Kimmerier

Us der alemannische Wikipedia, der freie Dialäkt-Enzyklopedy

D Kimmerier (altgriechΚιμμέριοι, Kimmérioi; akk. Gimirru; hbr. Gomer) sind en antiks Nomadevolch gsii, wo i de Steppe nördlich vom Schwarze Meer gsidlet het und um 715 öber de Kaukasus i Mesopotamie und Chliiasie iigfalle sind.

Gschicht[ändere | Quälltäxt bearbeite]

Im 8.Jh.v. Chr. hend d Kimmerier im Steppeland vo de hütige Ukraine und uf de Krim nördlich vo de Taurer glebt. Bidrängt vo de Skythe hend si noch 720 v. Chr. eri Woonsitz verloo und sind öber de Kaukasus is Riich vo Urartu zoge, wo si ane 714 de urartäisch König Rusa I. bisigt hend. Us Schmach öber die Niderlag het de Rusa drufabe Selbstmord gmacht.

E Generation spööter sind d Kimmerier underem König Teušpa (agr. Τεΐσπης, Teïspes) is Assyrische Riich iigfalle, sind aber vom assyrische König Assarhaddon bisigt wore. D Kimmerier sind denn öbere uf Medie und hend di uufständische Meder (674-672) understützt. En andere Tail vo de Kimmerier isch westwärts zoge und is Phrygische Riich iigfalle und hend da zum Fall broocht und de phrygisch König Midas het sich umbroocht, indem er Stierebluet trunke het. De Vormarsch vo de Kimmerier gege Lydie isch aber vom lydische König Gyges abgwerrt wore. Doch 644 isch es a de Kimmerier glunge di lydischi Hoptstadst Sardeis iiznee und hend drufabe afange di griechische Städt a de Chüste öberfalle. Au d Piet a de Südchüste vom Schwarze Meer sind dozmol plünderet wore.

Um 640 isch de kimmerisch König Dugdamme (agr. Λύγδαμις, Lygdamis) is Assyrische Riich iigfalle. De Dugdamme isch aber im Champf umchoo und si Soo, de Šandakšatru het de de Chrieg wittergfüert.

Glii drufabe sind d Kimmerier vom lydische König Alyattes bisigt wore und us Chliiasie vertribe wore, und as Folg devo glii us de Weltgschicht verschwunde.