Ruth Metzler-Arnold

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Züritüütsch (See)
Portrait Ruth Metzler-Arnold

D Ruth Metzler-Arnold (* 23. Mai 1964 z Willisau), Bürgerin vo Riichethal, Willisau und vo Balge, isch e ehemaligi Schwiizer Bundesrötin (CVP).

Uusbildig und Bruef[ändere | Quälltäxt bearbeite]

Nach eme Schtudium vo de äecht a dr katholische Universität Friburg isch d Ruth Metzler zäme mit ihrem Maa Lukas Metzler in Kanton Appezell-Innerrhode züglet.

I dere rächt konservative Umgäbig isch si, au wänn Zuezogeni und Frau, rasch bekannt und schliesslich vo dr Landsgmeind 1997 als Verträtteri vo dr CVP zur kantonale Seckelmeischteri (Vorsteherin vom Finanzdepartement) gwählt worde. Das isch aber nu es Teilziitmandat gsii; denäbed hät si z Sanggalle binere Wirtschaftsprüefigsgsellschaft gschaffet.

Wahl in Bundesrat[ändere | Quälltäxt bearbeite]

Wäge ihrer Wählerschtärchi, wo alewiil meh gschwiinet isch, hät d CVP 1999 müese fürche, nach de Nationalratswahle im Oktober eigetli nümme Aaschpruch uf zwei Sitz im Bundesrat z haa. Drum sind di beide CVP-Bundesrät Arnold Koller und Flavio Cotti scho im Früelig, nün Mönet vor em ordentliche Uuslaufe vo ihrer Amtsziit, zruggträtte, zum unverbruuchte Chräft als Wahllokomotive Platz z mache und i dr Hoffnig, dass es s Parlament nöd waage würdi, bi dr Beschtätigungswahl vo dr Landesregierig im Herbscht es Mitgliid vo dr Landesregierig, wo erscht grad gwählt worde isch, scho wider abzwähle.

Für d Nachfolg vom Appezeller Bundesrat Arnold Koller isch debi scho früe e Frauekandidatur in Vordergrund trätte. D Ruth Metzler, wo uusserhalb vo Appezell völlig unbekannt gsi isch, hät zerscht ufgrund vo ihrer gringe Erfahrig und vo ihre fehlende Känntniss vom eidgnössische Politbetriib nu als Ussesiiterin ggulte; si hät aber mit ihrer Juged und ihrem unbekümmerete, sympathische Uufträtte bald e positivi Grundschtimmig chönne uufboue. So isch si vo dr CVP nebed dr Sanggaller Finanzminischterin Rita Roos als offizielli Kandidatin uufgschtellt worde.

Am 11. März 1999 isch d Ruth Metzler im vierte Wahlgang und mit acht Schtimme Mehrheit (126:118) vo dr Schwiizerische Bundesversammlig in Bundesrat gwählt worde. D Schtimme sind debii hauptsächlich us em rächte Parteieschpektrum choo, wil d Ruth Metzler als technokratischer und weniger sozial iigschtellt ggulte hät als d Rita Roos.

Als Bundesrätin[ändere | Quälltäxt bearbeite]

I dr Landesregierig hät si ufgrund vo ihrer Uusbildig s Eidgenössische Juschtiz- und Polizeidepartement übernaa, wo am ehnschte uf si zuegschnitte gsi isch. Deet hät si sofort mit ere Reie heisse Iise z tue ghaa, vor allem mit dr Flüchtlingswelle im Gfolg vom Kosovochrieg. In de folgende Jahre isch es ihre aber glunge, für alli Vorlage, wo si verträtte hät, i dr Volksabschtimmig e Mehrheit z finde.

Si isch im Jahr 2003 Vizepräsidentin vo dr Schwiizerische Eidgenosseschaft gsii und wär wahrschiinlich im Fall vo ihrer Widerwahl 2004 Bundespresidäntin worde.

D Abwahl[ändere | Quälltäxt bearbeite]

D Nationalratswahle im Herbscht 2003 händ zu wiitere empfindliche Schtimmeverluscht für dr Ruth Metzler ihri Partei CVP gfüert, währet di rächtsbürgerlichi SVP namal schtarch zuegleit hät und Aaspruch uf en zweite Sitz i dr Landesregierig erhobe hät (Zauberformle). Tatsächlich hät d Bundesversammlig d Ruth Metzler am 10. Dezember als erschts amtierends Regierigsmitglid sit 1872 nöd widergwählt und hät de Christoph Blocher a ihri Schtell gsetzt.

Die verweigereti Widerwahl vo de Ruth Metzler-Arnold isch erscht dr dritti entsprechendi Vorfall sit dr Gründig vom Schwiizerische Bundesschtaat 1848 gsii.

Aktuell[ändere | Quälltäxt bearbeite]

Qsicon Under Construction.png Sälle Artikel oder Abschnitt brucht e Iberarbeitig un sott dorum durgluegt werre. Des cha de sprochliche Stil, s Format vum Artikel, oder de Inhalt beträffe. Nächers isch in dr Regel uf dr Diskussionssite agee. Hilf bitte mit, die kritisierte Passasche z verbessere un nimm druffabe die Markierig use.

D Ruth Metzler isch sit April 2005 als Chefjurischtin und Mitgliid vo dr Gschäftsleitig vo Novartis Frankriich tätig. Si hät ihre Wohnsitz vo Appezell-Innerrhode uf Paris verleit.

Literatur[ändere | Quälltäxt bearbeite]

Weblink[ändere | Quälltäxt bearbeite]

 Commons: Ruth Metzler-Arnold – Sammlig vo Multimediadateie
Information icon.svg Dä Artikel basiert uff ere fräie Übersetzig vum Artikel „Ruth_Metzler-Arnold“ vu de dütsche Wikipedia.

E Liste vu de Autore un Versione isch do z finde.