This Fetzer

De This Michel Fetzer (* 2. Septämber 1976 z Khuur) isch en Schwyzer Spraachwüsseschafter. Hüt schaffet er as Redakter am Schwyzerischen Idiotikon.

Läbe

De Fetzer isch z Mäiefäld uufgwachse. D Matuur hät er a der Evangeelische Mittelschuel Schiersch gmachet. Vo 1996 bis 2001 hät er a der Uniwèrsitèèt Züri und dezwüschet äis Jaar a der Uni Wien Soziology, gèrmanischtischi Linguischtik und Publizischtik gstudiert. Drufabe hät er es paar Jaar verschideni Praktika und Wolontariaat abgläit, öppe bim Verlaag Wissenschaft und Politik z Köln, bim Unionsverlag z Züri, bi de zäntraale Spraachdienst vo de Bundeskanzlei z Bèèrn und bi de tüütschspraachige Zytschrift PEP! z Budapest.

Ab 2006 isch er dänn as Toktorand an der Uniwèrsitèèt Bèèrn aagstelt gsy; promowiert woorden isch er deet 2009. Wäret dère Zyt und bis 2015 hät er am Oortsnamebuech vom Kanton Bèèrn mitgschaffet. 2015 isch er dänn a s Schwyzerisch Idiotikon choo und isch deet zeerscht wüsseschaftliche Mitarbäiter gsy. 2016 isch er dänn Redakter woorde. Denäbet schaffet er au am Roland Ris sym Buech über populèèri Bèèrner Oortsnäme mit. Öppe zää Jaar lang hät er dezue ane as Koräkter am schwuule/queere Mannschaft Magazin gwürkt.

Publikazioone (en Uuswaal)

Monografye

Aspekte toponymischer Volksetymologie. Das Beispiel des Kantons Bern (deutschsprachiger Teil). Dissertation Uni Bèèrn. Dybinge 2011.
Flurnamen Bündner Herrschaft. Ug. vo Kultur Herrschaft. Namedüütige vom This Fetzer, romanistischi Beraatig Valentin Vinzenz. Mäiefäld 2013.

Woortartikel

Artikel i de Bänd 3, 4 und 5 vom Oortsnamebuech vom Kanton Bèèrn.
Artikel im Band XVII vom Schwyzerischen Idiotikon.

Uufsätz

Alpnamen im Kanton Bern: Benennungsmotive und aussersprachliche Zusammenhänge. I: Proceedings of the 24th International Congress of Onomastic Sciences September 5–9, 2011. Barcelona. (online).
Namenwahl bei Schweizer Gemeindefusionen 1852 bis 2012: Rahmenbedingungen, Motive und Vergleichsnamen. I: Ojārs Bušs, Renāte Siliņa-Piņķe, Sanda Rapa (Ug.): Onomastikas pētījumi. Vallijas Dambes 100. dzimšanas dienai veltītās konferences materiāli / Onomastic Investigations. Proceedings of the International Scientific Conference to commemorate the 100th anniversary of Vallija Dambe. Rīga 2014, S. 63–107.
Toponymische Komposita in einem schweizerdeutschen Dialekt: vom nichttoponymischen Sprachgebrauch abweichende Wortakzentverhältnisse. I: Elke Hentschel (Ug.): Wortbildung im Deutschen. Aktuelle Perspektiven. Frankfurt 2016, S. 137–165.
Triine ‹einfältige, ungeschickte Person› und Hung-Ueli ‹wer jedermann süsse Worte gibt›: appellativisch verwendete Personennamen im Wörterbuch. I: Schweizerisches Idiotikon. Jahresbericht 2018. [Züri 2019], S. 21–32 (Digitalisaat).
Appellativischer Gebrauch von Personennamen im Schweizerdeutschen. I: Beiträge zur Namenforschung, Neue Folge 54, 2019, 157–188.

Weblink

This Fetzer uf idiotikon.ch