Kanton Appenzell Innerrhoden

Kantoo Appezöll Inneroode

Eidgenössischer Stand Appenzell Innerrhoden
Basisdate
Abchürzig:	AI
Sproche:	Dütsch
Hauptort:	Appezöll
Flächi:	173 km² (Rang 25)
Iwohner:	15'688 (2010) (Rang 26)
Bevölkerigsdichti:	91 Iw./km² (Rang 20)
Bitritt zue dr Eidgnosseschaft:	1513
Websyte:	www.AI.ch
Karte

Dä Kantoo Appezöll Innerroode (Hochtütsch: Appenzell Innerrhoden; Französisch: Appenzell Rhodes-Intérieures; Italienisch: Appenzello Interno; Rätoromanisch: Appenzell Dadens) ischt en Kantoo im Nordoschte vo da Schwiiz.

Appezöll Innerroode ischt dä Kanto mit dä nidrigschte Yywoonerzahl (rond 15'700) ond de zweitchlinschte Flächi (noch Basel-Stadt).

Geografii

Innerroode gränzt an Kantoo Appezäll Osserroode ond ischt im Übrige vom Kantoo Sangalle omgee.

D Laag vom Kantoo Appezöll Inneroode i de Ostschwiz

Dä högscht Bärg ischt dä Sääntis im Alpschtä mit ännere Höchi vo 2'502 m ü.M. Vo dä Schwägalp us fahrt sit 1935 a Säälbaa uf dä Gipfel ufi. Doba häts a Wätterstazioo, än wichtiga Vermässigspunkt, än 123-ahalb Meter hööcha Sändemascht ond zwee Wertshüüser. Dä Sääntis ischt ä beliebts Uusflugsziil för Wanderer ond Turischta wo bi schönem Wätter d'Uusischt vo da Alpachetti bis zom Bodasee gnüüssa wend.

Im Kantoo Appezöll Innerroode gits no a paar wiiteri Säälbaane uf Uusichtspünkt; z.B. Höch Chaschte, Ebänalp und Chroobärg. I däm Kantoo schaffid vill meh Lüüt im Bereich Turismus als i da Landwertschaft. Im gaanze Alpschtää gits a grosses Netz vo guat onderhaaltne Wanderwääg; z.B. zum Seealpsee, Sämtissersee ond Fäälasee.

Gschecht

Bi dä Appezöller Landstäälig im Johr 1597 sönd us em damoliga Kanto Appezöll us konfässionöllä Grönd di beeda Halbkantö Appezöll Osserroode und Appezöll Innerroode entstandä. Di inneri Rood ischt hüt no öberwiegend katholisch ond di össer Rood ehnder reformiert.

Politik

Dä Kantoo bestoot us 6 Bezirk, wo aber meh d Funkzione vo Gmäände öbernämmid. Si sönd 1872 os de ehemoolige Roode entstande.

• Appezöll, 5618 Yywooner (2004)
• Rüüti, 3065 Yywooner (2004)
• Schwendi, 2072 Yywooner (2004)
• Oberegg, 1866 Yywooner (2004)
• Goote, 1415 Yywooner (2004)
• Schlatt-Hasle, 1135 Yywooner (2004)

Besträbige wo dia Uftälig het söle veäfache sönd vom Grosse Root as Strukturreform uusgschaffet worde. S Volch hät da aber a dä Landsgmäänd vom 29. Apröl 2012 abgleent.

Bsondrigs

Zo dä Spezialitäta vo Innerroode ghört onder anderem dä wörzig Appezöller Chääs, dä gsond Alpäbetter, dä Appezöller Biber ond da Humor, womer äm Appezöller Volch noosäät. Änn wo dä Humor öber s Appezöllerland usi bekannt gmacht hät, isch de Komiker Simon Enzler.

• Appezöller Pflanzenäme
• Appezöller Tiernäme

Appezöll us dä Vogelpärspektive

Lueg au

 Allmänd (Commons): Kanton Appenzell Innerrhoden — Witeri Mulitimediadateie zum Artikel

• Bezirk vom Kantoo Appezöll Innerroode
• Artikel Appenzell (Innerrhoden) im Historische Lexikon vo dr Schwiiz
• Offiziölli Wäbsiite vo Innerroode
• Appezöllerland (Tourismus)

Ainzelnoowiis

Dä Artikel basiert uff ere fräie Übbersetzig vum Artikel „Kanton_Appenzell_Innerrhoden“ vu de dütsche Wikipedia. E Liste vu de Autore un Versione isch do z finde.