Filmakademy Bade-Wirttebärg
| Filmakademie Baden-Württemberg | |
|---|---|
| Gründig | 1991 |
| Drägerschaft | staatli |
| Ort |  Ludwigsburg
|
| Bundesland | Bade-Wirttebärg |
| Land |  Dytschland
|
| Direktor | Thomas Schadt |
| Studänt*ene | ca. 500 |
| Website | www.filmakademie.de |
| Dialäkt: Undermarkgreflerisch |
D Filmakademy Bade-Wirttebärg (dt. Filmakademie Baden-Württemberg, churz FABW) isch e Filmhochschuel z Ludwigsburg, wu anne 1991 grindet woren isch un as gmainnitzigi GmbH mit em Land Bade-Wirttebärg as ellainigem Gsellschafter gfiert wird.[1] An dr Filmakademy het s iber 300 Dozänte*ne un rund 450 Studänte*ne.
Gschicht[ändere | Quälltäxt bearbeite]
D Filmakademy het am 14. Oktober 1991 dr Studiebedrib ufgnuu. D Grindigsdiräkter sin dr Albrecht Ade as chinschtlerische Diräkter un dr Ernst-O. Schulze as chaufmännische Diräkter (bis 1997). Im Johr 1993 isch d FABW in hitige Standort zwische dr Mathildestroß un Alleenstroß zoge. 1999 isch uf Bundesebeni d Grindig vun ere dytsch-franzesische Filmakademy bschlosse wore, wu ai Johr speter as Kooperazion vu dr FABW mit dr franzesische Filmhochschuel La fémis dr Bedrib ufgnuu het („Atelier Ludwigsburg-Paris“). 2001 het dr Arthur Hofer di chinschtlerisch Laitig vum Albrecht Ade ibernuu. 2002 isch s Animazionsinschtitut as dailsälbschtständigi Ainhait us dr Akadamy uusglideret wore. Syter 2005 wird si vum Thomas Schadt as chinschtlerischem Diräkter un syt 2007 as ellainigem Gschäftsfierer glaitet. Anne 2008 isch d Akademy fir Darstellendi Chunscht Bade-Wirttebärg uf em Campus aagsidlet wore.[1][2]
Studium[ändere | Quälltäxt bearbeite]
Studiegäng[ändere | Quälltäxt bearbeite]
D Filmakademy bietet di drei Diplom-Studiegäng Film + Medie, Produkzion un Filmmusik + Sounddesign as vierjehrig Vollstudium aa, wu in e zwaijehrig Grundstudium un e zwaijehrig Projäktstudium glideret isch. Fir Bewärber*ne mit Bachelor oder Vordiplom isch e Queryystiig in s Projäktstudium grundsätzli megli. Ab em Studiejähr 2018/19 wäre au no die acht Studieschwärpinkt au as Diplom-Ufböustudiegäng aabote: Färnsehschurnalismus, Motion Design, Szenebild, Interaktivi Medie, Animation/Animation Effects Producer, Animation/Technical Director, Filmmusik un Filmton/Sounddesign.
Di drei Studiegäng sin in verschideni Studieschwärpinkt glideret, die zum Dail in verschideni Verdiefige.
Animazionsinschtitut[ändere | Quälltäxt bearbeite]
S Animazionsinschtitut isch 2002 as Dail vu dr Filmakademy Bade-Wirttebärg grindet wore as Uusbildigsort fir Animazion, VFX un Interaktivi Medie.
All Friejohr git s syter 1994 d FMX Conference on Animation, Effects, Games and Immersive Media z Stuegert. Uf däre änglischsprochigi Kumferänz goht s um Kreazion, Produkzion un Dischtribuzion vu digitalem Entertainment.
Atelier Ludwigsburg-Paris[ändere | Quälltäxt bearbeite]
S Atelier Ludwigsburg-Paris isch en aijehrig Wyterbildigsbrogramm fir jungi europäischi Filmbroduzänte*ne un Verleener*ne in dr Beraich Stoffentwicklig, Finanzierig, Produkzion, Verdriib un Marketing. S git s syter 2001 un wird vu dr Filmschuele La Fémis z Paris un dr Filmakademy Bade-Wirttebärg zäme aabote. 2007 isch d National Film and Television School z Beaconsfield bi London as Kooperazionspartner derzue chuu.
All Johr entstehn im Rame vum Atelier Ludwigsburg-Paris nyyn Churzfilm zue me gmainsame Thema. D Raie sin dytsch-franzesischi Koprodukzione un wäre vu ARTE, em SWR, dr Filmakademy Bade-Wirttebärg un La Fémis härgstellt. D Dailnämer*ne vum Atelier sin do in binazionale Producer-Team fir d Filmhärstellig verantwortli. Alli Film wäre u. a. uf dr Franzesische Filmdräg z Dibenga un em Festival Max Ophüls Bryys presäntiert un au uf ARTE uusgstrahlt.
Filmschauspiil[ändere | Quälltäxt bearbeite]
D Abdailig Filmschauspiil bietet zwai Mol im Johr en Kurs aa, wu speziäll an jungi Talänt grichtet isch, wu iri klassisch abgschlosseni Schauspiiluusbildig um s Fach Filmschauspiil uuswyte wän.
Dr Filmschauspiilworkshop findet im Wintersemeschter in Kooperazion mit dr Akademy fir Darstellendi Chunscht Bade-Wirttebärg un im Summersemeschter mit dr Hochschuel fir Musik un darstellendi Chunscht Stuegert statt un bietet dernäbe extärne Schauspiler*ne d Megligkait, si fir d Arbet vor dr Kamera wyter z qualifiziere.
Bryys un Uuszaichnige[ändere | Quälltäxt bearbeite]
E Raie vu Film sin im Rame vum Studium entstande, wu uf nazionale un internazionale Feschtiwäl wichtigi Bryys iiberchuu hän. Doderzue zellle Studänte*ne-Oscar fir Rochade (1998, Reschy: Thorsten M. Schmidt), NimmerMeer (2007, Reschy: Toke Constantin Hebbeln), Von Hunden und Pferden (2012, Reschy: Thomas Stuber), Erledigung einer Sache (2015, Reschy: Dustin Loose)[3] un Galamsey – Eine Handvoll Gold (2017, Reschy: Johannes Preuss), Dytschi Churzfilmbryys fir Einfach so bleiben (2003, Reschy: Sven Taddicken), Von Hunden und Pferden (2011), Sunny (2013, Reschy: Barbara Ott) un Helikopter Hausarrest (2015, Reschy: Constantin Hatz), derzue z. B. Grimme-Bryys fir Der Peitschenmeister (1999, Reschy: Daniel Nocke), Sonbol – Rallye durch den Gottesstaat (2009, Reschy: Niko Apel), fir Der innere Krieg (2010, Reschy: Astrid Schult) un fir Nacht vor Augen (2010, Reschy: Brigitte Maria Bertele). Anne 2017 isch dr Hochschuelabschlussfilm 24 Wochen vu dr Anne Zohra Berrached bim Dytsche Filmbryys mit dr Lola in Silber uuszaichnet wore.
Anne 2010 het The Hollywood Reporter d Filmakademy as ainzigi dytschi Yyrichtig uf d Lischt vu dr beschte Filmhochschuele wältwyt gsetzt.[4] 2015 bis 2017 isch d Filmakademie wider uf däre Lischt verdrätte gsii.[5] Die Posizion im internazionale Ranking het d Filmakademy 2018 wider verlore.[6]
S Animazionsinschtitut isch mit verschidene wichtige Bryys vu dr Branche uuszaichnet wore, dodrunter bi dr SIGGRAPH fir 458 nm (2006, Reschy: Jan Bitzer, Ilija Brunck, Tom Weber), Loom (2010, Reschy: Jan Bitzer, Ilija Brunck, Csaba Letay), Globosome (2012, Reschy: Sascha Geddert), Herr Hoppe und der Atommüll (2012, Reschy: Jan Lachauer, Thorsten Löffler), Rollin’ Safari (Reschy: Kyra Buschor, Constantin Päplow un Ännie Habermehl), fir Harald (2013, Reschy: Moritz Schneider) un fir Wrapped (2014, Reschy: Roman Kälin, Falko Paeper, Florian Wittmann). Dr Film Das Rad (Reschy: Heidi Wittlinger, Chris Stenner, Arvid Uibel) isch 2003 au fir en Oscar in dr Kategory Best Animated Short nominiert gsii. Di internazional Award- un Mentoring-Blattform The Rookies het d Filmakademy Bade-Wirttebärg mit irem Animazionsinschtitut 2017 zur Best Visual Effects School wältwyt gwehlt un si in dr Kategory Best Animation School uf Blatz 2 glischtet.
Bewärbig[ändere | Quälltäxt bearbeite]
Bewärber*ne bruche normal s das Abitur un zmindescht ai Johr praktischi Erfahrig im Film- oder Medieberaich. Bin ere Bewärbig fir e Queryystiig in s Projäktstudium oder d Ufböustudium mueß mer derzue zminderscht e Vordiplom oder Bachelor in bstimmte Fachrichtige noowyse. D Ufnambriefige sin als im April/Mai.
Weblink[ändere | Quälltäxt bearbeite]
- Websyte vu dr Filmakademy Bade-Wirttebärg
- Inschtitut fir Animazion, Visual Effects un digitali Poschtprodukzion
- Atelier Ludwigsburg-Paris
- Filmschauspiilworkshop vu dr FABW
- FMX - Film and Media Exchange
- Filmakademie Baden-Württemberg bi crew united
Fueßnote[ändere | Quälltäxt bearbeite]
- ↑ 1,0 1,1 EIN KURZER RÜCKBLICK AUF DIE GESCHICHTE DER FILMAKADEMIE IN ZAHLEN UND FAKTEN. In: Filmakademie Baden-Württemberg. Abgruefen am 24. April 2021.
- ↑ Geschichte. In: Filmakademie Baden Württemberg GmbH. Abgruefen am 10. Juli 2021.
- ↑ Deutsche Studenten gewinnen Oscars. In: spiegel.de. Spiegel Online, 17. September 2015, abgruefen am 16. Januar 2016.
- ↑ „The best film schools in the world“ The Hollywood Reporter, 08/2010
- ↑ Top 15 International Film Schools Revealed. Abgruefen am 25. Oktober 2019 (änglisch).
- ↑ The Top 15 International Film Schools. In: The Hollywood Reporter. 15. August 2018 (englisch, online [abgerufen am 19. August 2019]).
Koordinate: 48° 53′ 37″ N, 9° 11′ 27″ O
|
Dä Artikel basiert uff ere fräie Übersetzig vu dere Version vum Artikel „Filmakademie_Baden-Württemberg“ vu de dütsche Wikipedia. E Liste vu de Autore un Versione isch do z finde. |