Asowsches Meer

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Sattelittebild vo de Krim und em Asowsche Meer

S Asowsche Meer (ukr. Азовське море, Azovske more; russ. Азовское море, Asovskoje More; krimtat. Azaq deñizi) isch e Nebemeer vom Schwarze Meer und lit z Osteuropa. Da Binnemeer isch noch de Stadt Asow a de Mündig vom Don binamst.

Geografii[ändere | Quälltäxt bearbeite]

Charte vom Asowsche Meer

D Flächi vom Asowsche Meer isch mit 38'000 km² öppe 76 mol grösser as de Bodesee, d Tüüfi bitrait aber nume grad 15 m. Drum werd s Wasser im Summer 25 bis 30 °C warm und im Winter isches deför wääred zwee bis vier Mönet zuegfroore. De Salzghalt litt bi 11 ‰, im Nordoste nume bi 2 bis 4 ‰.

Die wichtigste Zueflüss sind de Don und de Kuban. Si sind för de nidrig Salzghalt verantwortlich.

Im Asowsche Meer hets grad nume e hampfle Insle.

Länder[ändere | Quälltäxt bearbeite]

As Asowsche Meer grenzet nume d Ukraine im Weste und Norde und Russland im Oste. D Halbinsle Krim im Südweste und d Halbinsle Taman im Südste trenet s Asowsche Meer vom Schwarze Meer, d Verbindig isch d Stroos vo Kertsch. Im Weste a de Krim litt no de Siwasch oder au s Fuule Meer, e flachs salzhaltig Gmisch us Buchte und Binneseeje.

Gschicht[ändere | Quälltäxt bearbeite]

Historischi Charte vom östliche Schwarze Meer mitem Kaukasus

S Asowsche Meer isch i de Antiki as Mäotis (agr. Μαιῶτις λίμνη, Maiōtis limnē; lat. Maeotis palus) gnennt wore, de Name het s Meer vom Volch vo de Mäotier öberchoo, wo im Oste vom Asowsche Meer glebt hend. Ab em 7.Jh.v.Chr. hend griechischi Koloniste us Milet am Asowsche Meer afange Händlerkolonie gründe und im 5.Jh.v.Chr. isch a de Stross vo Kertsch s Bosporansiche Riich entstande, e riiche Händlerstaat, wo bis is 4.Jh.n.Chr existiert het und de Handel mit de Skythe und Sarmate am Asowsche Meer kontrolliert het. Ends 3.Jh. sind Germane i de Umgebig uuftaucht und ab 375 d Hune. Noch antike Quelle hend am Siwasch Heruler glebt und a de Stross vo Kertsch Krimgote und Hune. Im 7.Jh. hend d Chazare e Riich um s Asowsche Meer ume errichtet, werum da Meer im Mittelalter au Chasarisches Meer gnennt woren isch.

Wertschaft & Vercher[ändere | Quälltäxt bearbeite]

De Fischfang isch im fischriiche Meer e wichtige wertschaftliche Faktor, dezue chunnt no de Tourismus, wo wege de de flache Stränd uf Familie uusgrichtet isch.

Well de Don mit Kanääl mit de Wolga, und öber die mit em Chaspische Meer, de Ostsee und em Wiisse Meer verbunden isch, stellt s Asowsche Meer mit de Stroos vo Kertsch e wichtigi Verbindig zum Schwarze Meer dar.

Dä Artikel basiert uff ere fräie Übersetzig vu dere Version vum Artikel „Asowsches_Meer“ vu de dütsche Wikipedia.

E Liste vu de Autore un Versione isch do z finde.