D Vorstadtgsellschaft zu de Drei Äidgenosse

D Vorstadtgsellschaft zu de Drei Äidgenosse isch e Korporazioon in dr Steinevorstadt in dr Stadt Basel.

Gschicht[ändere | Quälltäxt bearbeite]

D Zumft zu Wääber erfüllt d Ufgoobe von ere Vorstadtgsellschaft[ändere | Quälltäxt bearbeite]

In dr „Stäine“ hän syyt je bsunders Wääber, Bläicher und Färber gschafft und gwoont. Dorum het Zumft zu Wääber Joorhunderti lang au d Ufgoobe von ere Vorstadtgsellschaft übernoo. 1584 sin ere entsprächend bäidi Ufgoobe in ere Urkunde bestäätigt worde. As Vorstadtgsellschaft het si sich um d Sittlichkäit, Rue und Ornig in iirer Vorstadt kümmeret, um d Stroosse- und Brunneornig, d Wäidrächt zwüschen em Birsig und em Dalbedych, wo au Hirte us dr Aeschevorstadt iir Vee gwäidet häi, und het s Fischverbot im Birsig duuregsetzt. Si isch für d Wach in dr Vorstadt verantwortlig gsi, für d Bekämpfig vo Bränd und vo Hoochwasser im Birsig und het in Schmää- und Schlaaghändel grichdet.

D Gründig vo dr Vorstadtgsellschaft[ändere | Quälltäxt bearbeite]

1757 het s dr Zumft glängt, sich die ganz Zit mit Sache müesse abzgee, wo nid d Aagläägehäit von ere Zumft sige. Si het dorum vom Root verlangt, ass e Vorstadtgsellschaft gründet wurd, wo alli die Gschäft würd uf sich nee.

Ass die Gsellschaft dr Naame «zu de Drei Äidgenosse» aagnoo het, cha mä mit em Patriotismus vo dr Ufkläärig im 18. Joorhundert erklääre. Im Summer 1757 isch dr erst Vorstadtmäister in dr Stäine iigfüert worde. Aber scho zwäi Generazioone spööter het d Vorstadtgsellschaft in dr helvetische Revoluzioon alli iiri öffentlige Ufgoobe verloore wie die andere Basler Korporazioone au.

D Vorstadtgsellschaft zu de Drei Äidgenosse isch isch denn vo 1760 aa bi dr Fasnacht im Zuug vo de Kwardier vo Drei Äidgenosse verdräte worde, wo dr Gryff vo dr Zumft zu Wääber, wo bis denn mitmarschiert isch, abglööst häi.^[1]

D Gsellschaft hüte[ändere | Quälltäxt bearbeite]

Hüte bestoot si, wie alli andere Basler Vorstadtgsellschaft au, nume no us em siibechöpfige Vorstand und gniesst s Gasträcht in dr Stuube vo de Vorgsetzte vo dr E.E. Zumft zu Wääber in dr Stäinevorstadt 23, wo iir Wabbe näbe deene vo dr Zumft zu Wääber und dr Zumft zum Goldige Stärn an dr Fassade aagmacht isch.

Mitgliid cha wärde, wär im innere oder üssere Bezirk vo dr Stäinevorstadt woont oder dört Grundbsitz het und au im Kanton Basel-Stadt woont, oder in dr Vorstadt sälber schafft. D Mitgliider vom Vorstand wärde für säggs Joor gweelt. Dr Basler Bürgerroot isch d Ufsichtsbehörde und bi iim cha mä Waalvorschleeg iiräiche.