Alfred Farner (Germanist)

Dä Artikel handlet vom Gërmanischt Alfred Farner. Anderi Lüüt mit dëm Name findt men under Alfred Farner.

Dialäkt: Züritüütsch

Der Alfred Farner (* 11. Augschte 1883 z Ober- oder Understame; † 28. Mai 1946) isch en Schwyzer Gërmanischt gsy.

Er chunt, wie all Farner, us Stame ganz im Nordoschte vom Kanton Züri. Syn Vatter isch deet Pfarer gsy. D Matuur hät er z Schafuuse gmachet. 1903 hät er sich für äis Jaar a der Uniwërsitëët Züri i de medizynische Fakultëët imatrikuliert; nachanen isch er a den Uniwërsitëëten vo Münche, Häidelbërg und Berlyn gsy. 1907 bis 1912 hät er wider z Züri gstudiert, dasmaal aber Gërmanischtik.

1910–1911 hät er as Studänt bim Schwyzerischen Idiotikon «anerkennenswerte Dienste» as Hülffschraft gläischtet und isch au scho zur Redakzioonsaarbet anezoge woorde (mitgschaffet hät er byspilswys am Artikel Salb). Wil er nöd rächt zwääg gsy isch, hät er müese höre; und di schlächt Gsundhäit isch au de Grund gsy, das er s Stuudium nöd mit de Promozioon abgschlosse hät. Er hät dänn fascht di ganze Zäänerjaar duren as Leerer gschaffet.

Wo de Karl Stucki 1919 s Idiotikon verlaa hät und uf Bëërn isch, hät de Läitend Uusschuss zimli Müe ghaa, en Naachfolger z finde. Si sind dänn uf de Farner choo, und dëë hät im Oktoober 1919 as Redakter aagfange. Im Spaathërbscht 1922 hät er s Idiotikon aber scho wider verlaa, wider isch syni schitter Gsundhäit gschuld gsy. Für die drüü Jahr isch em aber bischyniget woorde, syni Aarbet «voller Hingebung» gläischtet ghaa z haa. Syn Naachfolger isch de Häinrich Chessler woorde.

De Farner isch dänn wider Leerer gsy und zwaar am «Institut Juventus» z Züri. Ghüraate hät er nie.

Quäle

• Verschideni Jaarespricht vom Schwyzerischen Idiotikon.
• Farner Alfred i de Matrikeledizioon vo der Uniwërsitëët Züri.