Dr Basler Lueginslanddurm

Usschnitt us dr Stadtaasicht vo Basel vom Matthäus Meriaa, 1642. Dr Lueginsland isch dr rundi Durm näben em rächteggige Waasebollwärk rächts unde uf däm Uschnitt.

Dialäkt: Baseldütsch

Dr Lueginslanddurm isch bis ins 19. Joorhundert, won er abbroche worde isch, Däil vo dr Basler Stadtmuure gsi.

Gschicht

Im 14. Joorhundert het d Stadt Basel uf dr linggsrhiinische Site e zwäiti, üsseri Stadtmuure um s Groossbasel ume baut. Dr Lueginsland isch äine vo de vierzig Dürm gsi und villicht dr strategisch wichdigsti, wil er e Blick wit in s Elsass mööglig gmacht het. Es isch e runde Eggedurm gsi, wo am Egge vom Spaalegraabe und dr Klingelbärgstrooss gstande isch. In dr Middi vom 16. Joorhundert het mä denn grad bim Durm s Waasebollwärk baut, wo mä het chönne Kanoone ufstelle, zum dr Durm und d Stadtmuure gege Aagriff vo Norde z verdäidige.

1484 het dr Mooler Bertholomäus Rutenzweig, wo zu de Näägelimäister ghöört het, dr Durm aagmoolt. Im 17. Joorhundert het men en achteggige zwäite Stock, wo oobe druf e Gloggedürmli gha het, druf ufbaut. In dr Middi vom 19. Joorhundert häi denn d Basler afo iigsee, ass Stadtmuure nüm zitgmääss si und am 27. Juni 1859 isch s Gsetz zur Erwiterig vo dr Stadt aagnoo worde. Noch däm Gsetz hät mä d Stadtmuure under anderem im Norde vo dr Stadt sötte lo sii, aber scho vier Joor spööter isch d Muure au bim Lueginsland abbroche worde.

1868 het d Stadt beschlosse, uf dr süüdlige Site vom Waasebollwärk d Aastalt für Füsik, Chemii und Astrologii z baue, wo denn Bernoullianum dauft worde isch. 1871 isch denn dr Lueginsland abbroche und dr Stadtgraabe ufgfüllt worde.

Kwelle

• Luginsland beim Hohen Wall uf Basler Bauten, abgrüeft am 19. Oktober 2012
• Eugen A. Meier, Basel einst und jetzt: der Wandel des Basler Stadtbildes im Lauf der Zeit, Buchverlag Basler Zeitung, 1994 - Basel, S.196f

Fuessnoote

47.5601514199517.5800514221191