D Zumft zu Schmiid
| E. E. Zunft zu Schmiid | |
|---|---|
| Zwäck: | Zumft |
| Vorsitz: | Rolf Plattner (Mäister) |
| Gründigsdatum: | vor 1238 |
| Mitgliiderzaal: | 145 (Stand 2013) |
| Sitz: | Baasel |
| Website: | http://www.schmiedenzunft.ch/ |
| Dialäkt: Baseldütsch |
E. E. Zumft zu Schmiid isch en öffentlig-rechtligi Korporazioon in dr Stadt Baasel und äini vo de Baasler Handwärkerzümft. Historisch isch si d Veräinigung vo de Schmiid und Schlosser gsi, hüte isch si für alli Bruefsständ offe, wo Metall verarbäite.
S Zumfthuus vo dr Zumft zu Schmiid am Schmiidhoof 10 isch e Baasler Kulturguet, wo für d Region vo Bedütig isch.
Gschicht
[ändere | Quälltäxt bearbeite]D Zumft isch isch zu Läbzite vom Bischof Heinrich vo Thun gründet worde, und dä isch 1238 gstorbe. Die eltisti Urkunde, wo si din erwäänt wird, isch us em Joor 1255, wo dr Zumftmäister vo de Schmiid as Züüge uf ere Erburkund vorchunnt.
Zu dr Zumft zu Schmiid häi under anderem au d Uuremacher ghöört und äine vo deene, dr Mäister Heinrich Halder, het 1373 am Münster e nöiji Schlaaguur aagmacht im Lauf vom Wiiderufbau vo dr Stadt noch em Ärdbeebe vo 1356. 1411 het d Zumft für 350 Gulde in Gold am alte Rindermäärt wisawii vom Kaufhuus[1] d Liigeschaft kauft, wo hüte s «Schmiidzumfthuus» stoot.
Zu de Ufgoobe vo de Zümft het d Wach uf dr Stadtmuure ghöört. 1444 si zum Bischbil die vo «Zu Schmiid» für en Abschnitt vom Durm uf em Luginsland (bi dr hütige Bernoullistrooss) bis zum domoolige Eglofsdoor uf dr Lyss verantwortlig gsi. Zum Bränd lösche het d Zumft 12 bis 16 usgrüsteti Manne müesse stelle.[2]
1650 het d Zumft vo dr Stadt s Rächt uf en äignige Brunne überchoo. Dr Meergottbrunne stoot immer no im Hoof vom Geböid, und mä chann en gsee, wemm mä vo dr Gärbergass in Schmiidhoof iine goot.[2]
1887 het dr Zumftvorstand vo dr Bürgergmäind d Erlaubnis überchoo, iir Zumfthuus an d «Gsellschaft zur Förderig vom Guete und Gmäinnützige in Baasel» z verkaufe. Au wenn s Huus nüme dr Zumft ghöört, het si dört aber immer no iire Zumftsaal mit Wandmoolereie vom Hans Sandreuter. Vor em Schmiidhoof an dr Gärbergass 24 stoot e dänggmolgschützts Standbild vom Gründer vo dr GGG, em Isaak Iselin.
Weblingg
[ändere | Quälltäxt bearbeite]Fuessnoote
[ändere | Quälltäxt bearbeite]- ↑ Dört wo hüte d Hauptbost stoot.
- ↑ 2,0 2,1 Zunft zu Schmiid uf altbasel.ch. Archiviert vom Original am 4. März 2016; abgruefen am 1. März 2014.
