Barfüesserkiirche

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
D Barfüesserkiirche und s Historische Museum Basel
Dialäkt: Baseldütsch

D Barfüesserkiirche (früener au Franziskanerkiirche) stoot in dr Schwizer Stadt Basel und isch en ehemooligi Klosterkiirche. Hüte isch in dr Kiirche e Däil vom Historische Museum Basel dehäi. Si lit an ere zentrale Laag in dr Innestadt vom Groossbaasel und dominiert dr Barfüesserblatz.

Vorgschicht[ändere | Quälltäxt bearbeite]

Sit 1231 het dr Bättelorde vo de Franziskaner, wo men e im dütschsproochige Ruum au Barfüesser gsäit het, in dr Stadt Basel breedigt. Zerst si si usserhalb vo dr Stadtmuure am hütige Petersgraabe dehäi gsi, wo noch iine s Kloster Gnadedaal baut worde isch. 1250 häi si vom Bischof Berthold vo Pfirt s Rächt überchoo, sich innerhalb vo de Stadtmuure aazsiidle. Dört isch zwüsche 1253 bis 1256 en ersti Klosterkiirche entstande, wo 1298 aabebrennt isch.

D Klosterkiirche[ändere | Quälltäxt bearbeite]

Dr Chor vo dr Barfüesserkiirche

Noch em Brand vo 1298 isch mit dr Understützig vom Bischof vo Basel, die spootgotischi Barfüesserkiirche baut worde. Si het e flachdeckts Langhuus überchoo und e Chor mit Glaasgmäld und eme Lettner. Dr Chor vo dr Barfüesserkiirche zelt mit sinere Hööchi und dr änge Fänsterfolg zu de ufreegendste Ruumschöpfige am Oberrhii.

D Brofanisierig noch dr Reformazioon[ändere | Quälltäxt bearbeite]

Au d Barfüesserkiirche isch wäärend dr Reformazioon im Joor 1529 Opfer vom Basler Bildersturm worde. Mä het sä blünderet und däilwiis demoliert. So si d Fänster mit de Glasgmäld und dr Lettner zerstöört worde und s Chloster het d Kiirche müesse ufgee. Us em Laine-Friidhoof, wo zur Barfüesserkiirche ghöört het, het mä 1529 en öffentlige Blatz gmacht und d Kiirche isch schrittwiis brofanisiert worde. So het sä d Stadt as Waarelaager und spööter as Salzlaager afo bruuche, was groosse Schaade an dr Bausubstanz aagrichdet het. 1882 hätt mä sä fast abbroche, aber dr Groossi Root het mit ere knappe Meerhäit beschlosse, si lo sii.

S Historische Museum Basel[ändere | Quälltäxt bearbeite]

Blakaat zur Eröffnig vom Historische Museum Basel im Joor 1894

Zwüsche 1890 und 1894 häi d Archidekte-Brüeder Kelterborn d Barfüesserkiirche zum Historische Museum vom Kanton Basel-Stadt umbaut. Drbii si d Siteschiff verchliineret worde, mä het s Dach umbaut und under anderem dr WestGiibel hööcher gmacht. Dorum isch s schmaale middlere Fänster vo dr Kiirche in dr Fassade zum Barfüesserblatz aane nit in dr gliiche Fallinie wie dr Giibel, sondern e chli gege rächts versetzt. Zum d Ustelligsflechi vergröössere het mä in de Siteschiff Empore ufzooge.

Zwüsche 1975 und 1981 het mä s Geböid müesse restauriere, wil d Salzrückständ immer no Schaade aagrichdet häi, und mä het die früenere Umbaute wider rückgängig gmacht. Mä het d Empore uf de Site uusegrisse, dr Pfiiler vom Middelschiff usgwäggslet, der Lettner, wo 1843 abbroche worden isch, rekonstruiert und dr Kiircheruum resakralisiert. S Suterräng isch vergröösseret worde und mä het zuesätzligi Usstelligsrüüm iibaut.

Weblingg[ändere | Quälltäxt bearbeite]

 Commons: Barfüsserkirche Basel – Sammlig vo Multimediadateie

47.5544583333337.5905916666667Koordinaten: 47° 33′ 16″ N, 7° 35′ 26″ O; CH1903: 611439 / 267094

Information icon.svg Dä Artikel basiert uff ere fräie Übersetzig vum Artikel „Barfüsserkirche“ vu de dütsche Wikipedia.

E Liste vu de Autore un Versione isch do z finde.