S Dütsche Kaiserriich

Dütschs Kaiserriich 1871–1918
Faane Wabbe
← Navigation →
Wahlspruch: „Gott mit eus“
Verfassig	Verfassig vom Dütsche Riich vom 16. April 1871
Amtssprooche	Dütsch
Hauptstadt	Berlin
Regierigsform	Konstituzionelli Monarchii
Staatsoberhaupt – 1871 bis 1888 – 1888 – 1888 bis 1918	dr Dütsch Kaiser, Köönig vo Pröisse Wilhelm I. Friedrich III. Wilhelm II.
Regierigschef – 1871 bis 1890 – 1890 bis 1894 – 1894 bis 1900 – 1900 bis 1909 – 1909 bis 1917 – 1917 – 1917 bis 1918 – 1918	Riichskanzler Fürst Otto von Bismarck Graf Leo von Caprivi Chlodwig zu Hohenlohe-Schillingsfürst Fürst Bernhard von Bülow Theobald von Bethmann Hollweg Georg Michaelis Graf Georg von Hertling Prinz Max von Baden
Flechi – 1910	540.858 km²
Iiwooner – 1871 (1. Dez.) – 1890 (1. Dez.) – 1910 (1. Dez.)	41.058.792 49.428.470 64.925.993
Bevölkerigsdichdi – 1871 – 1890 – 1910	76 Iiwooner pro km² 91 Iiwooner pro km² 120 Iiwohner pro km²
Wäärig	1 Mark = 100 Pfennig
Gründig – 1. Januar 1871 – 18. Januar 1871	Wo d Novämberverdrääg in Chraft dräte si Broklamazioon
Nazionaalhümne	Käini. Kaiserhymne: Heil dir im Siegerkranz
Nazionaalfiirdig	inoffiziell am 2. Septämber (Sedandaag)
Zitzoone – 1871 bis 1893 – 1893 bis 1918	käi äihäitligi Zitzoone UTC+1 MEZ
Kfz-Kennzäiche – 1871 bis 1907 – 1907 bis 1918	käi äihäitligi Regelig D
Charte
Länder vom Dütsche Kaiserrich

Dütschs Kaiserrich isch e Bezeichnig für s Dütsch Riich im Zitruum vo 1871 bis 1918. Mit ihm wird zwüsche em Dütsche Riich als Monarchii und de System differenziert, wo noch em cho si (Weimarer Republik, Nationalsozialismus, BRD). Es isch mit de Riichsgründig am 18. Januar 1871 im Spiegelsaal vom Schloss Versailles noch em Siig vom Norddütsche Bund und de süddütsche Staate, wo mit em verbündet gsi si, im Dütsch-Franzöösische Chrieg gründet worde und het die chläidütschi Lösig under dr Herschaft vo de pröissische Hoochezoller verwirkligt.

De Monarchi seit mer au Zweits Riich, s Heilig Römisch Riich wäär doodrmit s Erst Riich. Der Bundesstaat, wo offiziell dr Naame «Dütschs Riich» gha het, isch bis zur Novemberrevolution und de Abdankig vom Dütsche Kaiser und König vo Preusse Wilhelm II. am 9. November 1918 e konstitutionelli Monarchii ksi, wo nach em monarchische Brinzip usgrichtet gsi isch.

Geografii

S Kaiserriich isch z Mitteleuropa gläge, isch rund 540.858 km² gross ksi und hät acht Nachbarstaate gha:

Im Norde hät s a Dänemark (77 Kilometer), im Nordoste und Osten a s Russische Riich (1.322 Kilometer), im Südoste und Süde a Österriich-Ungarn (vor allem a s österriichische Kronland Böhme) (2.388 Kilometer), im Süde a d Schwiiz (385 Kilometer), im Südweste a Frankriich (392 Kilometer), im Weste a Luxemburg (219 Kilometer) und Belgie (84 Kilometer) und im Nordwese an d Niderland (567 Kilometer) gränzt.

Die Grenze isch insgesamt 5.434 Kilometer lang ksi (ohni d Gränze im Bodesee).

Hüt isch s ehemalige Staatsgebiet uf Dütschland, Pole, Tschechie, Russland, Litaue, Belgie, Niderland, Frankriich und Dänemark verteilt.

Gschicht

Vorgschicht

D dütschi Gschicht vom 19. Johrhundert isch bis zu de Riichsgründig vo ständige politische und territoriale Veränderunge prägt ksi, wo nach em Ändi vom Heilige Römische Riich, wo im Johr 1806 dur d napoleonischi Chrieg ufglöst worde isch, iträte sind. Mit de Understüzig vom französische Kaiserriich vom Napoléon I. isch im gliche Jahr de Rhiibund gründet worde.

Märzrevolution 1848 in Berlin

Maiufstand in Dresde 1849

In de Folgezit hät sich s dütsch Nationalbewusstsi verstärkt und d Lüt händ under em Iifluss vo der französische Revolution und de Befreiigschrieg gäge de Napoléon, nacheneme liberale dütsche Nationalstaat gstrebt. Wobi mer es Riich uf de Grundlag vo de grossdütsche Lösig mit em Ibezug vo Österrich hät welle schaffe.

Die einzelne Fürste händ aber nach em Siig über Frankriich kei Interesse dadra gha. Uf em Wiener Kongräss isch 1815 lediglich de Dütschi Bund, als lockeri Verbindig zwüsche dene Staate, gründet worde.

Mit de liberale und bürgerlich-demokratische Bewegige isch es im Johr 1848 zu zahlriiche Erhebige in ganz Europa cho. In de dütsche Staate isch es zu de Märzrevolution cho. De Versuech vo de Frankfurter Nationalversammlig, en Grossteil vo de dütsche Staate uf ere konstitutionelle Basis z vereinige, isch gschiteret. De preussisch König Friedrich Wilhelm IV., wo men em die dütsch Kaiserkrone abote hät, hät nöd welle uf d Beruefig uf sis „Gottesgnadetum“ verzichte und hät wege dem abglehnt.

De Dütschi Bund hät au nach de Märzrevolution witer existiert. Im Johr 1864 isch es aber zum Dütsch-Dänische Chrieg cho, wo Preusse und Österriich zwar verbündet ksi sind, wo s aber später zum Strit um Schleswig-Holstein cho isch. 1866 isch de Dütschi Chrieg zwüsche Preusse und Österriich usbroche. I dem hät Preusse mit einige norddütsche Staate und zämme mit em 1861 gründete Königriich Italie gäge Österriich und di süddütsche Staate kämpft. Nach de Niderlag vo Österriich isch 1867 de Norddütsch Bund under preussischer Führig gründet worde. Die süddütsche Staate händ mit Preusse Schutz- und Trutzbündnis abgeschlosse.

1870 isch, wäge Stritigckeite zwüsche Preusse und Frankriich um die spanisch Erbfolg, de Dütsch-Französisch Chrieg usbroche. Frankriich, wo de Chrieg aagfange hät, hät de Chrieg verlore. De preußisch Ministerpräsident Otto von Bismarck hät das gnutzt und hät versuecht, die süddütsche Staate im Rahme vo de chlidütsche Lösig in es geints Riich izbinde.

Riichsgründig

→ Hauptartikel: Dütschi Riichsgründig

Proklamation vom dütsche Kaiserriich im Spiegelsaal vom Schloss Versailles

Nach em dütsche Sieg bi Sedan und de Gfangenahm vom französische Kaiser Napoleon III. (beides am 2. September 1870) isch am 18. Januar 1871 de preussischi König Wilhelm I. von de dütsche Bundesfürst zum erste dütsche Kaiser im Spiegelsaal vom Schloss Versailles proklamiert worde. Die preussischi Domination im neue Staat isch damit festgschribe ksi. De bayrischi König Ludwig II. hät aber erst nachere erhebliche Bestächigssumme vo 4 bis 5 Millione Goldmark dem zuegstimmt.

Doch de Bismarck hät müesse no witeri Zuegständniss mache und de süddütsche Staate sog. Reservaträcht iiruume. So händ d Königrich Bayre, Württebärg und Sachse i Frideszite e eigeni Armee gha (Bayrischi Armee, Württebärgischi Armee und Sächsischi Armee) gha, und Bayre und Württebärg händ s eignig Postwäse bhalte. Die süddütsche Staate händ au iri staatliche Iisebahne (Königlich Bayerischi Staatsiisebahne, Königlich Württebärgischi Staatsiisebahne, Großherzoglichi Badischi Staatsiisebahne, Großherzoglichi Hessischi Staatsiisebahne) und witeri Reservaträcht gha.

Am 2. März 1871 isch s Elsass und en Teil vo Lothringe vom Riich annektiert worde. Us de beide Teil hät mer spöter s Riichsland Elsass-Lothringe gründet. Am 3. März 1871 isch es dänn zu de erste Riichstagswahle cho. Di erst konstituierendi Riichstagssitzig hät am 21. März im Preussische Abgordnetehuus z Berlin stattgfunde, wo zur Riichshauptstadt erklärt worde isch. D Riichsverfassig vom Bismarck isch am 16. April in Chraft träte.

De Friede vo Frankfurt hät am 10. Mai offiziell de Dütsch-Französischi Chrieg beändet. Dur s Riichsmünzegsetz isch d Goldmark als einheitlichs Zahligsmittel im Riich igfüert worde. Die neu Währig hät uf em Goldstandard basiert.

Entwicklig bis 1918

Wääred em Kaiserriich isch Dütschland wirtschafts- und sozialgschichtlig dur d Hoochindustrialisierig brägt gsi. Ökonomisch und sozial-strukturell isch in de letschte Joorzäänt vom 19. Joorhundert us eme Agrarland en Industriiland worde. Au d Bedütig vom Dienstläistigssektor isch gwaggse, wo dr Handel und s Bankwääse sich entwicklet häi. Die franzöösische Chriegsreparazioone noch 1871 häi d Wirtschaft no witer aakurblet bis es 1873 zum sogenannte Gründerchrach choo isch, und die langjöörigi Konjunkturkrise, wo vo däm usglööst worden isch, het s Waggsdum für e Zit usbrämst. Das het zwar erheebligi politischi Folge ghaa, het aber an dr strukturelle Entwicklig zum Industriistaat nüt gänderet.

D Gsellschaft het sich stark afo verändere: d Bevölkerig isch rasch gwaggse, d Binnewanderig und d Urbanisierig häi die stedtische und industrielle Zentre versterkt. D Gsellschaftsstruktur het sich wääsentlig veränderet, wil die stedtischi Arbäiterbevölkerig grösser worden isch und – vor allem vo öbbe 1890 aa – au dr nöi Middelstand us Techniker, Aagstellte, und chliine und middlere Beamte sterker worde isch. Die wirtschaftligi Bedütig vom Handwärk und vo dr Landwirtschaft hingege isch eender zrugggange, wemm mä sä uf iiri Biidrääg zum Bruttosozialprodukt beziet. Dr Aadel allerdings het sis hooche gsellschaftlige Brestiisch bhalte und au si vorherrschendi Rolle bim Milidäär, in dr Diplomatii und dr hööchere Zivilverwaltig.

Die inne- und ussepolitischi Entwicklig het dr Otto von Bismarck bestimmt, dr ersti Kanzler, wo vo dr Riichsgründig bis 1890 im Amt gsi isch und am lengste vo alle Riichskanzler gregiert het. Si Regierigszit cha mä in e relativ liberaali Faase, wo vo innepolitische Reforme und vom Kulturkampf brägt gsi isch, und in e eender konservativ brägti Zit noch 1878/79 iidäile. As Zäsur gältet dr Übergang zum Staatsintervenzionismus mit dr Iifüerig vo Schutzzöll, vo dr Sozialversicherig und vom Sozialistegsetz.

Dr Bismarck het sich Müe gee, s Riich ussepolitisch mit eme komplexe Bündnissisteem abzsichere. In siner Amtszit het au dr dütsch Imperialismus in Übersee aagfange, wenn er au erst spööter intensiviert worde isch. Wäge däm het s immer mee internazionaali Inträssekomflikt mit andere Koloniaalmächt gee, bsundrigs mit dr Wältmacht Groossbritannie.

D Zit noch dr Eera vom Bismarck wird vilmol as s Wilhelminische Zitalter bezäichnet, wil dr Kaiser Wilhelm II. (vo 1888 aa) nochdäm dr Bismarck entloo worden isch, persönlig groosse Iifluss uf d Politik usgüebt het. Allerdings hä drnääbe au anderi Aktöör, wo zum Däil mit em konkurriert häi, e wichdigi Rolle gschbiilt. Si häi d Entschäidige vom Kaiser beiiflusst und wäge däm het s vilmol usgsee, wie wenn si Politik widersprüchlig und unberächebar sig.

D Masseverbänd und Volksbardeie si gwaggse und au d Press het immer mee Bedütig überchoo und mit iire die öffentligi Mäinig. Nit zletscht wäge däm het d Regierig mit ere imperialistische Wältpolitik, mit ere antisozialdemokratische Sammligspolitik und ere populääre Flotterüstig brobiert, mee Understützig vo dr Bevölkerig überzchoo. Ussepolitisch het aber im Wilhelm sis Strääbe noch Wältmacht Dütschland in d Isolazioon driibe und mit dere Politik het s Riich drzue biidräit, ass d Gfoor vom ene groosse Chrieg gröösser worde isch. Wo dr Ersti Wältchrieg schliesslig 1914 usglööst worde isch, isch s Riich in e Meerfrontechrieg verwicklet worde. Au in dr Innepolitik het s Milidäär an Iifluss gwunne. Wo denn aber de Erfolg an de Fronte usbliibe und immer mee Soldaate gfalle si und dr Häimet sich die soziali Noot versterkt het, isch d Monarchii immer weniger populäär worde.

Erst gege s Ändi vom Chrieg isch s 1918 zu de Oktoberreforme choo, wo under anderem bestimmt häi, ass dr Riichskanzler s Verdraue vom Riichsdaag müessi haa. Scho bald druf isch in dr Novämberrevoluzioon d Republik usgrüeft worde, und die verfassigsgääbendi Nazionaalversammlig z Weimar het s Riich 1919 as parlamentarischi Demokratii konstituiert. S hütige Dütschland isch völkerrächtlig mit em Dütsche Riich vom Joor 1871 idäntisch, au wenn sich d Form vo dr Regierig und s Staatsgebiet sithär e baar Mol gänderet häi.

Bundesstaate (Länder)

D Verwaltigsgliderig im Dütsche Rych

S Kaiserriich hät sich us 25 autonome Bundesstaate (Bundesglieder) zämmegesetzt. Di mäiste sind konstituzionelli Monarchiie gsii, aber mit de Hansestädt Hamburg, Bremen und Lübeck häts au Republike gä. S Riichsland Elsaß-Lothringe het en bsundere Status gha, s isch aber 1911 de Bundestaate fast gliichgstellt worde.

Die Liste undedraa füert d Bundesstaate noch dr offizielle Räiefolg uf, wie si in dr Riichsverfassig gstande isch.

Gliederig vom dütsche Kaiserriich 1871–1918

Bundesstaat	Staatsform	Hauptstadt	Flächi in km² (1910)	Iwohner (1910)
Königriich Preusse	Monarchie	Berlin	348.780	40.165.219
Königriich Bayern	Monarchie	Münche	75.870	6.887.291
Königriich Sachse	Monarchie	Dresde	14.993	4.806.661
Königriich Württeberg	Monarchie	Stuegert	19.507	2.437.574
Grossherzogtum Bade	Monarchie	Karlsruhe	15.070	2.142.833
Grossherzogtum Hesse	Monarchie	Darmstadt	7.688	1.282.051
Grossherzogtum Mecklenburg-Schwerin	Monarchie	Schwerin	13.127	639.958
Großherzogtum Sachse-Weimar-Eisenach	Monarchie	Weimar	3.610	417.149
Grossherzogtum Mecklenburg-Strelitz	Monarchie	Neustrelitz	2.929	106.442
Grossherzogtum Oldenburg	Monarchie	Oldenburg	6.429	483.042
Herzogtum Braunschweig	Monarchie	Braunschweig	3.672	494.339
Herzogtum Sachse-Meininge	Monarchie	Meiningen	2.468	278.762
Herzogtum Sachse-Altenburg	Monarchie	Altenburg	1.324	216.128
Herzogtum Sachse-Coburg und Gotha	Monarchie	Coburg und Gotha	1.977	257.177
Fürstetum Anhalt	Monarchie	Dessau	2.299	331.128
Fürstetum Schwarzburg-Rudolstadt	Monarchie	Rudolstadt	941	100.702
Fürstetum Schwarzburg-Sondershausen	Monarchie	Sondershausen	862	89.917
Fürstetum Waldeck	Monarchie	Arolsen	1.121	61.707
Fürstetum Reuss elteri Linie	Monarchie	Greiz	316	72.769
Fürstetum Reuss jüngeri Linie	Monarchie	Gera	827	152.752
Fürstetum Schaumburg-Lippe	Monarchie	Bückeburg	340	46.652
Fürstetum Lippe	Monarchie	Detmold	1.215	150.937
Freii und Hansestadt Lübeck	Republik	Lübeck	298	116.599
Freii Hansestadt Breme	Republik	Bremen	256	299.526
Freii und Hansestadt Hamburg	Republik	Hamburg	414	1.014.664
Riichsland Elsass-Lothringe	–	Strassburg	14.522	1.874.014
Dütsches Kaiserrich	Monarchie	Berlin	540.858	64.925.993

Staatssymbol

Woopen und Flaggen im Joor 1900

S Dütsche Kaiserriich hät kei offizielli Nationalhymne und am Aafang au kei offizielli Nationalfaane ka. Als Ersatz händ d Lieder Heil dir im Siegerkranz und Die Wacht am Rhein dient.

S Wappe vom Riich isch vo däm vo Preusse inspiriert gsi und hed de schwarz Riichsadler zeiget. Es isch offziell am 3. August 1871 igfüert worde.

Zerst isch mit Schwarz-Wiss-Rot d Bundesflagge vom Norddütsche Bund als Marinefaane und Handelsfaane überno worde. Erst 1892 isch si zur Nationalflagge bestimmt worde. D Farbe händ sich aagääblich us de Farbe vo Preusse schwarz und wiss und dene vo de Friie und Hansestädt (wiss über rot) zämmegsetzt.

Litratuur

Überblicksdarstellige

• Margaret Anderson, Sibylle Hirschfeld (Übersetzung): Lehrjahre der Demokratie – Wahlen und politische Kultur im Deutschen Kaiserreich. Steiner, Stuttgart 2009 ISBN 978-3-515-09031-5.
• Volker Berghahn: Das Kaiserreich 1871–1914. Industriegesellschaft, bürgerliche Kultur und autoritärer Staat (= Gebhardt. Handbuch der deutschen Geschichte; Bd. 16), 10., völlig nöi bearb. Ufl., Klett-Cotta, Stuttgart 2003, ISBN 978-3-608-60016-2 (Rezension).
• Gerd Fesser: Die Kaiserzeit. Deutschland 1871–1918. Hrsg. von der Landeszentrale für politische Bildung Thüringen. Erfurt 2000, ISBN 3-931426-39-4 (PDF, 296 kB).
• Ewald Frie: Das Deutsche Kaiserreich (= Kontroversen um die Geschichte). Wissenschaftliche Buchgesellschaft, Darmstadt 2004, ISBN 3-534-14725-1.
• Klaus Hildebrand: Das vergangene Reich. Deutsche Außenpolitik von Bismarck bis Hitler. Deutsche Verlags-Anstalt, Stuttgart 1996, ISBN 3-548-26557-X.
• Heinrich Hirschfelder, Wilhelm Nutzinger: Das Kaiserreich 1871–1918. 2. Auflage, Bamberg 1999, ISBN 3-7661-4632-7.
• Gerd Hohorst, Jürgen Kocka, Gerhard Ritter: Sozialgeschichtliches Arbeitsbuch Bd.2: Materialien zur Statistik des Kaiserreichs 1870–1914. Münche 1978, ISBN 3-406-05406-4.
• Matthew Jefferies: Imperial Culture in Germany, 1871–1918. Palgrave Macmillan, Basingstoke [u. a.] 2003, ISBN 1-4039-0421-9.
• Wilfried Loth: Das Kaiserreich. Obrigkeitsstaat und politische Mobilisierung. dtv, München 1996, ISBN 3-423-04505-1.
• Martina G. Lüke: Zwischen Tradition und Aufbruch. Deutschunterricht und Lesebuch im Deutschen Kaiserreich. Lang, Frankfurt am Main 2007, ISBN 978-3-631-56408-0.
• Sven Oliver Müller, Cornelius Torp (Hrsg.): Das Deutsche Kaiserreich in der Kontroverse. Vandenhoeck & Ruprecht, Göttinge 2009, ISBN 978-3-525-36752-0.
• Thomas Nipperdey: Deutsche Geschichte 1866–1918. Arbeitswelt und Bürgergeist. Beck, Münche 1990, ISBN 3-406-34453-4.
• Thomas Nipperdey: Deutsche Geschichte 1866–1918. Machtstaat vor der Demokratie. C.H. Beck, Münche 1992, ISBN 3-406-34801-7.
• Michael Stürmer: Das ruhelose Reich. Deutschland 1866–1918. Berlin 1983, ISBN 3-442-75526-3.
• Hans-Peter Ullmann: Das deutsche Kaiserreich 1871–1918. Suhrkamp, Frankfurt 1995, ISBN 3-518-11546-4.
• Volker Ullrich: Die nervöse Großmacht. Aufstieg und Untergang des deutschen Kaiserreichs 1871–1918. 5. Aufl., Fischer, Frankfurt am Main 2004, ISBN 3-596-11694-5.
• Volker Ullrich: Deutsches Kaiserreich. Fischer Kompakt. Frankfurt am Main 2006, ISBN 3-596-15364-6.
• Hans-Ulrich Wehler: Das Deutsche Kaiserreich 1871–1918. Vandenhoeck und Ruprecht, Göttinge 1973, ISBN 3-525-33542-3.
• Hans-Ulrich Wehler: Deutsche Gesellschaftsgeschichte. Bd. 3: Von der deutschen Doppelrevolution bis zum Beginn des Ersten Weltkrieges. 1849–1914. Beck, Münche 1995, ISBN 3-406-32490-8.
• Heinrich August Winkler: Der lange Weg nach Westen. Deutsche Geschichte 1806–1933. Bd. 1, Bundeszentrale für politische Bildung, Bonn 2002, ISBN 3-89331-463-6.

D Era Bismarck

• Wolfgang J. Mommsen: Das Ringen um den nationalen Staat. Die Gründung und der innere Ausbau des Deutschen Reiches unter Otto von Bismarck, 1850 bis 1890. Propyläen-Verlag, Berlin 1993 (= Propyläen Geschichte Deutschlands 7/1), ISBN 3-549-05817-9.

Die Wilhelminischi Epoche

• Wolfgang J. Mommsen: Bürgerstolz und Weltmachtstreben. Deutschland unter Wilhelm II. 1890 bis 1918. Berlin 1995 (= Propyläen Geschichte Deutschlands 7/2), ISBN 3-549-05820-9.
• John C. G. Röhl: Kaiser, Hof und Staat. Wilhelm II. und die deutsche Politik uf books.google.de. C.H. Beck, Münche 1988 (TB 2002), ISBN 978-3-406-49405-5.
• John C. G. Röhl: Wilhelm II., C.H. Beck, Münche 1993–2008:
  • Band 1: Die Jugend des Kaisers, 1859–1888 uf books.google.de. Münche 1993, ²2001, ISBN 3-406-37668-1.
  • Band 2: Der Aufbau der Persönlichen Monarchie, 1888–1900 uf books.google.de. Münche 2001, ISBN 3-406-48229-5.
  • Band 3: Der Weg in den Abgrund, 1900–1941. München 2008, ISBN 978-3-406-57779-6. (online-Rezension von Lothar Machtan, Institut für Geschichtswissenschaft, Universität Bremen auf H-Soz-u-Kult)

S Kaiserriich und dr Erst Wältchrieg

• Fritz Fischer: Griff nach der Weltmacht. Die Kriegszielpolitik des kaiserlichen Deutschland 1914/18 (1961), Droste 2000 (Nachdruck der Sonderausgabe 1967), ISBN 3-7700-0902-9.
• Jürgen Kocka: Klassengesellschaft im Krieg. Deutsche Sozialgeschichte 1914–1918. Göttinge 1978, ISBN 3-525-35984-5.
• Gunther Mai: Das Ende des Kaiserreichs: Politik und Kriegführung im Ersten Weltkrieg. Münche 1993, ISBN 3-423-04510-8.

Weblingg

 Commons: Deutsches Kaiserreich – Sammlig vo Multimediadateie

 Historische Rechtstexte zum Deutschen Kaiserreich im dütschsprochige Wikisource

• Das Kaiserreich Umfangriichi Site vom Dütsche Historische Museum
• Gesetz betreffend die Verfassung des Deutschen Reiches vom 16. April 1871 mit spööteren Änderige
• documentArchiv.de – Dokumänt über s Dütsche Kaiserriich, u. a. Sammlig vo Rächtsnorme, wo in dr Zit vo 1870/71 bis 1918 erloo worde si
• Gemeindeverzeichnis des Deutschen Reichs um 1900/1910
• Reichstagsprotokolle 1867–1895
• Deutsche Geschichte in Bildern und Dokumenten. 1866–1890, 1890–1918 (engl.)
• HGIS-Germany – historisch-geographisches Informationssystem der deutschen Staatenwelt seit 1815 (konkret: 1820–1914)
• Innen- und Außenpolitik im Kaiserreich
• Überblicksseite zu den Reichstagswahlergebnissen zwischen 1867 und 1918 (Tabellen bezüglich Parteien, Stimmenanteilen, Mandaten etc.)
• Bundesarchiv: Die Reichskanzler des Deutschen Reiches 1871 bis 1918