Dr Thomasdurm

Dr Thomasdurm isch en ehemolige Wachdurm vo dr Basler Stadtmuure. Er isch dr nördligst Uferpunkt vo dr Stadt und het as Befestigungsdurm vo dr Üssere Stadtmuure gegenüber em Rhii und em Land dient.

Dr Thomasdurm isch scho in dr Wachornig vo 1374 as "sant Thomans thurne" erwähnt worde. Dört stoht au gschriibe, ass d Schifflüt und Fischer für e Durm verantwortlig gsi si. Si Name chunnt vom Erzbischof Thomas Becket vo Canterbury, wo 1170 in sinere Kathedrale ermordet worden isch. E Statue ihm zu Ehre isch an dr Durmsite gegen e Rhii gstande.

1806 isch d Statue wäggnoh worde und mä het dr oberi Stock vom Durm abgrisse. Dr Gross Root vo Basel het beschlosse, d Schanze, wo bim Durm glägen isch, zun ere Promenade umzbaue und dr Durm drfür z opfere. Wo 1882/83 dr "Santihans-Rhiiwäg" agleit worden isch, sin die undere Stöck im Bode verschwunde; so isch us em Durm, wo früehner emol us em Rhii uusegstanden isch, e Durmstumpe worde. Däm het mä denn 1888 e dekorative Zinnechranz oobe druf do.

Am Fuess vom Durm findet jedes Johr am Barbaradag, am 4. Dezämber, am halbsibni z Oobe s draditionelle Salutschiesse vom Ardilleriiverein Basel-Stadt statt.