Zumft zu Wääber
| Zunft zu Webern | |
|---|---|
| Zwäck: | öffentlig-rächtligi Korporazion |
| Vorsitz: | Hediger Thommy Mäister |
| Gründigsdatum: | Zumftbrief vo 1268 |
| Sitz: | Baasel |
| Website: | E.E Zunft zu Webern Basel |
| Dialäkt: Baaseldütsch |
E. E. Zumft zu Wääber isch en öffentlig-rächtligi Korporazion in dr Stadt Baasel und äini vo de Handwärkerzümft. Historisch isch si d Veräinigung vo de Wääber, Bläicher und Färber gsi, hüte stoot si aber Baasler Bürger us alle Bruefsständ offe. Iir Zumfthuus stoot an dr Stäinevorstadt 23.
D Faane vo dr Zumft zäigt sit 1268 e roote Gryff, wo ufrächt stoot, und in sine Chlaue e gääle Ellestaab hebt. Spööter isch en Igel as Symbol vo de Graudüecher drzue choo.
Dr historisch Bsitz vo dr Zumft isch zum Däil im Historische Museum usgstellt, wird aber vilmol an de Zumftmööli verwändet, vor allem dr Gryffebächer, wenn nöiji Zumftbrüeder ufgnoo wärde.
S Zumfthuus
[ändere | Quälltäxt bearbeite]Iir Huus isch im 13. Joorhundert am undere Höibärg gsi, wo denn Wääbergass ghäisse het. 1360 häi d Wääber iir ersts Zumfthuus an dr Stäinevorstadt baut, s äinzige Baasler Zumfthuus wo nid in dr Altstadt glääge isch. 1448 isch s umbaut worde und no äinisch in dr zwäite Helfti vom 16. Joorhundert. 1830 het mä s Geböid abgrisse und e dreistöckigs Huus baut, wo 1938/39 dur s hütige Huus ersetzt worde isch.[1] Bim Zumfthuus stoot dr Wääberbrunne us em Joor 1674. Uf sim Brunnestock stoot e Bannerdrääger mit Schwärt, Schild und Zumftfaane.
Gschicht
[ändere | Quälltäxt bearbeite]D Zunft zu Wääber isch im 13. Joorhundert gründet worde, und am 21. August 1268 het si vom Bischof Heinrich vo Nöijeburg dr Zumftbrief üüberchoo.
D Wääberzumft het bis ins 18. Joorhundert au d Ufgoobe vo erfüllt, wo in de andere Vorstedt d Pflicht vo de Vorstadtgsellschaft gsi isch. D Zumft het schliesslig 1757 vo Root verlangt, ass er si vo dene Ufgoobe wurd befreije und d Vorstadtgsellschaft «Zu de Drei Äidgenosse» isch gründet worde.[2]
Historisch si d Mitgliider vo dr Zumft ermliger gsi as anderi Handwärker. S Potenzial für e revoluzionääri Beweegig isch dört am grösste gsi und d Stäinlemer häi denn am Aafang vom 16. Joorhundert zu de iifrigste Understützer vo dr Reformazioon ghöört.[3] Die erste Wääber z Baasel häi Liine verarbäitet (Linweter), denn het mä afo Bauele wääbe. am Aafang vom 16. Joorhundert isch d Wullewääberei (Graudüecher) ufblüeit. Im 16. und 17. Joorhundert häi Flüchtling d Siidebandwääberei in d Stadt brocht. Über d Färberei verzelle d Chronike vo 1454 zum erste Mol.[4]
Weblingg
[ändere | Quälltäxt bearbeite]- Zunft zu Webern uf altbasel.ch
Fuessnoote
[ändere | Quälltäxt bearbeite]- ↑ Zunfthaus der E. E. Zunft zu Webern, abgrüeft am 11. Novämber 2014
- ↑ Zunft zu Webern (Memento vom 25. Jänner 2015 im Internet Archive), abgrüeft am 11. Novämber 2014
- ↑ Hans Rudolph Guggisberg: Basel in the Sixteenth Century: Aspects of the City Republic Before, During, and After the Reformation, Wipf and Stock Publishers, 2010, S. 28
- ↑ Geschichte der E. Zunft zu Webern, abgrüeft am 11. Novämber 2014
Koordinate: 47° 33′ 11″ N, 7° 35′ 20,1″ O; CH1903: 611313 / 266938