Weimarer Republik

Dütschs Riich Weimarer Republik 1918–1933
Fahne Wappe
← Navigation →
Verfassig	Verfassig vom Dütsche Riich vom 11. August 1919
Amtssprooch	Dütsch
Hauptstadt	Berlin
Staatsform	parlamentarischi Republik
Regierigsform	präsidentiell-parlamentarisch
Staatsoberhaupt – 1919 bis 1925 – 1925 bis 1934	Reichspräsident Friedrich Ebert Paul von Hindenburg
Regierigschef 1919 – 1919 bis 1920 – 1920 – 1920 bis 1921 – 1921 bis 1922 – 1922 bis 1923 – 1923 – 1923 bis 1925 – 1925 bis 1926 – 1926 bis 1928 – 1928 bis 1930 – 1930 bis 1932 – 1932 – 1932 bis 1933	Philipp Scheidemann (Präsident vom Riichsministerium) Riichskanzler Gustav Bauer Hermann Müller Constantin Fehrenbach Joseph Wirth Wilhelm Cuno Gustav Stresemann Wilhelm Marx Hans Luther Wilhelm Marx Hermann Müller Heinrich Brüning Franz von Papen Kurt von Schleicher
Flechi	468.787 km²
Iiwohner – 1925	62.411.000
Bevölkerigsdichti – 1925 – 1933	133 Iiwohner pro km² 139 Iiwohner pro km²
Währig	1 Riichsmark = 100 Riichspfennig
Proklamation vo der Republik	9. November 1918
Nationalhymne	Dütschlandlied
Nationalfiirdig	Verfassigstag am 11. August (Annahm vo der demokratische Verfassig)
Zitzone	UTC+1 MEZ
Kfz-Kennzeiche	D
Charte

D Weimarer Republik, amtlig Deutsches Reich, die erschti würklech rein demokratischi Staatsform in Dütschland, hett 1919 - nach em Wältchrieg und nach em Schturz vo der Monarchie - mit rächt vill Schwung und guete Vorzeiche agfange. Die sog. Weimarer Koalitione, Koalitionsregierige us usschliesslich demokratisch gsinnte Parteie, hei die erschte Wahle, wo übrigens erschtmols au d Fraue hei dörfe teilnäh, für sich entschiide. Die nationalistische Chräft, wo s Kaiserriich wieder hei welle härstelle und d Friedensbedingige vo de Chriegs-Siegermächt hasserfüllt bekämpft hei, sind parlamentarisch in d Defensive drängt worde. Um so militanter hei sie sich allerdings usserparlamentarisch in Szene gsetzt: Politischi Mörd a Lüüt, wo sie als Verantwortlechi vo der "Dolchstoss"-Legände ("Wäg der Novämber-Revolution isch der Chrieg verlore gange") gseh händ, Kapp-Putsch und Hitler-Putsch (beidi gschiteret) sind nur einigi Schlagliechter drfür.

Erschti Azeiche, dass s demokratische Elemänt au i der gsamt-dütsche Gsellschaft trotz däm rächtleche Überbau vo der Republik nitt würklech gfeschtigt gsii isch, hetts bi de erschte Reichspräsidente-Wahle gää. Der preussisch Junker Paul von Hindenburg, Monarchischt und füehrende Chopf in der Oberschte Heeresleitig während em vergangene Wältchrieg, isch 1925 zum Reichspräsident gwählt worde - und dies gege än Kandidat vo der katholische Zentrumspartei, und s no problematischere dra isch gsii, dass d Schtimme vo der Dütsche Volkspartei (DVP) und vo der Bayrische Volkspartei (BVP) wiitgehend an Hindenburg und nitt a die demokratischi Siite gange sind. Erschti Azeiche von ere Erosion vo der Republik.

Die parteipolitische Fronte hei sech i der Folg immer stärker polarisiert, d Pol-Parteie NSDAP vom Hitler (öppis igschränkter au d Monarchischte-Partei DNVP) und uff der Linke die kommunistischi KPD sii immer stärker worde, d Mitti-Parteie hei Wähleranteil verlore. Das vor allem denn in de 1930er Johr, wo d Wältwirtschaftskrise grossi Arbeitslosigkeit und soziali Not zur Folg gha hett. Politik isch au uff dr Strass uustreit worde, in Form vo viile Schlägereie, und au politischi Mörd hetts wiiterhin gää. D Regierige sii nümm stabil gsii, s hett vieli Wächsel gää - churz, d Weimarer Republik hett nümm us der politische Krise uusegfunde.

Die wohl letschti reali Chance, der Hitler no z verhindere, hetts nach de Reichstagswahle vo 1932 gää. Der designiert Reichskanzler Franz von Papen, au är en Monarchischt, hett Reforme plant, wo d Wirtschaft sölltet us der Krise füehre. Er hett unter andere au der SPD und der Zentrumspartei es Koalitions-Aagebot unterbreitet, mit dene Parteie hätt sech no ä Mehrheits-Regierig lo bilde, wo der Hitler wiiterhin vo der Macht färnghalte hätt. S Verhältnis vor allem mit der SPD isch allerdings vorbelaschtet gsii, will der Papen vorher, won er au scho Reichskanzler gsii isch, bim "Preusseschlag" d SPD-Regierig vo Preusse wägputscht gha het, will er si als Gfahr gseh hett. Das hett em d SPD nitt entschuldigt ghaa, si hett em uf s Koalitionsangebot schlichtwäg im Vornheri s Gschpräch verweigeret. Aber au s Zentrum hett keis Interässe am Papen sim Koalitionsagebot zeigt. Emotionali politischi Stimmige si do wichtiger gsii als wiitblickends Dänke, e gfährlechi Figur wie der Hitler vo der Macht färnzhalte. Derbi hett me em Hitler sini extreme Ideeä uus sim Pamphlet "Mein Kampf" uus de 1920er Johr längschtens kennt, aber offebar zwenig ärnscht gnoo.

Schliesslich ischs afangs 1933 zun ere Koalitionsregierig zwüsche der NSDAP und der Monarchischte-Partei DNVP choo, und der Hindenburg hett der Hitler zum Kanzler ernennt. Das isch glichbedütend mit em Ände vo der Weimarer Republik gsii: Mit em Ermächtigungsgsetz, wo unter anderem, aber nitt nur, dur Ischüchterig vo de demokratische Parteie z Schtand cho isch, hett der Hitler i der folgende Ziit systematisch alli Opposition eliminiert und unterdrückt und sini Diktatur errichtet.

Literatur

• Erich Eyck: Geschichte der Weimarer Republik, 2 Bänd
• Hans Boldt (Hrsg.): Reich und Länder - Texte zur deutschen Verfassungsgeschichte
• R.A.C. Parker: Fischer-Weltgeschichte - Europa 1918 bis 1945