidschi – Sammlig vo Multimediadateie



Koordinate: 18° S, 179° O