E.E. Zumft zu Schniider

Us der alemannische Wikipedia, der freie Dialäkt-Enzyklopedy

Koordinate: 47° 33′ 24,3″ N, 7° 35′ 10,3″ O; CH1903: 611107 / 267348

E. E. Zunft zu Schneidern
Zwäck: Zumft
Vorsitz: René Gass (Mäister)
Gründigsdatum: vor 1260
Sitz: Baasel
Website: http://www.schneidernzunft-basel.ch/
Dialäkt: Baseldütsch
S Huus zum Löiezorn am Gämsbärg, wo d Schniiderzumft sit 1966 im Intarsiesaal dehäi isch.

E. E. Zumft zu Schniider isch en öffentlig-rächtligi Korporazioon in dr Stadt Baasel und äini vo fuffzää Basler Handwärkerzümft. Historisch isch si e Veräinigung vo de Schniider, Gutteremacher, wo gfüetereti Steppdeckene gmacht häi, Altgwänder, wo alti Kläider instand gstellt und verkauft häi, und Siidesticker gsi. Hüt isch si offe für Baasler Bürger und Bürgerinne us alle Bruefsständ. Si isch e langi Zit mit dr Zumft zu Kürschner in ere sogenannte Dobbelzumft verbunde gsi. S Zumftlokal isch im dänggmolgschützte Huus zum Löiezorn am Gämsbärg 2-4.

Gschicht[ändere | Quälltäxt bearbeite]

D Baasler Schniider häi woorschinlig e chli vor 1260 vom Bischof Berthold vo Pfirt e Zumftbrief überchoo. S Original isch woorschinlig im Groosse Ärdbeebe vo 1356 zum Opfer gfalle. Us Kopie wäiss mä, ass d „sartoris“, wie d Schniider uf latiinisch ghäisse häi, as ersti Zumft iire Mäister sälber häi döfe vorschloo, und dr Bischof het s denn no müesse bestätige. Wo d Zümft am Aafang vom 14. Joorhundert Verdräter im Root überchoo häi, isch us de Schniider und de Kürschner e «gspaltnigi Zumft» worde mit eme gmäinsame Zumftmäister. Im Fäld und bim Wachdienst si si under em gliiche Banner ufmarschiert und si für e Abschnitt vo dr Stadtmuure vo dr Lys bis zum «Wagdehals» (dr Stäineschanze) verantwortlig gsi, aber in iire innere Aagläägehäite si si unabhängig von enander bliibe.

Verdient häi Schniider nid vil. Dr Loon vom ene Gsell isch nid hooch gnueg gsi, für dass er e Familie chönnt ernääre, und doorum häi d Mäister käini verhürootete Gselle aagstellt. D Aarbet hingeege isch lang gsi. Noch dr Verordnig het e Gsell im Summer vom fümfi am Morge bis am nüüni z Oobe müesse schaffe und im Winter vom sibni bis am zääni.

Iir ersts Zumfthuus, wo 1364 zum erste Mol erwäänt wird, isch an dr Gärbergass grad näbe dr Zumft zu Gärtner gstande. 1874 het dr Staat s Huus kauft und bin ere Verbräiterig vo dr Gärbergass lo abrisse. D Schniider häi denn für e Zit im «Mueshus» an dr Spalevorstadt 14 iir Lokal gha, bis si 1966 in dr Intarsiesaal im «Löiezorn» am Gämsbärg züüglet si.

Weblingg[ändere | Quälltäxt bearbeite]