Zumft zu Brootbeck

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
E. E. Zunft zu Brootbeck
Zwäck: Zumft
Vorsitz: René Brandl (Mäister)
Gründigsdatum: vor 1256
Sitz: Basel
Website: http://www.brotbeckenzunft.ch/
Dialäkt: Baseldütsch

E. E. Zumft zu Brootbeck isch en öffentlig-rächtligi Korporazioon in dr Stadt Basel und äini vo fuffzää Basler Handwärkerzümft. Historisch isch si e Veräinigung vo de Beckermäister gsi. Hüt isch si offe für alli Bruefsständ. D Zumftstuube isch an dr Hoochstrooss 86 z Basel.

Gschicht[ändere | Quälltäxt bearbeite]

D Zumft zu Brootbeck isch vor 1256 gründet worde und 1262 het dr Basler Bischof Heinrich vo Nöijeburg de Zümft s Rächt gee, ass d Säggser vo jeedere Zumft iire äignige Zumftmäister wurde weele. 1413 häi d Brootbeck an dr Freije Strooss für 245 Gulde zwäi Hüüser kauft. Äini vo de Ufgoobe vo de Zümft isch d Wach uf dr Stadtmuure gsi. In dr Verordnig vom Root vom Joor 1415 über d Bewachig vo dr Stadtmuure häi d Brootbeck zämme mit de Fischer, Gartner und Schifflüt dr Abschnitt vom Lueginsland (bim hütige Bernoullianum) bis zum Thomasdurm am Rhii zuedäilt überchoo. Mit em Basler Konzil het d Stadt e wirtschaftlige Ufschwung erläbt und d Zumft zu Brootbeck isch äini vo de riichste Zümft worde.

In dr helvetische Revoluzioon vo 1798 s d Zümft ufghoobe worde. Im Zumfthuus vo de Brootbeck si im Joor druf die revoluzionääre franzöösische Drubbe iikwardiert worde, wo iigmarschiert si. Mit dr Mediazioon häi d Zümft wider en wirtschaftligi Rolle ghaa, aber iiri politische Vorrächt häi si nüm zruggüberchoo. 1843 isch s Zumfthuus umbaut worde und 1895, wo die Freiji Strooss usbaut worden isch, het s dr Staat für 187'500 Franke kauft. 1943 isch d Zumft in s Huus vom Beckermäisterveräin am Koolebärg 27 iizooge und 1970 si d Brootbeck in s Huus vo de «Basler Begge» an dr Blauestrooss 45 züüglet. Hüte isch si an dr Hoochstrooss 86 dehäi.

D Zumft hüte[ändere | Quälltäxt bearbeite]

Bi de Brootbeck het s hüte öbbe 230 Zumftbrüeder. D Zumft organisiert jeedes Joor e baar gselligi Aaläss, wie d Höck im Früelig und Herbst, Wandrige und as Höhepunkt s Zumftässe im Novämber.

Weblingg[ändere | Quälltäxt bearbeite]

Litratuur[ändere | Quälltäxt bearbeite]

  • Albert Bruckner: Die Zunft zu Brotbecken in Basel: zur Siebenhundertjahrfeier, Basel 1956
  • Zunft zu Brotbecken - Basel: Dokumentensammlung. Zeitungsausschnitte, Basel 1956
  • Emil Schaefer, Gustav Steiner, Willy Hiss: E.E. Zunft zu Brotbecken Basel: zur Erinnerung an die 700-Jahr-Feier vom 29. Januar 1956, Basel 1956