Madagaskar

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Repoblikan’i Madagasikara (mad.)

République de Madagascar (franz.)
Republik Madagaskar

Fahne vu Madagaskar
Wappe vu Madagaskar
Fahne Wappe
Wahlspruch: Tanindrazana, Fahafahana, Fandrosoana
Amtspraach Malagasy, Franzesisch
Hauptschtadt Antananarivo
Schtaatsform Republik
Schtaatsoberhaupt Bresidänt Hery Rajaonarimampianina
Regierigschef Premierminischter Olivier Mahafaly Solonandrasana
Flächi 587.041 km²
Iiwohnerzahl 23.571.713[1]
Bevölkerigsdichti 37 Iiwohner pro km²
Bruttoinlandsprodukt
  • Nominal
2012[2]
  • 10.545 Mio. US-Dollar
Bruttoinlandbrodukt 471 US$
Human Development Index 0,498 (155.)[3]
Währig Ariary (MGA)
Unabhängigkeit 26. Juni 1960 (vu Frankrych)
Nationalhymne Ry Tanindrazanay Malala ô
Zitzone UTC +3
Kfz-Kennzeiche RM
ISO 3166 MG, MDG, 450
Internet-TLD .mg
Vorwahl +261
LocationMadagascar.svg
Madagascar map.png

Madagaskar (amtlig Republik Madagaskar, [madaˈgaskʰar], madagass. Repoblikan’i Madagasikara, frz. République de Madagascar [madagasˈkaːʀ]) het rund 23,6 Millione Yywohner (Stand 2014) un isch mit ere Flechi vu 587.295 Quadratkilometer no Indonesie dr vu dr Flechi här zweetgrescht Inselstaat uf dr Wält. S isch e Bresidialrepublik un lyt vor dr Oschtkischte vu Mosambik im Indischen Ozean. S het e Kischtelengi vu rund 4828 Kilometer.

Geografy[ändere | Quälltäxt bearbeite]

Di grescht Landflechi vum Staat Madagaskar wird dur di glychnamig Insle, di viertgrescht vu drWält, yygnuu, wu au dr „acht Kontinänt“ gnännt wird, wei dur e langi isolierti Entwicklig e seli aigeständigi Natur entstanden isch. Madagaskar isch vor 150 Millione Johr vu Afrika un vor 90 Millione Johr vum indische Subkontinänt drännt wore.

S zäntral Madagaskar isch e Hochebeni mit durschnittlige Hechine vu 1100 Meter. S gheit no Oschte gäch ab, derwylscht drAastiig imWeschte schlääner isch. S Platoo gipflet im Maromokotro, em mit 2876 Meter hechschte Bärg vu dr Insle.

Geology[ändere | Quälltäxt bearbeite]

Zwai Drittel vu dr Insle wäre vu präkambrische Gstai ufböue, wu meefach, zletscht bim Enstoh vu Gondwana vor 540 Millione Johr, deformiert un metamorph bregt wore sin.[4]

Im usserschte Oschten um d Bucht vu Antongil un bi Mananjary sin archaischi Gnais mit eme Alter vu rund 3,2 Milliarde Johr ufgschlosse, wu mit idäntische Gstai im Dharwar-Kraton z Wescht-Indie korreliert wäre. Dodra schließt si no Weschte ne schmali Zone mit hochmetamorphe Sedimäntgstai un Basalt aa, wu Iberräscht vun eme ehmolige Ozeanbecki dokumäntiere, wu am Änd vum Präkambrium subduziert woren isch. S zäntral Hochland wird vu spotarchaische Granit un Gnais ufböue, wu drei großi, rohstoffrychi Grienstaigüitel din yygfaltet sin..[5]

Im Side vu dr Insle drätte Gstai us em Mittelproterozoikum uf, wu bsundersch hoche Metamorphose-Tämperature vu iber 1000 °C uusgsetzt wore sin.[6] Im nerdlige Dail vu dr Insle het s jungproterozoischi Vulkanit, Granit un Sedimäntgstai vun eme Inselboge, wu erscht im Kambrium aaglideret oren isch.[7]

S weschtli Drittel vu dr Insle wird dur flachi Sedimäntgstai ufböue, wu s Alter vum oberstche Karbon bis in d Chryyde goht. D Gstai,wu lokal Chohle fiere, sin vum Oberkarbon bis in d Trias in intramontane Beckine abglageret wore. Erscht im Jura isch dr Mosambik-Kanal ufgange, doderdur isch e Zuegang zum uffige Ozean entstande.[8]

Bi dr Drännig vu Indie vu dr Oschtkischte vu Madagaskar in dr Oberchryyde sin großi Mängine Basalt uffechuu, wu am e schmale Kischtenstraife lang guet ufgschlosse sin. Vulkanischi Aktivitete leen si vum Neogen bis ins Pleistozän fir s zäntral Hochland (mit em Vulkanfäld Ankaratra), dr Norde vu dr Insle (Vulkanfäld Ankaizina un dr Schichtvulkan Ambre-Bobaomby) un di nordweschtli vorglagerete Insle Nosy Be un Nosy Mitsio noowyse.

Klima[ändere | Quälltäxt bearbeite]

Madagaskar lyt im tropische Klima vum Sidäquatorialstrom. D Niderschleg näme vu Oscht no Sidwescht kontinuierlig ab. An dr Weschtkiscte het s dailwys nume 500 Millimeter pro Johr, derwylscht s an dr Oschtkischte regional bis zue 4.000 Millimeter chenne syy. D Johresdurschnittstämperatur lyt bi 25 °C, doderby lige d Tämperaturen an dr Kischte hecher un chennen im Landesinnere im Hochland bis unter dr Gfrierpunkt sinke. Summer un Winter entspräche dr tropische Rägen- un Druckezyt. Fasch all Johr het s Zyklon.

Ekology[ändere | Quälltäxt bearbeite]

Madagaskar zellt zue dr „eltere Insle“. Eso wären Insle gnännt, wu syt eme lange geologische Zytruum vum Feschtland drännt sin. Do cheme vylmol Dier- un Pflanzenarte vor, wu s sunscht niene uf dr Ärd git. Vu dr rund 12.000 Arte vu Blietepflanzen un dr 109 Suugetrarte sin je 80 Prozänt, vu dr 250 Vogelarte rund d Helfti, vu dr 260 Reptilienarte 95 Prozänt un vu dr 150 Froscharte alli endemisch.[9] Die ainzigartig Pflanzen- un Dierwält isch uf Madagaskar bsundersch bedroht. S Verschwinde vu vyl Dierarte chunnt syt dr Bsidlig vum Wachstum vu dr Bevelkerig, vu dr Jagd, vu dr Viihaltig, wu all mee wird, em Abböu vu Tropehelzer un vu dr Brandryti. Drei Fimftel vu dr Tropische Rägewälder sin uf die Art scho in Savanne bzw. Sekundärwälder verwandlet wore. Urspringlig isch Madagaskar zue 90 Prozänt bewaldet gsii. Vu dr 53 Millione Hektar Wald sin hite nume no zeh Prozänt ibrig.[10][11]

In dr madagassische Verfassig isch Umwältschutz as Staatszyyl feschtgschribe. D Flechi vu dr Naturschutzbiet soll noch eme Regierigsplan verdreifacht wäre. S git 47 offiziälli Naturpark z Madagaskar. D Dursetzig vu dr Naturschutzbiet giltet aber as schwirig. Dr Masoala-Nationalpark isch zum Byschpel langi zyt nume uf em Bapier gstanden un isch vu dr Mänsche vor Ort abglähnt wore. Mediebricht un NGO-Reschersche hän zaigt, ass in großem Styl wyter Edelhelzer (Palisander, Roseholz) uf Madagaskar gschlaa wären un uf em internationale Määrt lande.[12][13]

Flora[ändere | Quälltäxt bearbeite]

D Insle isch vor di erschte Sidler yydroffe sin, wahrschyns fascht ganz mit Wald deckt gsii. In dr kischtenoche Zone het s e tropische Dieflandrägewald gee, wänn dr Niderschlag glängt het. Vu dr urspringlicge Rägewälder sin nume ni vier Brozänt erhalte. Di greschte Rägewaldflechine, wu no zämehange, het suf dr Masoala-Halbinsle. Vu Oschte no Weschte goht dr Rägewald nodno iber d Fychtsavanne in d Drucke- un im Side au Dornsavanne iber.

Fascht 90 Brozänt vu dr Insle sin nume no vu sekundäre Savanne deckt, Widerufforschtigsversuech sin bishär fascht ganz erfolglos gsii, e natirligi Rekultivierig vu dr Brochflechine dur dr Wald findet fascht nit statt. Drotz gsetzlige Verbot wären all Johr rund 50 Brozänt vu dr Savanne vu Viihirte abbrännt, doderudr entstoht en extrem verarmti sekundäri Savanne mit resischtänte, aber nehrstoffarme Greser wie Aristida sp..[14]

Fauna[ändere | Quälltäxt bearbeite]

d Katta, di bekanntescht Lemurenart

Dur sy langi geografischi Isolation git s uf Madagaskar en ainzigartifi Fauna un Flora mit eme seli hochen Aadail vu endemischen Arte. D Raubdier sin uf Madagaskar nume nur Eupleridae verdrätte, d Fossa, d Fanaloka un dr Falanuk. Uf dr Insle fähle derzue au Affen un Giftschlange. Diergruppe wie d Lemure git s dergege nume do.

En anderi Diergruppe, wu fascht uusschließli nume uf Madagaskar git, sin d Tenrek. D Tenrek un au d Lemure gälten as klassischi Byscpel vun ere Adaptive Radiation.[15] D Vorfahre vu bode Diergruppe hän die Region scho bsidlet ghaa, wu si Madagaskar vum afrikanische Kontinänt abgspalte het. Im Lauf vu dr Zyt hän si die Dierfamilien in e Huffe Arte ufgspalte, wu unterschidligi ekologischi Nische bsetzt hän.

Vu dr wältwyt 22 Lappedaucherarte hän zwai nume uf Madagaskar ihri Haimet. Dr Delacour-Zwärgdaucher giltet mittlerwyli as uusgstorbe. Dr Madagaskar-Zwergdaucher wird vu dr IUCN as gfehrdet yygstapflet. D Bernieränte, wu hite zue dr sältenschte Wasservegel vu d Wält ghert, isch en ander Byschpel vun ere Sezies, wu nume uf Madagaskar vochunnt.

Zur Zyt sin rund 250 Amphibien-Arte bschribe. Dodrunter stelle d Madagaskarfresche dr grescht Dail; di ibrigen Arten ghere vor allem zue dr Ängmuul- un dr Riedfresche. Zur Zyt wärem all no neii Arten entdeckt. Derwylscht glychzytig ihre Lääbesruum waidli gschlisse wird.

D Familie vu dr madagassische Rägebogefisch (Bedotiidae) mit 14 wisseschaftli bschribene Arte chunnt im Sießwasser im Oschtdail vu dr Insle vor. E Huffe dervu sin vu dr IUCN zmindescht as „gfehrdet“ glischtet. Wahrschyns git s au no mee Arte, wu aber nonig bschribe sin.

Madagaskar het friejer emol en uusbregit Megafauna ghaa, wu in dr Zwischezyt aber alli uusgstorbe sin, wie di gwaltige Elifantevegel, verschideni Arte vu Riselemure, zum Byschpel Megaladapis un Palaeopropithecus un drei Arte vu madagassische Flusspfärd.

Bevelkerig[ändere | Quälltäxt bearbeite]

Ethnie[ändere | Quälltäxt bearbeite]

Hauptwohnbiet vu dr foko um 1839

Di maischte ethnische Madagasse hän iber di gmainsam Sproch, Malagasy, e gmainsami Identitet uusebildet. Di gsellschaftlige Inschtituzionen un Tradizionen unterschaide si aber dur verschideni Untergruppe, d Foko, zimli.[16] Dr madagassisch Staat erkännt offiziäll 18 vu sonige „Hauptethnie“ aa.[17] D Merina, wu bis Ändi 19. Johrhundert im Zäntrum un Sidweschte vum Land ihre aige Staatswäsen unterhalte hän, wu si anderi Foko unterdruckt hän, isc di grescht vu däne Gruppe. Um 1970 hän si rund 1,6 Millione Persone zellt.[18] D Betsileo, wu um 1830 vu dr Merina unterworfe wore sin, hän e ähnligi Lääbeswyys wie sälli un dryybe vor allem Bewässerigsackerböu, hän aber nume halb so vyl Mitglider.[19] D Betsileo hän en effiziäntere Ryysaaböu entwicklet, derwylscht d Merina mee Gieter produziere.[19] D Zafimaniry, e Untergruppe vu dr Betsileo, sin fir ihri Holzschnitzchunscht bekannt, wu anne 2003 vu dr UNESCO in d Lischt vu dr Maischterwärch vum mindlige un immatriälle Erb vu dr Mänschhait ufgnuu wore isch.

Anderi Foko, wu im 19. Johrhundert vu dr Merina unterworfe wore sin, sin d Sihanaka un d Bezanozano, wu um 1970 135.000 bzw. 44.000 Mitglider zellt ghaa hän.[20] Zäme mit dr Tsimihety (1970: 428.000 Lyt) un dr Tankarana, wu nit staatlig as Foko anerkännt sin, dryybe die Gruppe ne Mischig us Landböu un Gartnere.[20] D Sihanaka sidle vor allem im zäntrale Hochland vu dr Insle.[21]

D Antakaran̈a, dr zweetchlaischt Foko, wu im 17. un 18. Johrhundert as aigeni Gruppen entstande isch, lääbe vor allem im Nordweschte vu dr Insle.[22]

D Antaimoro, wu si in ere Tradizionslinie mit dr im 15. Johrhundert yygwanderete Muslim sääne un d Adelskaschte vum Chenigrych Antaimoro gstellt ghaa hän, wu im 16. Johrhundert entstanden un 1894 ufglest woren isch, sidle vor allem im Kischteberych sideschtli vu Ikongo.[23]

D Antaifasy lääbe vor allem an dr Sidoschtkischte.[24]

Anderi staatlig anerkännti Foko sin d Antaisaka, d Antambahoaka, d Antandroy, d Antonosy, d Bara, d Betsimisaraka, d Mahafaly, d Sakalava, d Tanala un d Vezo

Derzue git chlaineri Gruppe wie d Jeger un Sammler vu dr Mikea,[25] wu zwische An̈alabo un Lac Ihotry ihri Haimet hän.[26]

Näbe dr Madagasse läbt e großi Zahl vu Uusländer uf dr Insle, vor allem Komorer un der Franzose, in jingerer Zyt aber au e Huffe Chinesen un Inder.[27]

Sproche[ändere | Quälltäxt bearbeite]

Madagaskar isch vor allem dur di gmainsam Sproch Malagasy gaint, wu vu dr Meehait vu allne Madagasse gschwätzt wird. En Uusnahm bilde di in e baar Weschtkischtderfer yygwanderete Mosambikaner, wu Makoa schwätze, un d Mänsche uf Nosy Be, wu s bilinguali Swahili-Schwätzer git.[28]

Näbe Malagasy isch Franzesisch Amtssproch. Di wichtigschte Publikatione chemme uf Franzesisch uuse. Vu 2007 bis 2010 isch au Änglisch Amtsproch gsii.

Religion[ändere | Quälltäxt bearbeite]

Verdailig vu dr Religione:[29]

D Ahneverehrig ghert fir fascht alli Madagasse zue ihre Religion. Au d Vorstellig vu „Fady“, feschtglaite Regle, was mer an bstimmte Ort oder zue bstimmte Zyt nit derf mache, isch au unter offiziäll chrischtlige oder muslimische Madagassen gängig. Wel bi konfessionsverschidene Ehe ain vu dr baide Partner offiziäll d Religion vum ander ibernimmt, mueß mer vorsichtig syy bi dr Interpretazion vu däne Zahle.

Gschicht[ändere | Quälltäxt bearbeite]

Friegschicht[ändere | Quälltäxt bearbeite]

Charte vu dr auschtronesische Expansion

No dr madagassische Mythology isch di afrikanisch Insle zerscht dur e hällhytig „Zwärgevolk“, d Vazimba, bewohnt wore. E Dail Madagasse glaube, ass die Uryywohner allno im diefe Wald lääbe. Uf dr Insle, wu d Yywohner Ahnekult praktiziere, wäre d Vazimba as di eltschte Ahne verehrt. D Chenig vun e Dail Foko bhaupte, si dieje in ere diräkte Verwandtschaft mit dr Vazimba stoh.

D Archäologe gehn vun ere Aachumft vu dr Mänschen uf dr Insle zwische 200 un 500 no Chrischtus uus. Doderno sin di erschte Yywohner vu Madagaskar Seefahrer vu Sidoschtasie gsii, vermuetli vu Borneo oder Sid-Celebes. Die urspringlige Madagasse mit ihren Uuslegerkanu händ Insle im Zug vu dr große auschtronesische Expansion bsidlet, wu zue dr Bsidlig vum malaiische Archipel, vu Neiseeland, vu Polynesien un Mikronesie gfiert het. S git kai Beleg derfir, ass Indonesier d Oschtkischte vu Afrika kolonisiert hän. Di erschte Yywohner vu Madagaskar sin schyns diräkt iber dr Indisch Ozean vu Indonesie chuu: noch ere Rais vu 5.000 km. Zäme mit Neiseeland bildet Madagaskar di letscht vu Mänsche bsidlet Landflechi. Dr Ethnolog[Jared Diamond bschrybt di auschtronesisch Expansion uf Madagaskar eso:

Die Auschtronesier mit ihre auschtronesische Sproch un modifizierte auschtronesische Kultur hän scho uf Madagaskar gläbt, wu d Insle 1500 vu dr Europäer bsuecht woren isch. Des schynt mir di as di erstuunlichtscht Tatsach vu dr Humangeografy vu drWält. S isch, wie wänn dr Columbus bi dr Landig uf Kuba d Insle mit blonde blauäigige Skandinavier vorgfunde hätt, wu Schwedisch gschwätzt hän, drotz ass dr noch nordamerikanisch Kontinänt vu indianischsprochige Indianer bewohnt isch. Wie isch s megli, ass Mänsche vu dr prähistorische Kultur vu Borneo uf Boot ohni Charte un Kompass hän chenne uf Madagaskar chuu?

In Technology un Landwirtschaft wyyse d Madagasse e Hufe gmainsami Merkmol mit dr Indonesier uf. D Methode vum Ryysaaböu glyychen enander. Wie d Indonesier bruuche d Madagasse Uuslegerkanu (Katamaran). Boodi Kulture praktiziere dr Ahnekult un glaube, ass Doti ne Yyfluss uf di Läbige hebe. Andersch wie ihri Nochbere uf em afrikanische Kontinänt, wu Rundhitte bevorzuge, lääbe d Madagassen in viereckige Wohngebei. Si näme zum Schmiide vu Yyse Zwooklappebälg, e malaysischi Erfindig. Si lege Duech aa us Pflanzefasere oder gspunnenem Raffiabascht, un nit Lääder, Fäll oder Wulle wie d Afrikaner oder d Europäer. Aagherigi vu dr Merina, em greschte Foko z Madagaskar, glyyche dr Indonesier im Uussääne seli stark.

D Yywanderig vu dr Bantu un Araber[ändere | Quälltäxt bearbeite]

Ass di mittelalterlige arabischen Seefahrer un Geografe Madagaskar gchännt ghaa hän, isch langi Zyt umstritte gsii. Dur d Uusgrabige z Mahilaka isch aber e Handelsstadt mit Moschee un Staigebei belait wore, wu vum zehte bis zum 14. Johrhundert bliet ghaa het. D Insle isch as Phebol, Cernea, Menuthias, Medruthis, Sherbezat, Camarcada oder Mondinsle bekannt gsii.

Dr Name Madagaskar stammt vum Marco Polo, em italienische Forscher, wu ne afrikanischi Insle mit unuussprächligem Ryychtum as Madeigascar bschribe het. Dr Marco Polo het vu däre Insle in Verzellige ghert ufsyne Raise dur Asie. Di maischte Glehrte nämen aa, ass er wohl Mogadischu bschribe het, dr Hafe vum hitige Somalia. Ainewäg hän di italienische Kartografe vu dr Renaissance dr Name Madagaskar fir d Insle brucht.

D Bantu-Sidler sin vermuetlig iber d Stroß vu Mosambik uf Madagaskar chuu, um d Zyt vu Aachumft vu dr Auschtronesier oder churz dernoo. Drotz ass d Meehait vu dr Werter in dr madagassische Sproch e malaiisch-polynesische Ursprung het, stamme ne baar us em Bantu, wie zum Byschpel omby (Rind), ondry (Schof) un anderi. E Dail Ethnologe sähn dodin dr Bewys, ass si indonesischi un Bantu-Sidler scho frie in dr Inselgschicht mitenander vermischlet hän.

D Bantu hän di chirbisähnlig Jejolava un di meesaitig Valiha mitbrocht, Musikinschtrumänt, wu hite di madagassisch Musik druf gspiilt wird. D Bantu hän au ne fir Oschtafrika aimolig Kulturmerkmal yybrocht: drViibsitz. Bsundersch in dr sidlige Savanne vu Madagaskar, wu di afrikanischen Yyfliss am sterkschte sin, wäre Ryychtum un soziale Status am Bsitz vu Vih gmässe; d Zahl vu dr Zebu lyt drei- bis vierfach eso hoch wie d Zahl vu dr Yywohner.

Aafangs 10. oder 11. Johrhundert sin an dr afrikanische Oschtkischte arabischi un sansibarischi Sklavehändler in ihre Dhau lang gfahren un hän si an dr Weschtkiscte vu Madagaskar nidergloo. Ihri hitige Noochuu bilde dr Foko Antaimoro an dr Sidoschtkischte in dr Nechi vu Manakara. Di arabische Yywanderer sin im Verglych mit dr Indonesier un dr Bantu e Minderhait gsii, hän aber en umso noohaltigeren Yyfluss uusgiebt: Di madagassische Name fir Johreszyte, Monet, Däg un Minze sin arabischer Härchumft, glych wie au d Bschnyydig, dr gmainsam Fruchtvorrot un verschideni Grueßformle. Arabischi Medizinmanne, Ombiasy gnännt, hän si as Richter bi ne Hufe madagassische Chenigtimer etabliert. Arabischi Yywanderer hän e patriarchal Familien- un Clansischtem z Madagaskar yygfiert.

Di Europäisch Kolonialisierig[ändere | Quälltäxt bearbeite]

Bis zum 15. Johrhundert isch dr Gwirzhandel iber muslimischi Händler vu Indien iber dr Noch Oschte zum Mittelmeer gange. Syter ass europäischi Frachtschiff s Kap vu dr guete Hoffnig umrundet ghaa hän, isch dr Gwirzhandel vu Indie diräkt uf Protugal verlofe. Dr portugiesisch Seemann Diogo Dias het anne 1500 as erschte Europäer sy Fueß uf madagassische Bode gsetzt, wu sy Schiff uf dr Fahrt uf Indie vum Kurs groten isch. In dr negschte zwaihundert Johr hän Ängländer un Franzosen erfolglos versuecht, d Herrschaft iber d Insle z gwinne.

Charte vu Fort Dauphin um 1650

Fieber, Dysentery, di fyndli madagassisch Bevelkerig un s hert drucke Klima z Sidmadagaskar hän anne 1646 dr änglischen Aasidlig bi Toliary (Tuléar) bal en Änd gsetzt. En anderi Sidlig im Norde z Nosy Be isch anne 1649 ufgee wore. Di franzesisch Kolony bi Taolañaro (Fort Dauphin), wu s syter anne 1643 im Side gee hetm het si lenger ghebt. No bal dryssg Johr isch s an dr Wynächte 1672 zue Uurueje unter dr aasässige Antanosy chuu. Si sin schyns wietig wore, wel vierzeh franzesischi Soldate vum Fort si vu ihre madagassische Frauen hän schaide loo, go franzesischi Frau z hyrote, wu in d Kplony gschickt wore sin, un hän dryzeh vu däne vierzeh franzeisce Bryt umbrocht. D Antanosy hän achtzeh Monet lang d Palisade vu Taolañaro belageret. E Schiff vu dr franzesisch-oschtindische Kompany hetschließli 1674 d dryssg Manne un ai Witfrau, wu iberläbt hän, uf d Insle Réunion evakuiert.

D Franzose hän no bis anne 1736 Handelsposchten in dr Baie d’Antongil im Norde bhauptet, ab 1750 derno d Insle Sainte Marie. In dr Zyt vu dr Herrschaft vum franzesische Chenig Ludwig XV. hän si 1766 s Fort Dauphin wider in Bsitz gnuu, hän s aber scho 1771 wider ufgee. In franzesische Dienscht het dr Abenteurer Moritz Benjowski 1774 wider d Atongil-Bucht erobere tun het dert Louisbourg grindet. E vu ihm grindet unabhängig Chenigrych isch aber scho 1776 vu Franzose vu Réunion vernichtet wore. Dr Benjowski het jetz Verbindeti z Europa gsuecht un het 1783 sogar em Chaiser Josef II. Madagaskar as eschtrychischi Kolony aabote, ohni aber finanziälli oder militerischi Unterstitzig z iberchuu. 1785 isch er uf Madagaskar retuurchuu un het versuecht, sy Chenigrych widerufzrichte, isch aber 1786 im Kampf gege franzesischi Druppe un däne ihri madagassischi Verbindeti gfalle.

Vu 1807 bis 1811 het s z Toamasina ne franzesische Handelsposchte gee, wu vu dr Brite gschlisse woren isch.

Piraten un Sklavehändler[ändere | Quälltäxt bearbeite]

Piratefridhof uf Sainte Marie

Zwische 1680 un 1725 isch Madagaskar e Piratestitzpunkt gsii. Bekannti Pirate wie dr Kapitän William Kidd, dr Henry Every, dr John Bowen un dr Thomas Tew hän d Antongil Bay un Sainte Marie (Nosy Boraha), e chlaini 15 km vor dr Nordoschtischte vu Madagaskar glägeni Insle, zue ihre Basis gmacht. D Pirate hän Handelsschiff im Indischen Ozean, Rote Meer un persische Golf plinderet. Si hän di fir Europa beladene Handelsschiff mit ihre Syyde-, Duech-, Gwirz- un Juwelefracht uusgraubt. Schiff, wu in dr umgchehrte Richtig uf Indien gfahre sin, sin wäge ihre Minze un dr Gold- un Silberschetz iberfalle wore. Zyyl vu dr Pirate sin di indische Frachtschiff gsii, wu zwische dr Häfe vum Indischen Ozean gfahre sin, un d Handelsschiff vu dr Oschtindie-Kompany, wu im Ufrag vu Frankrych, Ängland un dr Niderlande gsäglet sin. D Pilgerflotte zwische Surat z Indien un Mokka an dr Spitz vu dr arabische Halbinsle isch ne Lieblingszyyl vu dr Pirate gsii, wel di ryche muslimische Pilger vylmol Juwelen un anderi Schetz mit sich uf Mekka gfiert hän.

Di indische Chauflyt vu dr unterschidlige Häfe vu Afrika un Réunion hän si wohl Miei gee, dr Diebstahl vu dr Ware dur d Piraten yyzdämme. Di nidrigbezahlte Mannschafte vu dr Handelsschiff im Indischen Ozean hän aber chuum welle ihre Läbe riskiere. D Pirate hän vylmol us dr Mannschaftsmitglider vu dr blinderete Schiff wyteri Bundesgnosse rekrutiert.

Vor dr Aachumft vu dr Europäer hän di madagassische Foko zum Dail Chrieg zum Sklavefang gfiert. D Sklave sin entwäder an arabischi Händler verchauft oder in Dienscht ghalte wore. Mit dr Aachumft vu dr europäische Sklavehändler isch dr Wärt vu dr mänschlige Handelswar stark aagstige un dodermit au d Zahl vu dr Chrieg vu dr madagassische Kischtefoko zum Sklavefang. An dr Stell vu Spieß un Machete hän di Yyhaimische jetz Muskete, Bulver un Blei yygsetzt, wu si vu dr Europäer iberchuu hän. D Chriegfierig isch gruusig un brutal gsii.

Wäge ihre Beziehige zue dr Piraten uf Nosy Boraha hän d Betsimisaraka z Oschtmadagaskar mee Fyyrwaff wie anderi Foko ghaa. Si hän di benochberete Antakarana un Tsimihety iberweältigt un hän sogar d Komoren iberfalle. D Sakalava hän uf dr Weschtkischte di maischte Beziehige zum Sklavehandel ghaa, doderzue hän au si dr Zuegang zue Gwehr un Bulver iberchuu. Si hän iber di andere Gruppe vu dr Weschtkischte gsigt. Haiptling, wu kaini Gfangene fir dr Sklavehandel gmacht ghaa hän, hän zum Dail ihri aigene Lyt in d Sklaverei verchauft.

Im usserschte Norde vu Madagaskar het s Sultanat Sansibar Niderlossige unterhalte. Dr Sultan Said ibn Sultan het si aber vergäbes um ängeri Kontakt zue dr Chenigi Ranavalona I. bemiet go mee Yyfluss uf d Insle z gwinne.

D Merina-Monarchy[ändere | Quälltäxt bearbeite]

Im zäntrale Hochland vu Madagaskar het s Chenigrych vu dr Merina, eme Ryybuurevolk, in ere relative Abgschidehait vum Räscht vu Madagaskar e baar Johrhundert gläbt. Bis 1824 hän d Merina aber fascht di gant Insle unter dr Fierig vu zwee Chenig eroberet, em Andrianampoinimerina (ca. 1745–1810) un sym SuhnRadama I. (1792–1828).

Dr Andrianampoinimerina het s Rych vu dr Merina dur Hyrotsbolitik un dur di chriegerisch Unterwärfig vu dr andere Gruppe gschaffe. Är het Antananarivo zue dr Hauptstadt vu Madagaskar gmacht un het dr Chenigbalascht rova uf eime Bärggipfel iber Stadt böue loo. Dr ehrgyzig Chenig het verchindet: Ny ranomasina no valapariako („s Meer isch d Gränze vu mym Ryysäld“). Dr Andrianampoinimerina het si vor andere Chenig un Haiptling uuszaichnet dur syni Verwaltigsfähigkait. Dr Chenig het Gsetz erloo, är het dr Damm- un Grabeböu fir d Urbarmachig vu Land um Antananarivo iberwacht, är het dr Metallspaten yygfiert un het d Ryysbuure zwunge ihn z bruuche. Bis zue sym Dod 1810 het er d Velker vu dr Bara un em Betsileo-Hochland unterworfen un het si drufvorberaitet, d Gränze vu symChenigrych bis an d Stade vu drInsle uuszwyte.

dr Radama I.

Sy Suhn Radama I. (Radama dr Groß) het d Regierig ibernuu, wu si z Europa s bolitisch Glychgwicht no dr Niderlag vum Napoléons I. zue Gunschte vu Großbritannie verschobe het. Großbritannie het d Macht iber d Handelswäg im Indischen Ozean gsuecht un het Réunion un Mauritius bsetzt. Mauritius isch e Basis fir d Uuswytig vum britischen Empires blibe. Dr Gouverneur vu Mauritius het vu dr franzesische Regierig gforderet, ass si dr Radama I. as Chenig vu Madagaskar anerkännt, e diplomatisch Manöver, wun er d Insle dermit het welle souverän machen un dodermit us allne Aasprich vu europäische Mächt uuselupfe.

Dr Radama I. het Verdreg mit Großbritannien unterzaichnet zue dr Ächtig vum Sklavehandel un dr Zuelossig vu proteschtantische Missionar z Madagaskar. Im Gegezug zue dr Ächtig vum Sklavehandel het Madagaskar all Johr e Summe vu döusert Dollar in Gold, döusert in Silber, e feschtglaiti Mängi Schießbulver, Flinten un Muskete, un 400 uusgsondereti britischi Armeeuniforme iberchuu. Dr Guverneur vu Mauritius het au Militerberoter gschickt, wu au Merina-Soldate gege d Sakalava un d Betsimisaraka in dr Chreig gfiert hän. Wun er anne 1824 iber d Betsimisaraka gsigt gha het, het dr Radama verchindet: „Hite ghert mer di ganz Insle! Madagaskar het e Regänt!“ Dr Chenig isch 1828 gstorben as Aafierer vu syre Armee bin ere Strofexpedizion gege d Betsimisaraka.

d Ranavalona I.

Di 33-jehrig Herrschaft vu dr Chenigi Ranavalona I. (Ranavalona di Gruusig), dr Witfrau vum Radama I., het mit em Mord an dr Erben un Verwandte vum Chenig aagfange. Di Adlige un d Medizinmanne, wu ihren Yyfluss unter em liberale Reschym vu dr vorige Merina-Chenig verlore ghaa hän, sin wider an d Macht chuu, D Chenigi het d Verdreg, wu dr Radama mit Großbritannie gschlosse ghaa het, zrugggwise. Ass si 1835 noch ere schwäre Chranket wider gsund woren isch, het si ihre zwelf Sampy-Talisman zuegschribe, wumit ibernatyrlige Mächt uusgstattet unter em Balascht ghuust hän. Go die Sampy bschwichtige, het si d Uusiebig vum Chrischtetum verbote un di britische Missionar vu dr Insle verdrybe un di zum Chrischtetum Konvertiete verfolge loo. Chrischtligi Bryych seie „nit d Bryych vu unsre Ahne“, het si verchindet. D Chenigi het di gsetzlige Reformen vum Andrianampoinimerina rugggängig gmacht. Unter anderem isch e „Gottesurdail“ wider yygfiert wore: Verdächtigi Kriminälli – vlymol Aahänger vumChrischtetum – hän s gift vum Tangena-Baum mieße drinke. Wänn si s Gottesurdail iberläbt hän, was sälte gschää isch, hän si as uuschuldig gulte. Madagassischi Chrischte nänne die Period tany maizina „d Zyt, wu s Land in dr Finschteri glägen isch.“ Schetzigswys 150.000 Chrischte sin unter dr Herrschaft vu dr Ranavalona dr Gruusige gstorbe. D Insel isch in Isolazion grote un dr Handel mit anderen Nazionen isch zum Stillstand chuu.

dr Radama II.

In dr Zwischezyt isch dr Suhn un Erb vu dr Chenigi, dr Chronbrinz Radama II., ufgwachse unter eme häälige remisch-katholische Yyfluss. Dr Kontakt zue Franzose z Antananarivo het en derzue brocht, anne 1854 e Brief an dr Napoléon III. z schicken un Frankrych zuen ere Invasion z Madagaskar z bringe. Am 28. Juni 1855 het er d Lambert Charta unterschribe. Des Dokumänt het em Joseph-François Lambert, eme franzesische Gschäftsmann, wu drei Wuche vorhär z Madagaskar aachuu isch, s uusschließli Rächt gee, alli Mineralie, Wälder un uubsetzti Ländereie z Madagaskar gege ne 10%-Abgab an d Merina-Monarchy uuszbyte. Speter het dr Franzose d Lambert-Charta un dr Brief vum Brinz an dr Napoléon III dient as Rächtfertigung vu dr Franco-Hova Chrieg un dr Annexion vu Madagaskar as franzesischi Kolony. Anne 1857 het d Chenigi e Verschwerig ivu ihrem Suhn Radama II. un franzesische Staatsburger geg si in dr Hauptstadt ufdeckt. Si het sofort alli Uusländer vu Madagaskar verdribe. D Ranavalona isch anne 1861 gstorbe.

In syre churze zwaijehrige Regierigszyt het dr Chenig Radama II. wider dr Handel mit Mauritius un Réunion aagfange, het di chrischtlige Missionar un d Uusländer yyglade, wider retuur z chuu uf Madagaskar un het di maischte Reforme vum Radama I. wider in Chraft gsetzt. Syni liberal Bolitik het dr verergeret Adel aber zuen eme vum Premierminischter Rainivoninahitriniony uusgfierte Butsh brocht. Dää het si dr Yyfluss uf d Regierigsgschäft z Madagaskar gsicheret dur e Hochzyt mit dr Chenigi Rasoaherina, dr Witfrau vum Radama II. Wu dr Rainivoninahitriniony gstorben isch, het sy Brueder, dr Rainilaiarivory, d Rasoaherina ghyrote. Är het speter derno au di letschte boode Chenigine vu Madagaskar ghyrote, d Ranavalona II. un d Ranavalona III.

d Ranavalona II.

Anne 1869 isch d Chenigi Ranavalona II., wu vu dr London Missionary Society ufzoge woren isch, anglikanisch daift wore. Die Konfession isch spter Staatsreligion vu Madagaskar wore. D Chenig he alli Sampy effetli verbränne loo. E Hufe katholischi un proteschtantischi Missionar sin chuu go Chilche un Schuele böue. Unter dr Herrschaft vu dr Chenigi Ranavalona II. isch drYyfluss vu dr Briten am greschte gsii. In Dail vu dr Insle het Änglisch s Franzesisch Zwootsproch ersetzt. Cup (Schissle), carpet (Deppig) un anderi änglischi Werter sin in di madagassisch Sproch yydrunge. Iber Sidafrika isch Britisch Militer uf d Insle chuu.

Go d Lambert-Charta wider in Chraft z setzen un dr konfisziert Bsitz vu franzesische Burger wider z iberchuu, isch Frankrych 1883 im Franco-Hova Chrieg (Hova isch en adeliger Merina) z Madagaskar yymarschiert. Am Änd vum Chrieg het Madagaskar dr Franzsoe Antsiranana (Diégo Suarez) an dr Nordkischte iberloo un het 560.000 Goldfranc an d Erbe vum Joseph-François Lambert zahlt. In dr Zwischezyt hän Diplomate z Europa bi dr Ufdailig vu Afrika veryybart, ass Großbritannie fir s Sultanat vu Sansibar uf d Insle Helgoland zu Gunschte vu Dytschland verzichtet un baidi zue Gunschte vu Frankrych uf Madagaskar. Die Veryybarig het s Schicksal vu Madagaskar bsiglet. Dr Premierminischter Rainilaiarivory het erfolgrych Großbritannien un Frankrych gegenenander uusgspilt ghaa, aber jetz het si Frankrych ohni Furcht vor Repressalie dur Großbritannie chennen yymischle. Anne 1895 isch e franzesischi Kolonne z Mahajanga (Majunga) glandet un isch iber dr Fluss Betsiboka zue dr Hauptstadt Antananarivo marschiert, wu in eme Iberraschigsaagriff yygnuu woren isch. Mer het dr Aagriff vu dr vyl nechere Oschtkischte här erwartet. Zwanzg franzesischi Soldate sin im Kampf un 6000 an dr Malaria un andere Chrankete gstorbe, vor eb dr Zweet Franco-Hova Chrieg zum Änd chuu isch. Anne 1896 het schießli s franzesisch Barlemänt fir en Annexion vu Madagaskar gstimmt. No 103 Johr het d Merina-Monarchy ufghert un di chenigli Familien isch uf Algerien emigriert.

Di franzesisch Herrschaft[ändere | Quälltäxt bearbeite]

Briefmarke us dr Kolonialzyt

D Brite hän anne 1890 d Yyrichtig vun eme franzesische Protektorat im Gegezug zuen ere ändgiltige Herrschaft iber Sansibar (hite ne Dail vu Tansania) un as Dail vun ere allgmaine Feschtlegig vu dr Yyflusssphären im Biet akzeptiet.[30] Di absolut franzesisch Herrschaft iber Madagaskar isch 1895–1896 dur militerischi Gwalt duregsetzt un d Merina-Monarchy abgschafft wore.

Im halbe Johrhundert dernoo hän franzesischi Unternämer Glimmer- un Grafitminen uusbytet un hän Kaffee- un Ryysplantasche bedribe, Di yyhaimisch Bevelkerig isch dur s Apartheid-ähnlig Sischtem vum Code de l’indigénat massiv unterdruckt wore. Zwoo Rebellione 1915 un 1929 sin vu Frankrych nidergschlaa wore.[31]

Madagassischi Druppe hän im Erschte Wältchrieg z Frankrych, z Marokko un z Syrie kämpft. No dr dytsche Bsetzig vu Frankrych im Zweete Weltkchrieg anne 1940 isch Madagaskar zerscht vun ere vichydrei Kolonialverwaltig beherrscht gsii. Im sognännte Madagaskarplan het s NS-Reschym 1940 d Deportazion vu dr europäische Juden uf Madagaskar in Erwägig zoge. Anne 1942 sin britischi Druppen in dr Operation Ironclad uf dr strategisch wichtigen Insle glandet un hän si im e halbe Johr (u Mai bis Novämber) bsetzt go ne Yydringe vu Japan z verhindere. Anne 1943 hän d Brite d Insle em freie Frankrych unter em Charles de Gaulle ibergee.

Unabhängigkait[ändere | Quälltäxt bearbeite]

dr Philibert Tsiranana

Anne 1945 sin d Organisazione Mouvement démocratique de la rénovation malgache (MDRM), Patriotes nationalistes malgaches (PANAMA) un Jeunesse nationaliste (JINA) grindet wore, wu si fir d Unabhängigkait yygsetzt hän.

1947 isch s Aasää vu dr Franzose uf e Diefpunkt gheit, e nazionale Ufstand isch no aim Johr bluetig nidergschlaa wore, rund 80.000 Madagasse sin ums Läbe chuu[32]. D Franzose hän 1956 d Inschtituzionen unter em loi-cadre Defferre reformiert, un Madagaskar het e fridlige Wäg in d Unabhängigkait yygschlaa. D Republik Madagaskar isch am 14. Oktober 1958 zum autonome Staat in dr franzesische Gmainschaft erklert wore. Di provisorisch Regierig het 1959 mit dr Aanahm vun ere Verfassig ufghert. Am 26. Juni 1960 isch Madagaskar derno vollständig unabhängig wore mit em Philibert Tsiranana as Bresidänt.

Em Tsiranana sy Regierig isch in ere Kontinuitet zue dr Bolitik vu dr franzesische Sidler gstande, wu no in Machtposizione gsii sin, un het andersch wie ne Hufe ehmoligi franzesischi Kolonien uf en antikommunistische Kurs gsetzt.[33] Anne 1972 het sPRotescht gee geg die Bolitik un dr Tsiranana isch zumRuggdritt zwunge wore. Är het d Macht an dr General Gabriel Ramanantsoa un däm sy provisorisch Regierig ibergee. Die hän d Ussebolitik zue Gunschte vun ere ängere Verbindig zue dr Sowjetunion gänderet. 1975 isch unter em Richard Ratsimandrava un no däm sym Dod im nämlige Johr unter em Gilles Andriamahazo d Ruggchehr zue dr Demokraty versuecht wore.[34]

Die Demokratisierig isch aber fähl gschlaa, no im Johr 1975 het si dr Admiral un ehmolog Usseminischte Didier Ratsiraka an d Macht butscht. Am 30. Dezämber 1975 isch di Demokratisch Republik Madagaskar proklamiert wore.[35] Dr Ratsiraka isch fir sibe Johr zum Bersidänt gwehlt wore. Är het wyter e Bolitik in Richtig Sozialismus drbe, het grióßi Dail vu dr Wirtschaft nazionalisiert un het alli Beziehige zue Frankrych abbroche.[34] Die Bolitik het dr Nidergang vu dr madagassische Wirtschaft no schnäller gmacht, wel no dr Unabhängigkait franzesischi Yywanderer s Land verloo hä nun dodermit e Mangel an qualifizierte Lyt un Tächnology entstanden isch.[33] Em Ratsiraka sy sibejehrigi Regierigszyt isch verlengeret wore, wu sy Bartei (Avantgarde de la Révolution Malgache, AREMA) 1977 as ainzigi Bartei zue dr Wahle zuegloo woren isch.[33] Wäge dr kataschtrofale wirtschaftlige Lag, verursacht dur sozialistischi Misswirtschaft, het si Madagaskar wider an Frankrych aagnecheret un het sy prokommunistischi Bolitik in e prokapitalistischi gänderet.[36] Schließli het en di madagassisch Opposizion un di international Effetligkait zwunge, sy Posizion au ideologisch z revidiere. Anne 1992 isch derno ne neji burgerligi Verfassig dur e Volksabstimmig verabschidet wore.[37]

Anne 1993 het dr Ratsiraka in dr erschte Meebarteiewahle gege dr Albert Zafy verlore.[38] Em Zafy isch d Ainigung vum dailte Land misslunge un är isch 1996 aagchlagt wore.[36] Di negschte Wahlen anne 1997 het iberraschend wider dr Didier Ratsiraka gwunne.[39] Är het wyter dr Kapitalismus im Land firschidribe. Dr Yyfluss vum IWF un dr Wältbank het zuen ere Privatisierigswälle gfiert.

D Opposizion gege dr Ratsiraka isch wider sterker wore. D Provinzwahle 2000 sin vu dr Opposizionsbarteie boykottiert wore, un d Bresidäntschaftswahl 2001 het zue Kontroverse gfiert, dr Kandidat vu dr Opposizion, dr Marc Ravalomanana, het dr Siig fir sich proklamiert, dr Amtsinhaber het des bstritte. Aafangs 2002 het s Stroßeschlachte zwische dr Aahänger vu beede Kandidate gee, Noch ere Noozellig het s Oberscht Verfassigsgricht dr Ravalomanana zum Wahlsiiger erklert. Dr Ratsiraka isch derno ins Exil uf Frankrych gflichtet.[40]

Bi dr Barlemäntswahlen im Dezämber 2002 het em Ravalomanana sy Bartei I Love Madagascar e dytlige Wahlerfolg ghaa. Är het sy Mandat gnutzt go Wirtschaftsreformen in änger Verbindig mit em IWF un dr Wältbank durezsetze un d Korrupzion z bekämpfe.[41] Dr Ratsiraka isch in Abwäsehait wäge Unterschlagig vu effetlige Gälder zue 10 Johr Zwangsarbet verurdailt wore.[42]

Am 27. Jänner 2009 isch s zue Brotescht gege d Regierig Ravalomanana chuu, wel dr Färnsehkanal TV Viva zuegmacht woren isch, wu dä neRed vum Didier Ratsiraka iberdrait ghaa het. Dr Aafierer vu dr Demonschtrazion, dr Andry Rajoelina, bis dert Burgermaischter vu dr Hauptstadt un Bsitzer vum Färnsehkanal het e demokratisch nit legitimierti Gegnregierig uusgruefe. Verfassigsrächtler hän des as Butschversuech gwärtet. Wu d Aahänger vum Rajaoelina uf sy Ufruef versuecht hän, s Stadtpalais vum Bresidänt z stirme, isch s zue Schießereie chuu, 30 Mänsche sin um s Läbe chuu. No däm Butschversuech isch dr Rajoelina am 6. Merz 2009 in di franzesisch Botschaft gflichtet.[43]

Verwaltigsgliderig[ändere | Quälltäxt bearbeite]

Madagaskar isch in 22 Regionen ufdailt, wu in 119 fivondronana (Krais) glideret sin. Di unterscht Verwaltigsebeni bilde di 1579 Kaominina (Gmaine). Di 17.485 fokontany (Stadtdail oder Derfer) hän e Sälbschtverwaltig.[44]

Madagascar-regions.png
Regione vu Madagaskar
Region Bevelkerig 2011 [45] Fläche [km²][46] Alti Provinz Nr. in Grafik Yywohner pro km²
Alaotra-Mangoro 973.216 31.948 Toamasina 11 30,46
Amoron’i Mania 677.508 16.141 Fianarantsoa 14 41,97
Analamanga 3.173.077 16.911 Antananarivo 4 187,63
Analanjirofo 980.817 21.930 Toamasina 13 44,73
Androy 695.423 19.317 Toliara 21 36,00
Anosy 636.554 25.731 Toliara 22 24,74
Atsimo-Andrefana 1.247.663 66.236 Toliara 20 18,84
Atsimo-Atsinanana 851.545 18.863 Fianarantsoa 17 45,14
Atsinanana 1.204.006 21.934 Toamasina 12 54,89
Betsiboka 278.120 30.025 Mahajanga 9 9,26
Boeny 757.714 31.046 Mahajanga 8 24,41
Bongolava 433.369 16.688 Antananarivo 6 25,97
Diana 663.289 19.266 Antsiranana 1 34,43
Haute Matsiatra 1.136.260 21.080 Fianarantsoa 15 53,90
Ihorombe 295.920 26.391 Fianarantsoa 18 11,21
Itasy 694 381 6.993 Antananarivo 3 99,30
Melaky 274.399 38.852 Mahajanga 10 7,06
Menabe 561.043 46.121 Toliara 19 12,17
Sava 929.342 25.518 Antsiranana 2 36,42
Sofia 1.181.603 50.100 Mahajanga 7 23,59
Vakinankaratra 1.708.685 16.599 Antananarivo 5 102,93
Vatovavy-Fitovinany 1.342.135 19.605 Fianarantsoa 16 68,46

Stedt[ändere | Quälltäxt bearbeite]

Di greschte Stedt z Madagaskar sin per 1. Jänner 2005 gsi:

  1. Antananarivo, 1.391.506 Yywohner
  2. Toamasina, 206.390 Yywohner
  3. Antsirabe, 200.804 Yywohner
  4. Fianarantsoa, 167.240 Yywohner.

Literatur[ändere | Quälltäxt bearbeite]

  •  Franz Stadelmann, Jan Greune: Madagaskar. Stürtz, Würzburg 1998, ISBN 3-8003-0902-5 (Bildband).
  •  Gabriel Gravier: La cartographie de Madagascar. Martino, Mansfield Centre 2002, ISBN 1-57898-400-9 (Nachdruck der Ausgabe Rouen & Paris 1896).
  •  Mervyn Brown: A History of Madagascar. Wiener, Princeton 2002, ISBN 1-55876-292-2.
  •  Steven M. Goodman, Jonathan P. Benstead: The Natural History of Madagascar. University of Chicago Press, Chicago 2003, ISBN 0-226-30307-1.
  •  Mark Eveleigh: Madagaskar – der sechste Kontinent. Goldmann, München 2003, ISBN 3-442-71192-4 (zu Fuß von der Nord- zur Südküste durch den Westteil Madagaskars).
  •  Pierre Verin: Madagaskar. Leipziger Universitätsverlag, Leipzig 2005, ISBN 3-86583-022-6.
  •  Wolfgang Därr, Klaus Heimer: Madagaskar. 7. Uflaag. Reise Know-How Verlag, Bielefeld 2012, ISBN 978-3-8317-2060-6 (umfassendes Reisehandbuch für Individual- und organisiert Reisende).
  •  Michael Flach, Corina Haase: Madagasikara. Insel meiner Träume. Cuno, Calbe (Saale) 2007, ISBN 978-3-935971-40-9 (umfangreicher Bildband).
  • Erich Follath, Fotos: Thomas Mayer: Madagaskar: Zurück zu den Vätern. In: Geo-Magazin. Hamburg 1979,1, S. 6–28. Informativer Erlebnisbericht, u. a. der Totenkult. „Vier Jahre nach ihrem Tod werden Verstorbene in den Familienkreis zurückgeholt.“ ISSN 0342-8311

Weblink[ändere | Quälltäxt bearbeite]

 Commons: Madagascar – Sammlig vo Multimediadateie

Fueßnote[ändere | Quälltäxt bearbeite]

  1. Population, total | Data | Table. In: data.worldbank.org. Abgrüeft am 2015-06-11.
  2. International Monetary Fund, World Economic Outlook Database. Internationaler Währungsfonds. Abgrüeft am 2012-11-11.
  3. Human Development Report Office: Madagascar – Country Profile: Human Development Indicators, abgerufen am 23. Oktober 2014.
  4.  Brian F. Windley u. a.: Tectonic framework of the Precambrian of Madagascar and its Gondwana connections: A review and reappraisal. In: Geologische Rundschau. 83, Nr. 3, 1994, S. 642–659, doi:10.1007/BF00194168.
  5.  Alan S. Collins, Brian F. Windley: The tectonic evolution of central and northern Madagascar and its place in the final assembly of Gondwana. In: Journal of Geology. 110, Nr. 3, 2002, S. 325–339.
  6.  D. Ackermand u. a.: The Precambrian mobile belt of southern Madagascar. In: Geological Society, London, Special Publication. 43, 1989, S. 293–296, doi:10.1144/GSL.SP.1989.043.01.20.
  7. B. De Waele u. a.: U-Pb detrital zircon geochronological provenance patterns of supracrustal successions in central and northern Madagascar. Abgrüeft am 2009-04-10. (PDF; 253 kB, en, Zirkon-U/Pb Altersdatierungen in Madagaskar)
  8.  Peter Luger u. a.: Comparison of the Jurassic and Cretaceous sedimentary cycles of Somalia and Madagascar: implications for the Gondwana breakup. In: Geologische Rundschau. 83, Nr. 4, 1994, S. 711–727, doi:10.1007/BF00251070.
  9. Madagaskar – Heimat der Lemuren, WWF.de, abgruefen am 6. Juli 2015
  10. Alfred Bittner: Madagaskar: Mensch und Natur im Konflikt. Birkhäuser, 1992, ISBN 978-3-7643-2680-7. S. 40.
  11. Wachsende Zerstörung der Wälder auf Madagaskar WWF.de, abgruefen am 6. Juli 2015
  12. Michaela Kirst: Undercover gegen die Holzmafia. Dokumentarfilm. Erstsendung 14. Novämber 2011, Produktion WDR 2011, abgruefen am 30. Novämber 2011.
  13. Illegaler Holzhandel: Raubbau am Regenwald. GEO, Nr. 4, 2010
  14. Steven M. Goodman, Jonathan P. Benstead, Harald Schütz: The Natural History of Madagascar. University of Chicago Press, Chicago 2003, ISBN 0-226-30307-1, S. 153–157.
  15. David Quammen: Der Gesang des Dodo. Eine Reise durch die Evolution der Inselwelten. List, Berlin 2004, ISBN 3-548-60040-9, S. 55 un 56.
  16. Conrad P. Kottak: Cultural Adaptation, Kinship, and Descent in Madagascar. In: Southwestern Journal of Anthropology. 27, Nr. 2, 1971, S. 131.
  17. République Française, Commission des Recours des Réfugiés (Hrsg.): Note d’actualité Madagascar. Bilan de la situation politique récente. S. 1.
  18. Conrad P. Kottak: Cultural Adaptation, Kinship, and Descent in Madagascar. In: Southwestern Journal of Anthropology. 27, Nr. 2, 1971, S. 140.
  19. 19,0 19,1 Conrad P. Kottak: Cultural Adaptation, Kinship, and Descent in Madagascar. In: Southwestern Journal of Anthropology. 27, Nr. 2, 1971, S. 140 f.
  20. 20,0 20,1 Conrad P. Kottak: Cultural Adaptation, Kinship, and Descent in Madagascar. In: Southwestern Journal of Anthropology. 27, Nr. 2, 1971, S. 141.
  21. Ralph Linton: Culture Areas in Madagascar. In: American Anthropologist. 30, Nr. 3, 1928, S. 363.
  22. Michael Lambek, Andrew Walsh: The Imagined Community of the Antankarana: Identity, History, and Ritual in Northern Madagascar. In: Journal of Religion in Africa. 27, Nr. 3, 1997, S. 333 f.
  23. Philippe Beaujard: La violence dans les sociétés du sud-est de Madagascar. In: Cahiers d’Études Africaines. 35, Nr. 138–139, 1995, S. 586–595.
  24. Gwyn Campbell: An Industrial Experiment in Pre-Colonial Africa: The Case of Imperial Madagascar, 1825–1861. In: Journal of Southern African Studies. 17, 1991, S. 534.
  25. Daniel Stiles. 1991. “Tubers and Tenrecs: The Mikea of Southwestern Madagascar.” Ethnology 30:251-263, S. 251.
  26. Lin Poyer, Robert L. Kelly: Mystification of the Mikea: Constructions of Foraging Identity in Southwest Madagascar. In: Journal of Anthropological Research. 56, Nr. 2, 2000, S. 167.
  27. Charles Cadoux: La république malagache. Berger-Levrault, Paris 1969, S. 25.
  28. Robert E. Dewar, Henry T. Wright: The culture history of Madagascar. In: Journal of World Prehistory. 7, 1993, S. 418.
  29. Länderinformationen des Auswärtigen Amtes zu Madagaskar
  30. Lueg Allen und Covell: Historical Dictionary of Madagascar. S. xxx-xxxi.
  31. Douglas Little: Cold War and Colonialism in Africa: The United States, France, and the Madagascar Revolt of 1947. In: The Pacific Historical Review. 59, Nr. 4, 1990, S. 530.
  32. 1947 L'insurrection à Madagascar – Jean Fremigacci – Marianne
  33. 33,0 33,1 33,2 lonely Planet: Madagascar history
  34. 34,0 34,1 BBC: Madagaskar timeline
  35. Franz Nuscheler, Klaus Ziemer: Die Wahl der Parlamente und anderer Staatsorgane, Band 2 Afrika, S. 1182. ISBN 3-11-004518-4
  36. 36,0 36,1 Africa.com: Madagascar history and culture (iber archive.org) (Memento vom 23. Jänner 2008 im Internet Archive)
  37. BBC: Madagaskar timeline kam
  38. lonely Planet: Madagascar history
  39. BBC: Madagascar timeline
  40. Lonely Planet: Madagascar History
  41. Lonely Planet: Madagascar history
  42. BBC News: Ratsiraka gets 10 years hard labor
  43. Rajoelina réfugié à l'ambassade de France, Le Figaro, (10. Merz 2009)
  44. Uuswärtig Amt – Madagaskar – Innebolitik, abgruefen am 20. Juni 2010.
  45. Population & démographie. Institut National de la Statistique. Abgrüeft am 2012-11-11.
  46. Géographie physique. Institut National de la Statistique. Abgrüeft am 2012-11-11.
Information icon.svg Dä Artikel basiert uff ere fräie Übersetzig vu dere Version vum Artikel „Madagaskar“ vu de dütsche Wikipedia.

E Liste vu de Autore un Versione isch do z finde.

Information icon.svg Dä Artikel basiert uff ere fräie Übersetzig vu dere Version vum Artikel „Geschichte_Madagaskars“ vu de dütsche Wikipedia.

E Liste vu de Autore un Versione isch do z finde.