Slawen

Us der alemannische Wikipedia, der freie Dialäkt-Enzyklopedy

Länder, wo e slawischi Mehrheit hai und wenigstens ei slawischi Sproch Nationalsproch isch
    West Slawisch
    Ost Slawisch
    Süd Slawisch

D Slawä si ethnisch und linguistisch e Deil vo de indoeuropäische Völker und läbe vor allem im östlige Middeleuropa und in Osteuropa.

[ändere] Gschicht

Die hütige slawische Völker hai sech us mehrere Stämm, vo zu eim Volk ghört händ, entwicklet. Si sind vorallem dur iri Spraach mitenand verbunde gsi.

[ändere] Urheimet

D Urheimet vo de Slawe isch nonig klärt. Si händ in dr erste Helfti vom erste Johrduusig im Biet vom hüttige Pole und dr Ukraine gläbt ^[1], mögligerwiis au im östlige Dütschland und westlige Russland. Si si in änge Kontakt mit de Gote und de iranisch schwätzende Alane, Sarmate und Skythe cho und hän sich mit dene vermischt.^[1]

[ändere] Verbreitig

Vo dr Mitti vom erste Johrduusig a si Deil vo de Slawe abgwanderet und die hüttigi Iideilig in West-, Ost- und Südlawische Völker isch entstande.^[2] Mehreri slawischi Stämm sind i de Balkan gwandered, wo sich Spannige zwüschä de Ilyrische Urbevölkerig (Albaner) und de Slawe (vorallem Serbe und Alpeslawe) entwicklet händ. Daher no dä hüttigi Hass, zwüschä Kosovo-Albaner und Serbe.

D' Slawä sind i de Vergangehäjt nöd so es chriegerisches Volk gsii, händ aber gäge 500 n. Chr. d' Römer aafange plündere.

[ändere] Soziali Ornig

Die slawischi Gsellschaft isch uf dr Sippe (rod) ufbaut gsi. Mehreri vo dene hai e Stamm bildet, wo si Afüehrer in Wahle bestimmt het. D' Slawe händ Stammeseltischte (starosta) und kei Herrscher gha, und Bezeichnige für Könige und Kaiser si us andere Spraache übernoh worde: Kral vom Karl em Grosse, Cejsar vom Julius Cäsar oder Knjež vom germanische kuning. D Slawe hai Volksversammlige (wetsche) kennt, z Russland isch d Dorfversammlig (mir) vo Bedütig gsi.^[3]

[ändere] Mythologii

Nume wenig isch bekannt über dr ursprünglig Glaube vo de Slawe. Sie hai e Sunnegott gha, dr Dashbog, e Gwittergott, dr Perun, und e Füürgott, Swarog. Si hai an vili übernatürligi Gstalte glaubt, Vampir, Huusgeister wo bi de Russe Domowoj gheisse hän, Naturdemone und Feä. Wenigstens e Deil vo de Slawe hai en Ahnekult kennt, sie hai de Götter Opfer brocht, mänggisch au Menscheopfer. Priester het s nume bi de Elb- und Ostseeslawe ge.^[4]

[ändere] Panslawismus

Es hät mehreri Versüche ghä es Panslawistisches Land z gründe. Im Süde het sich noch em Erste Wältchrieg under dr Füehrig vo Serbie Jugoslawie bildet, wo aber noch em Fall vom Kommunismus in de 1990er Johr noch johrelange Bürgerchrieg uusenanderbroche isch. Au d Union vo Tschechie und Slowakie het dr Kommunismus nit lang überläbt und d Sowjetunion het sich 1991 ufglöst.

[ändere] Religion

D' Slawä sind uursprünglich es heidnischs Volk gsii, sind sit em 6. Johrhundert z Pannonie, im 9. Johrhundert z Kroatie, Serbie, Bulgarie, dr Tschechei und Slowakie zum Chrischtetum konvertiärt. D Russe und Pole si vo Byzanz, respektiv vo Rom us im 10. Johrhundert christianisiert worde, d Wende erst im 11. und 12. Johrhundert. Die westlige Slawe ghöre ehnder zur römisch-katholische, die östlige und südlige in dr Mehrheit zu orthodoxe Chille. D Reformation het sich nume under gwüsse westslawische Völker wie de Sorbe, Masure, Tscheche und Slowake verbreitet. Under em Iifluss vo de Türke si Deil vo de Serbokroate, Bulgare und Mazedonier muslimisch worde.^[5]

[ändere] Slawischi Sproche

Lueg dr Hauptartikel Slawischi Sproche

Die hüttige slawische Spraache sind all zimli ähnlich zu änand. E wichtigi Rolle vor allem bi dr Ost- und Südslawe bildet debi s'im 9. Johrhundert in dr Gegend vu Thessalonike entstande Altchilcheslawisch (au Altbulgarisch), wo vo de Slaweapostel Kyrillos und Methodios bruucht worden isch, für zum die heilige Schrifte z übersetze. Im 12. Johrhundert het sich s Chilleslawisch afo verändere und sich de Volkssproche afo abasse. S Chilleslawisch isch währed Johrhunderte e Literatursproch gsi, wird aber hützudag nume no in dr Liturgii benutzt.^[6]

Hütt underscheidet mer zwüschä Ostslawische (Russisch, Wiisrussisch, Ukrainisch), Weschtslawischä (Polnisch, Tschechisch, Slowakisch, Kaschubisch, Sorbisch) und Südslawische Spraache (Slowenisch, Kroatisch, Serbisch, Makedonisch, Bulgarisch). D' Spraache sind all zimli äänlich, so das schriftlich öppä füfzg Prozänt chöned erchänned werdä.

D Slawe bruuche hauptsächlig zwei Schriftsystem: die Völker wo vo Byzanz uus christianisiert worde si benutze kyrillischi, die andere latiinischi Buechstabe.

[ändere] Etymologii

Dä Uursprung vom Namä vo dä Slawä isch no ungchläärt, aber es wird aagno, dass es vom Wort слŏвŏ (slóvó)"Wort" abgleitet isch.^[7] Wenigi anderi glaubed dass es aber vom slawische Wort слāвā (slává) "Ruhm, Fäscht" chunnt.

Ä baar slawischi Völker hei dr Name Slawe in ihrem Volksname biibhalte, wie d Slowene und d Slowake.

[ändere] Nowiis

1. ↑ ^{1,0 1,1} J. P. Mallory, Douglas Q. Adams, Encyclopedia of Indo-European Culture, Taylor & Francis, 1997, S.523
2. ↑ Dtv Lexikon, 1970, Band 17, p.94
3. ↑ Dtv Lexikon 1970, Band 17, S.95
4. ↑ Dtv Lexikon, 1970, Band 17, S.96
5. ↑ Dtv Lexikon 1970, Band 17, S.95
6. ↑ Meyers Lexikon Online: Kirchenslawisch
7. ↑ Roman Jakobson, Roman Osipovič Jakobson, Stephen Rudy, Selected Writings, Walter de Gruyter 1985, S.892