Ludwig Forrer
| Dialäkt: Züritüütsch |
De Ludwig Forrer (* 9. Februar 1845 z Islike bi Goochlinge im Kanton Thurgau; † 28. Septämber 1921 z Bern) isch en Schwiizer Politiker gsii (FDP).
De Forrer, wo zwar im Thurgi uf d Wält choo, aber en Bürger vo Bäretschwiil im Züri-Oberland gsii isch, hät a der Universität Züri Jus gstudiert. und isch 1870 Staatsaawalt woorde; ab 1873 hät er z Winterthur en eiges Aawaltsbüro ghaa. 1867 hät er sich de Demokratische Partei aagschlosse, wo spöter i der FDP uufggange isch.
1868/69 hät er em Zürcher Verfassigsrat aaghört, wo di birüemt diräktdemokratisch Kantonsverfassig vo 1869 uusgschaffet hät. 1870 isch er in Kantonsrat gwählt worde, und deet hät er bis 1900 mitgmachet. Wäge sim Iisatz für demokratischi und soziali Rächt hät er de Spitzname «Löi vo Winterthur» ghaa.
Vo 1875 bis 1900 (mit eme churzen Underbruch) isch er au im Schwiizer Nationalrat ghocket. As Nationalrat hät er sich für es für es Chranke- und Unfallversicherigsgsetz nach tüütschem Vorbild iigsetzt, isch aber daademit gschiiteret.
Er isch am 11. Dezämber 1902 in Bundesrat gwählt worde. Am 31. Dezämber 1917 hät er siis Amt übergää, nachdem er am 11. Dezember siin Rücktritt aagchündt gha hät. Wäret sinere Amtsziit isch er dene Departemänte vorgstande:
- 1903: Handels-, Induschtrie- und Landwirtschaftsdepartemänt
- 1904–1905: Departemänt vom Innere
- 1906: Politischs Departemänt
- 1907: Militärdepartemänt
- 1908: Poscht- und Iisebahndepartemänt
- 1908: Juschtiz- und Polizeidepartemänt
- 1909–1911: Poscht- und Iisebahndepartemänt
- 1912: Politischs Departemänt
- 1913–1917: Poscht- und Isebahndepartemänt
Er isch Bundespresidänt gsii i de Jahre 1906 und 1912 und Vizepresidänt i de Jahre 1905 und 1911. As Bundesrat hät er gäge grosse Widerstand chöne de Gotthardvertrag zwüschet de Schwiiz, em Tüütsche Riich und Italie vo 1909 duresetze.
Literatur
[ändere | Quälltäxt bearbeite]- Walter Labhart: Ludwig Forrer In: Historisches Lexikon vo dr Schwiiz.
- Walter Labhart: Ludwig Forrer. In: Urs Altermatt (Hrsg.): Das Bundesratslexikon. NZZ Libro, Zürich 2019, ISBN 978-3-03810-218-2, S. 240–245.
- Walter Labhart: Bundesrat Ludwig Forrer, 1845–1921 (= Neujahrsblatt der Stadtbibliothek Winterthur. Band 303). Stadtbibliothek Winterthur, Winterthur 1973.
Weblink
[ändere | Quälltäxt bearbeite]- Naalass i dr Zentralbibliothek Züri
- Privatarchiv Ludwig Forrer in dr Archivdatebank vom Schwiizerische Bundesarchiv
| Vorgänger Walter Hauser |
Mitgliid im Schwiizer Bundesrat 1903–1917 |
Nochfolger Robert Haab |
|
Dä Artikel basiert uff ere fräie Übersetzig vum Artikel „Ludwig_Forrer“ vu de dütsche Wikipedia. E Liste vu de Autore un Versione isch do z finde. |