Liberalismus

Us der alemannische Wikipedia, der freie Dialäkt-Enzyklopedy
Hops zue: Navigation, Suech

De Liberalismus isch e politischi Philosophii, wo in de Folg vo de fränzösische Revolution z Europa immer meh an Iifluss gwunne het.

Begriff[ändere | Quälltäxt bearbeite]

De Begriff Liberalismus chunnt us em latinische, wo liber frei bedütet und liberalis öppis bezeichnet, was mit de Freiheit zu due het reschpektiv d Freiheit betrifft. Bruucht worde isch er s erschti Mol z Schpanie im 1812i. D Wurzle liget aber scho in de Ziit vo de Ufklärig.

D Philosophii[ändere | Quälltäxt bearbeite]

D Grundüberzügig vom Liberalismus isch, dass es Individuum sot frei sii, in dem wi es duet läbe und dänke. D Ufgab vom Schtaat isch es, d Freiheit vom Einzelne z garantiire und dafür Sorg z träge, dass d Freiheit erhalte bliibt. Weniger Schtaat bedütet meh Freiheit und mehh Schtaat bedütet weniger Freiheit - dodervo isch de Liberalismus überzügt. S Individuum überchunnt doderbi au mehr Verantwortig für sich sälber. De Liberalismus gseht s Sträbe nach Freiheit für alli Beriich vom Läbe, für d Politik und au für d Wirtschaft, wo de frei Wettbewerb s Ziil müesst si.