D Baasler Zumft zu Wiilüt
| E. E. Zumft zu Wiilüt | |
|---|---|
| Zwäck: | Zumft |
| Vorsitz: | Jürg Gutzwiller (Mäister) |
| Gründigsdatum: | vor 1233 |
| Mitgliiderzaal: | ~400 |
| Sitz: | Baasell |
| Website: | http://www.weinleuten.ch/ |
| Dialäkt: Baseldütsch |
D E. E. Zumft zu Wiilüt oder au Gälte-Zumft, isch en öffentlig-rächtligi Korporazioon in dr Stadt Baasel und äini vo de vier Baasler Herezümft. Si isch die historischi Veräinigung vo de Wiihändler, Wiischänk und Wiilader. Aber au die offizielle Wiibrüefer häi zur Zumft ghöört, d Stüürbeamte, wil dennzumol Stüüre z Baasel nume uf e Wii erhoobe worde si, anderi stedtischi Beamti und "Grichtspersone". Hüte isch d Zumft für alli Bruefsständ offe.[1]
S Zumfthuus
[ändere | Quälltäxt bearbeite]Wenn genau d Zumft gründet worde isch, wäiss mä nid, aber es isch sicher vor 1233 gsi. Us däm Joor git s en Urkunde, ass d Zumft e Huus am Kornmäärt, hüte isch d Adrässe Määrtblatz 13, kauft het. Si isch denn as Gältezumft bekannt gsi. D Gälte isch en Art Wiikanne und isch immer no s Abzäiche vo dr Zumft zu Wiilüt.[1] S Huus het zerst nume us em «zem nideren Bild» bestande, wo aber bald scho z chlii gsi isch, und 1330 isch s Huus näbedraa, s «zem Ystein», drzuechoo. Wo s am Kornmäärt brennt het, het mä renowiert und e Hinderhuus drzuekauft. In de Joor 1421 und 1423 het mä die bäide Hüüser ufgstockt und e Dach über bäidi baut.[2]
S Zumfthuus isch zwüsche 1562 und 1578 vom Daniel Heintz im Rönessansstiil umbaut worde und het e brächtigi Fassaade überchoo.[1] Vo 1978 bis 1979 het mä d Fassaade bis jetz zum letschte Mol renowiert. Si isch sit em 19. Joorhundert änglischroot gsi und isch en Art veielett aagmoolt worde.[2]
Sit scho fast hundert Joor isch im Geböid e Bankinstitut dehäi.
Liddratuur
[ändere | Quälltäxt bearbeite]- Rose-Marie Schulz-Rehberg, Architekten von der Gotik bis zum Barock, Christof Meriaa Verlaag Baasel, S. 146
Weblingg
[ändere | Quälltäxt bearbeite]Fuessnoote
[ändere | Quälltäxt bearbeite]- ↑ 1,0 1,1 1,2 Zunft zu Weinleuten (Memento vom 19. Mai 2014 im Internet Archive) uf zuenfte-basel.ch
- ↑ 2,0 2,1 Website vo dr Zumft. Archiviert vom Original am 19. Dezember 2013; abgruefen am 28. Februar 2014.
