D Grossbasler Altstadt

Grossbasler Altstadt Quartier vo Basel
Flechi	0,37 km²
Iiwohner	2088 (Jan. 2003)
Bevölkerigsdichti	2088 / 0.37 Iiwohner/km²
Usländeraadeil	23,7 %
BFS-Nr.	2701-001
Postleitzahl	4001, 4051

Dialäkt: Baseldütsch

D Grossbasler Altstadt isch ä Quartier vo der schwizerische Stadt Basel und bezeichnet dä Deil vo der Altstadt, wo uf em lingge Ufer vom Rhii lit. Zsämme mit der Glaibasler Altstadt bildet si s historische Zentrum vo der Stadt, wo bis ins erste Johrhundert vor dr Ziitwändi zruggoht: uf em Münsterhügel het mä Fund us dr keltische und römische Ziit gmacht. S Stroossebild isch zum ä bedütende Deil no mittelalterlig mit änge, verwinklete Gässli mit Kopfsteipflaster und Hüserfassade, wo wenigstens deilwiis renoviert und in guetem Zuestand si. Au die meiste historische Gebäud vo Basel si in dr Grossbasler Altstadt: s Münster, wo noch em Groosse Ärdbebe vo 1356 widr ufbaut worden isch, d Gebäud vo dr alte Uni, die ehemolig Schuel uf Burg, und, wem mä vom Bärg abestiigt, s Roothus, wo am Afang vom 16. Johrhundert am Määrtblatz baut worden isch, odr d Barfüesserkiirche vo de Franziskaner, wo noch dr Reformazion ziitwiis as Lager bruucht und sit 1894 ä Deil vom Historische Museum isch.

D Quartiersgränze isch genau dört, wo früehner die inneri Stadtmuure us em 13. Johrhundert gstande isch. Vo dere Muure isch nüt me übrig und im 19. Johrhundert si au s Rhiidoor und die vier Schwibbööge abgrisse worde.

D Grossbasler Altstadt stosst nume an ei anders Stadquartier aa, nämlig an d Vorstedt. Mit der Mittlere Brugg und de Basler Fährene isch s no mit dr Glaibasler Altstadt uf der andere, und—wie mänggi Groossbasler dängge— falsche Siite vom Rhii verbunde.

D Iiwohner vo dr Altstadt si zum ä groosse Deil eltlig und öbben ä Viertel vo dr Bevölkerig si Usländer, die meiste drvo jungi Manne. D Zahl vo de Chinder und Jugendlige isch entsprächend chlii. D Behörde hai sich Müeh geh, d Altstadt widr z beläbe, und hai ä Deil vo de Büro us de historische Gebäud in anderi, üsseri Quartier verläit. Au s ehemolige Gfängnis, dr Lohnhof, isch umbaut worde, und dört het s jetzt ä Museum, Kulturrüüm drunder ä Mundarttheater im Chäller, ä Hotel und Privatwohnige.

Gebäud und Sehnswürdikeite

Chille

• S Basler Münster mit em Münsterplatz und dr Pfalz
• D Barfüesserkiirche mit em Barfi
• D Lienertskiirche
• D Martinskiirche
• D Peterskiirche

Museum

• S Antikemuseum
• S Historische Museum mit em Münsterschatz
  • S Muusigmuseum
• S Museum vo de Kulture
• S Naturhistorische Museum
• S Pharmazie-Historische Museum vo dr Uni

Sustigs

• S Roothus
• Dr Määrtblatz
• S Stadtkasino
• S Gymnasium am Münsterplatz
• S Hotel Les Trois Rois
• Dr Spaalehoof

Lueg au

• Dr Basler Münsterhügel
• Grossbasel
• Glaibasel

Fuessnote

Dä Artikel basiert uff ere fräie Übersetzig vum Artikel „Basel-Altstadt_(Grossbasel)“ vu de dütsche Wikipedia. E Liste vu de Autore un Versione isch do z finde.