Ukraine

Україна Ukrajina Ukraine
Amtsschpraach(e)	Ukrainisch
Hauptschtadt	Kiew
Schtaatsform	Semipräsidiali Republik
Schtaatsoberhaupt	Präsident Wiktor Janukowytsch
Regierigschef	Premierminischter Mykola Azarov
Flächi	(43.) 603.700 km²
Bevölkerigsdichti	78 Iiwohner pro km²
Unabhängigkeit	erklärt am 24. August 1991
Nationalhymne	Schtsche ne wmerla Ukrajiny (Ще не вмерла України)
Internet-TLD	.ua
Vorwahl	+380

D Ukraine isch a Land mit nar Fläche fa ca. 600'000 qkm und isch somit s zweitgröschte Land fa Europa.

Die wichtigschta Städt sind Lemberg (Lwiw), Kiew, Odessa, Dnjepropetrowsk, Donezk und Sewastopol.

Des Land hätt im Jahr 2004 die orangerne Revolution durchgmachat und befindet sich ufm Weg, a demokratische Republik z werda.

D Ukraine isch vor allem in an weschtlich orientierta Weschta und in an russisch orientierta Oschta gspalta.

Uf dr Krim, dr groosa Halbinsla, hets meriri tütschsprôchigi Dörf gee: Friedental, Heilbronn (Heilbrunn), Kronental, Neusatz (Nejsaz), Rosental, Zürichtal. Di maiste Uuswanderer sind um 1805 vo de Schwiiz, vo Bade, vo Württeberg und vo de Pfalz cho.

Geografii

S Land grenzt as Asowsche Meer und as Schwarze Meer und a d Länder Rumänie, Moldawie, Slowakei, Pole, Wiissrussland und Russland. D'Gränzlängi isch rund 6500 Killometer. Zwüschem westligste (22° 08' O) un em östligste Punkt (40° 13' O) isch d'Entfernig 1316 km, de nördligst (55° 22' N) un de südligst (44° 23' N) lige 893 km usenand.

Topografii

D'Ukraiine deilt sich topografisch gseh in 70 Prozänt Diefebeni, 25 Prozänt Hochebeni un 5 Prozänt Gebirg ii. D'Bärg sin zwüsche 1500 un 2000 Meter hoch un glidere sich in zwei Gebirg uff:

• Ukraiinischi Karpate. Si sin s gröscht Gebirg vum Land un sin de nordöstlig Deil vum Karpategebirg.
• Krimgebirg. Im Süde vu de Insle Krim gläge, bstoht's us dräi Gebirgszüg, em Haupt- em innere un em üßere Krimgebirg.

Gwässer

De gröscht Fluss isch de Dnepr, wu z Russland entspringt un im Norde di ukraiinisch-wißrussischi Gränze übberschritet. Er fließt in richtig Süde durch d'Hauptstadt Kiew un mündet ins Schwarz Meer. De 2201 km lang Fluss durchfließt s Land uff ere Längi vu 981 km. Witeri wichtigi Flüss sin de Dnestr, d'Donau un de Südlig Bug.

In de Ukraiine gitt's öbbe 3000 Seë vu verschidener Größi. D'Sacki-Seë sin riich an Fisch un Wasservögel, sällewäg isch do au de Nationalpark Sacki aaglègt wore.

Viili vu de Seë sin durch d'Begradigung un Bearbeitig vu Flussbette entstande, au si hänn verschideni Größe un Forme (huufiiseförmig, länglig, rund uew.). Di meiste vu ihne sin nit bsunders dief un diene viile Dier als Läbensruum un de Mänsche als Nocherholigsgebiet.

Am Ufer vum Schwarze Meer gitt's ußerdemm 22 Liman. Säll sin Däler, wu vum Meer übberflüetet un deno meistens vum Meer abgschnitte wore sin. Zu de gröschte ghöre de Dnestr-Liman, de Dnepr-Liman, de Bug-Liman, de Kujalanicki-Liman un de Hadschibej-Liman.

Di gröschte Moor findet mer z Polesie, ere Region, wu riich an Flüss mit diefer Fließgschwindigkeit isch.

Chliima

D'Ukraiine hät e gmäßigts, truches Chliima, im Süde vu de Krim mache sich au subtropischi Iiflüss bemerchbar. S Gebiet wird im Johr durchschnittlig vu 45 Zyklon un 39 Antizyklon beiiflusst. S Wätter isch an 230-235 Dag chlor un sunnig.

D'Mitteltemperatuur isch im Januar bi -8 °C, im Süde un uff de Krim abber bis zu 4 °C. Im Juuli litt s Mittel zwüsche 19 un 24 Grad. In de Gebirg isch d'Temperatuur allerdings allwiil dütlig nidriger. D'Summe vu de Sunnestunde isch in de meiste Deil zwüsche 150 un 160 Dag, im Süde um die 200 un uff de Krim bis zu 260 Dag.

D'Windrichtig hänkt vu de Johreszit ab, im Winter chömme im Norde hauptsächlig füüchti Wind us em Weste un im Süde trucheni us em Oste un Nordoste. Im Summer degege wahje vor allem Nordostwind. D'Karpate un s Krimgebirg sin vor chalte Luftmasse besser gschützt.

We'mer vu Nordweste/Weste noch Südoste/Oste goht, no sinkt d'Niderschlagsmängi kontinuierlig; si litt zwüsche 300 un 650 Millimeter pro Johr. In de Bärgregione ghäit allerdings viil meh Niderschlag (1000-1200 mm im Krimgebirge, 1500 mm in de Karpate), in de Steppelandschafte vum Süde weniger. Was d'Verdeilig übber s Johr aagoht, ghäie Niderschleg vor allem in de Summermonet, am wenigste im Februar.