Biosphärebiet Schwarzwald

Dialäkt: Undermarkgreflerisch

Blick vum Belchen uf s Biosphärebiet Schwarzwald

S Biosphärebiet Schwarzwald lyt im Sidschwarzwald un isch anne 2016 yygrichtet wore. D Gschäftsstell het ihre Sitz in dr Stadt Schännau. S isch noch em 2008 yygrichtete Biosphärebiet Schwebischi Alb s zwait Biosphärreservat z Bade-Wirttebärg. Im Juni 2017 isch s vu dr UNESCO anerkännt wore.

Gschicht

Z Bade-Wirttebärg het bis anne 2008 kai Biosphärereservat un au kai Nationalpark gee. Im Johr 2008 isch uf em ehmolige Druppeniebigsblatz Mensenga s Biosphärebiet Schwebischi Alb gschaffe wore. S Land Bade-Wirttebärg nännt Biosphärreservat Biosphärengebiet. No dr Yyrichtig vum Nationalpark Schwarzwald 2014 isch im Naturpark Sidschwarzwald, wu s scho gee het, e Dailbiet zwische Schauinsland, Fälberg un Belche, Schluechs un Wisedal as Biosphärebiet uusgwise wore. Am 4. Jänner 2016 isch d Verornig vum neie Biosphärebiet Schwarzwald dur dr Naturschutzminischter Alexander Bonde (Grieni) z Bernau unterschribe wore. No dr Vereffetlichung vu dr Verornig vum Gsetzblatt vu Bade-Wirttebärg isch s Biosphärebiet zum 1. Februar 2016 yygrichtet wore. Im Juni 2016 isch dr Forschtwirt Walter Kemkes, bis dert Laiter vum Biosphärereservat Bliesgau, dr erscht Gschäftsfierer vum Biosphärebiet Schwarzwald wore. Ab Ab Juni 2016 sin d Bedailigungsprozäss fir Burger un Verbänd aaglofe.

Aafangs Augschte 2016 isch dr Aadrag uf Anerkännig dur d UNESCO fir s Biosphärebiet Schwarzwald fertiggstellt wore. Am 14. Juni 2017 isch s vu dr UNESCO anerkännt wore.

Lag

Zum Biosphärebiet Schwarzwald ghere 29 Gmaine mit ere Bietskulisse vu insgsamt 63.236 Hektar.

Zum Biosphärebiet ghere die Kommune:

• Landchrais Löörech: Aitere, Bölle, Chleis Wiisedal, Dodtnau, Fröhnd, Huuse, Häg-Ehrschberg, Schännau, Schöneberg, Schopfe, Tunau, Utzefäld, Wämbach, Wyde, Zäll

• Landchrais Waldshuet: Albbruck, Bernau, Dachsberg, Höcheschwand, Hüsere, Ibach, St. Bläsi, Üülinge-Birchedorf, Wäär, Dailbiet vu Wyle
• Landchrais Brysgau-Hochschwarzwald: Hinderzarte, Horbe, Oberried, Schluechs
• Stadt Fryburg

D Gmaine Fälberg mit em Fälberg sälber, Steine un s Dodtmis hän si gege ne Dailnahm entschide.

Weblink

• Mäldigen un Dokumänt zum Biosphärebiet Schwarzwald bim Regierigsbresidium Fryburg

Fueßnote

Dä Artikel basiert uff ere fräie Übersetzig vu dere Version vum Artikel „Biosphärengebiet_Schwarzwald“ vu de dütsche Wikipedia. E Liste vu de Autore un Versione isch do z finde.