Kanton

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Disambig.svg Dä Artikel behandelt d’Kantön vu de Schwiz. Für witteri Bedüttige vum Wort lüeg Kanton (Begriffsklärung).
D Schwyzer Kantön

Kantön (au: Stände, früehner au Ort) sind d Gliidschtaate vo de Schwiizerische Eidgnosseschaft.

Dr Begriff Kanton[ändere | Quälltäxt bearbeite]

Im 14. Johrhundert het me d Bündnispartner vo dr Alten Eidgenosseschaft as Stadt oder Land bezeichnet, spöter isch dr Begriff Ort uffcho. Däm het im Französische ‹canton› entsproche, e Bezeichnig wo zum erste Mol 1475 in eme Freiburger Dokumänt bruucht wird und sich denn in dr ganze Romandie und im Tessin verbreitet het. In dr Dütschschwiiz het mä in dr zweite Helfti vom 16. Johrhundert dr Begriff Stand vorzoge und erst im 17. Johrhundert isch Kanton au bi de Alemanne vorcho. D Helvetik het 1798 d Begriff Stand und Ort abgschafft und Kanton as Bezeichnig für die oberste Verwaltigseiheite iigfüehrt. Sit dr Mediationsakte si ‹Kanton› und ‹Stand› synonym bruucht worde, und au dr Bundesstaat het 1848 beidi Begriff übernoh.[1]

Politisches System[ändere | Quälltäxt bearbeite]

Jede vo de 26 Kanton hätt en eigini Verfassig und es Parlament (Grosser Rat, Kantonsrat, Landrat, Parlament) wo je nach Grössi zwüsche 49 bis 180 Parlamentssitz hätt. Die Kantonsregierige (Regierungsrat, Regierung, Staatsrat) zälet je nach Kanton föif odr sibe Mitglidr. De Trend gaad i Richtig Verchlinerig.

Alli Berich, wo nid vo de Verfassig odr vom ene Bundesgsetz am Bund zuegwise werdet, ghöret automatisch id Kompetenz vo de Kantön (z. B. Schuelwäse, zum Teil au Gsundheitswäse, Planigs- und Baurecht, Polizei, Gerichtsverfassig, Stüüre u. a.). By vilne vo dene Berych hätt de Bund aber glych nones Wörtli mit z’rede. Drum isch mängisch vomene «Kompetänzwirrwarr» und «Kantönligeischt» d’Red.

I zwei Kantön, Glarus und Appizell Innerrhode, gits no bis hütt einisch im Jahr d’Landsgemeind, wo’s Stimmvolch vo Hand abstimmt und sini Kantonsvertreter wählt.

Gschicht[ändere | Quälltäxt bearbeite]

Di sogenannten Urkantön, wo 1291 (odr wahrschinli au früehner) d’Eidgenossenschaft gründet händ, sind Uri, Schwyz und Underwalde. I dr Alten Eidgenosseschaft hätt mer zu de Kantön au «Ört» gseit. Drum redt mer no hütt vo den Acht Alten Ört, wo den zu de 13-örtige Eidgenosseschaft uusgweitet worde sind. Verbündeti, wo nonig Vollmitglidr i de Eidgenosseschaft gsi sind, hätt mer als zuegwandti Ört bezeichnet.

I de Helvetische Republik (1798-1803) sind d’Kantön denn nume Verwaltigsbezirk gsi ohne Autonomi. D Grenze sind neu zoge worde, damit alli Kantön möglichscht glych gross und politisch zueverlessig sind. Zue säbe Zyt hätts die alte Kantön Basel, Bärn, Züri, Friburg, Schaffhuuse, Soloturn, Wallis wo zum Deil Gebiet verlore hai bi dr Neuiideilig, und die neue Kantön Bade, Bellinzona, Léman, Lugano Linth, Oberland, Rhätie, Säntis und Waldstette gäh, wo spöter wider neuiideilt worde si oder en andere Name übercho hai, und d Kantön Aargau und Thurgau. Gämf het nit zur Republik ghört, wil Frankriich s am 15. April 1798 anektiert het.

Mit dr Mediationsverfassig 1803 sind s denn 19 Kantön gsi, wo wider e gwüssi Autonomii gha hän, und nach em Wiener Kongress 1815 22. De jüngscht, de 23., isch de Kanton Jura, wo sich 1979 vom Kanton Bern abgspalte hätt.

Halbkantön[ändere | Quälltäxt bearbeite]

Hütt redt mer meischtens vo 23 Ständ und 26 Kantön, will sich zwei i Halbkantön ufgspalte händ: Appezöll Inneroode, Appezäll Osserode, Basel-Stadt und Baselbiät. Obwaldä und Nidwaudä sind Halbkantön, obwohl si nie zäme ein Kanton gsi sind. Im Ständerat hän alli sächs jeweils numen ein Sitz, di andere händ zwei.

Lischte mit Eckdate[ändere | Quälltäxt bearbeite]

Kennz. Wappe Kanton Bitritt Houptort Iwohner1 Flechi2 Bev.- Dichti3 Azahl Gmeinde Offizielli Sproche
ZH Wappen des Kantons Zürich Züri 1351 Züri 1'228'600 1'729 701 171 Dütsch
BE Wappen des Kantons Bern Bärn 1353 Bärn 947'100 5'959 158 399 Dütsch, Französisch
LU Wappen des Kantons Luzern Lozärn 1332 Lozärn 350'600 1'493 233 107 Dütsch
UR Wappen des Kantons Uri Uri 1291 Altdorf 35'000 1'077 33 20 Dütsch
SZ Wappen des Kantons Schwyz Schwyz 1291 Schwyz 131'400 908 143 30 Dütsch
OW Wappen des Kantons Obwalden Obwaldä 1291 Sarne 32'700 491 66 7 Dütsch
NW Wappen des Kantons Nidwalden Nidwaudä 1291 Schtans 38'600 276 138 11 Dütsch
GL Wappen des Kantons Glarus Glaris 1352 Glaris 38'300 685 51 28 Dütsch
ZG Wappen des Kantons Zug Zoog8 1352 Zug 100'900 239 416 11 Dütsch
FR Wappen des Kantons Freiburg Frybùrg 1481 Frybùrg 239'100 1'671 141 242 Französisch, Dütsch
SO Wappen des Kantons Solothurn Soledurn 1481 Soledurn 245'500 791 308 126 Dütsch
BS Wappen des Kantons Basel-Stadt Basel-Schtadt 1501 Basel 186'700 37 5'072 3 Dütsch
BL Wappen des Kantons Basel-Landschaft Baselbiet 1501 Lieschtl 261'400 518 502 86 Dütsch
SH Wappen des Kantons Schaffhausen Schafuuse 1501 Schafuuse 73'400 298 246 34 Dütsch
AR Wappen des Kantons Appenzell Ausserrhoden Appezäll Osserode 1513 Herisau4 53'200 243 220 20 Dütsch
AI Wappen des Kantons Appenzell Innerrhoden Appezöll Inneroode13 1513 Appezöll 15'000 173 87 6 Dütsch
SG Wappen des Kantons St. Gallen Sanggale 1803 Sanggale 452'600 2'026 222 90 Dütsch
GR Wappen des Kantons Graubünden Graubünda 1803 Chur 185'700 7'105 26 211 Dütsch, Rätoromanisch, Italiänisch
AG Wappen des Kantons Aargau Aargou 1803 Aarau 550'900 1'404 388 232 Dütsch
TG Wappen des Kantons Thurgau Thurgau 1803 Frauefeld 228'200 991 229 80 Dütsch
TI Wappen des Kantons Tessin Tessin 1803 Bellinzona 311'900 2'812 110 244 Italiänisch
VD Wappen des Kantons Waadt Waadt 1803 Losann 626'200 3'212 188 382 Französisch
VS Wappen des Kantons Wallis Wallis 1815 Sitte 278'200 5'224 53 160 Französisch, Dütsch
NE Wappen des Kantons Neuenburg Nöieburg 1815 Nöieburg 166'500 803 206 62 Französisch
GE Wappen des Kantons Genf Gämf 1815 Gämf 414'300 282 1'442 44 Französisch
JU Wappen des Kantons Jura Jura 1979 Dälschberg 69'100 838 82 83 Französisch
CH Eidgenössisches Wappen Schwiiz Bärn 7'261'200 41'285 174 2'889 Dütsch, Französisch, Italiänisch, Rätoromanisch

Bemerkige:
1 Stand: 31. Dezämber 2001, Bundesamt für Statistik
2 km²
3 Ihwohner pro km², Stand 2000
4 Sitz vor Kantonsregierig und em Parlamänt, Sitz vor Justiz isch Troge.
8 bis do: die Acht Alte Ört,
13 bis do: die Driizäh Alte Örte

Die zwöibuchstabige Kantonsabchürzige si vrbreitet, sie werden u.a. bi den Autokennzeiche brucht und wärde ou i dr ISO 3166-2:CH brucht(mit em Präfix "CH-", z.B. CH-SZ für dr Kanton Schwyz).

Noowiis[ändere | Quälltäxt bearbeite]

  1. Artikel Kantone im Historische Lexikon vo dr Schwiiz

Ekschterne Syte[ändere | Quälltäxt bearbeite]