Naturpark Südschwarzwald

d Lag vum Naturpark z Dütschland

De Naturpark Südschwarzwald isch 3.700 Quadratkilometer groß un dodemit de zweitgröscht Naturpark vu Dütschland.

Geografii

De Naturpark isch im Schwarzwald im Südweste vu Bade-Württebärg. Er ersträckt sich übber di chreisfräii Stadt Friiburg im Briisgau un d Landchreis Briisgau-Hochschwarzwald, Emmedinge, Lörrach, Waldshüet un de Schwarzwald-Baar-Chreis.

De Naturpark goht im Norde bis in de Mittler Schwarzwald uff Elzach un Driiberg im Schwarzwald-Baar-Chreis, im Weste längt er in de Landchreis Briisgau-Hochschwarzwald un Lörrach wie au bi Friiburg bis an de Rhii. Sini östligi Gränze litt hinter em Südschwarzwald am Rhii, im Oste goht er bis ans Alb-Wüete-Gebiet um Eschinge un Villinge-Schwenninge.

D Landschaft isch vu-n-ere Mischig us Offeland un Mischwälder brägt. Ihri landwirtschaftligi Nutzig längt vum Aabou vu Obbscht un Wii in de Däler übber Fleisch- un Milchbroduktion im Hochschwarzwald (s bekanntest Brodukt isch de Schwarzwälder Schinke) bis hii zù Getreide- un Rapsbroduktion uff de flache Halde im Oste. Wäge de vergliichswis nidrige Qualitet vum Bode wirft d Landwirtschaft abber nit e gnüeg große Gwinn ab, eso hänn rund 80 Brozänt vu de Bsitzer vu landwirtschaftlige Unternämme e anderi Hauptiinahmequälle. Als Symbol vu de Landwirtschaft were di regionale Rinderrasse Hinterwälder un Vorderwälder aaglüegt.

Naturschutz

E umwältgrächti Landwirtschaft soll durch e besseri Vermarktig vu de Brodukt erreicht were, was au de Verein vum Naturpark als eini vu sine Uffgabe aalüegt. Ußerdemm solle sälteni Arte, im Zäntrum de Luchs un s Auerhüen, wu im Gegesatz zù wite Deil vum rästlige Dütschland widder bzw. no verbreitet sin. Zwei Drittel vu de Flächi sin vu Wald bedeckt, ihm chunnt nit numme vu de Holzbroduktion här, sundern au als Läbensruum un im Tourismus e großi Bedütig züe.

Gschicht

Vorgänger vum Naturpark isch s friehjer Modällfördergebiet Südschwarzwald. Sini Förderig durch s Land Bade-Württebärg isch 1997 usgloffe, wiil mer abber scho blant gha hät, e Naturpark z gründe, isch si no bis zù de Gründig witergange. Am 1. Februar 1999 isch de Dreger, de Naturpark Südschwarzwald e. V., z Titisee-Neustadt gründet wore. Sini Mitglidschaft bsoht us de Landchreis innerhalb vum abdeckte Gebiet, 103 Stedt un Gmeinde wie au viili Verei, Unternämme un Brivatpersone. Sitz vum Verei isch Fäldberg uff em gliichnammige Bärg, wu mit 1.493 Meter de höchst Bärg vum Schwarzwald isch.

Tourismus un Usstellige

De Naturpark Südschwarzwald isch eini vu de wichtigste Touristeziil vu Bade-Württebärg. Aaziehigschräft für Touriste sin d Landschafte, wu im Bsüecher im Summer d Mögligkeit zum Wandere biete un im Winter zum Skiigebiet were.

In de Gmeind Fäldberg isch s Haus der Natur, wu im Bsüecher in ere Duur- un viile Wechselusstellige Iiblick in d Uffgabe vum Verei un in di natürligi Landschaft vu siner Region bietet.

Weblink

 Commons: Naturpark Südschwarzwald – Sammlig vo Multimediadateie

• d Website vom Naturpark Südschwarzwald

Einzelnochwiis

Dä Artikel basiert uff ere fräie Übersetzig vu dere Version vum Artikel „Naturpark_Südschwarzwald“ vu de dütsche Wikipedia. E Liste vu de Autore un Versione isch do z finde.