Lera Millard Thomas

Dialäkt: Mìlhüüserisch

D’ Lera Millard Thomas.

D’ Lera Millard Thomas (* 3. Àuigscht 1900 z’ Nacogdoches, Texas; † 23. Jüüli 1993 àui doo) ìsch a àmerikànischa Politikera vu dr Demokràtischa Pàrtäi un a Schurnàlischta gsìì. Vu 1966 bis 1967 hàt sa dr Bundesschtààt Texas ìm Represantàntahüss vu da Verainigta Schtààta vertratta.

ìhra Laawa un Kàrriar

D’ Lera Millard ìsch ànna 1900 ìn dr Old North Church-Gmainschàft z’ Nacogdoches, ìm Oschta vum Texas, uff d’ Walt kumma. Sa ìsch ìn d’ Sekundàrschüal vu Nacogdoches gànga hàt doo a Schüalàbschluss bschtànda. Drnooh hàt sa zwai Joohra làng àm Brenau College vu Gainesville (Georgia) gschtudiart, un schpeeter àn dr Üniwärsiteet vum Alabama, wu sa àn dr Grìndung vu dr Schtudantaverbìndung Delta Delta Delta mìtgmàcht hàt. Sa hàt àwwer ìhra Schtudia fàralooh, fìr ìm Joohr 1922 dr Kongrassàbgoordnet Albert Thomas hiiroota. Mìt ìhrem Ehamànn hàt sa uff Houston gwàndelt, wu sa Mìtglìed vu dr Fràuijawahlerverainigung worra-n-ìsch. Dr Ehamànn ìsch ànna 1936 àls Mìtglìed vum àmerikànischa Kongrass gwählt worra, àlso hàt s’ Pààr z’ Washington, D.C. gwoohnt. Zamma han d’ Thomas z’äärscht a Suhn ghàà, wo mìt äbb zehn Joohra àlt gschtoorwa-n-ìsch, un drnooh han sa zwai Teechter ghàà. Ìm Nowamber 1963 ìsch d’ Thomas biim Owaassa gsìì, wo d’ Demokràta z’ Houston orgànisiart han, fìr ìhra schweerkrànka Ehamànn ìwwerziiga, nochamol Kàndidàt fìr dr Kongrass z’ sìì. Àn dam Assa ìsch sa bim Presidànt gsassa, vor äbb’r àm nachschta Tààg z’ Dallas ärmoordert worra-n-ìsch.

Wu-n-ìhra Ehamànn ànna 1966 gschtoorwa-n-ìsch, ìsch d’ Thomas àls siina Noohfolgera-n-ìn dr Kongrass gwählt worra. Sa ìsch d’ demokràtischa Kàndiàta gsìì; bii dara Wàhl hàt sa mehr àss 74 Prozant vu da Schtìmma gega dr Repüblikàner Louis Leman bikumma, wo-n-ìn siina Wahler ämpfoohla hàt, fìr sìe z’ wähla. Zwìschem 26. März 1966 un em 3. Janner 1967 hàt sa àlso ìm Kongrass d’ Legislàtüürperiooda vun ìhrer Ehamànn witter gmàcht. Sa ìsch d’ äärschta Fràui gsìì, wo s’ Texas ìm Represantàntahüss vertratta hàt. Ìm Hüss ìsch sa Mìtglìed vum Üssschuss um d’ Hàndelsmàrina un d’ Fìscheräi gsìì, wu sa d’ Finànziarung fìr d’ Vergreesserung vum Schìffkànàl vu Houston befìrwortet hàt. Ìn ìhrem Bezirk hàt sa d’ Grìndung vun’ra lokàla Àbtailung vu dr NASA unterschtìtzt. Àn dr Wàhl vu 1966 hàt d’ Thomas nìt mìtgmàcht.

Noh-n-em And vun ìhrer Àmtszitt ìm Kongrass hàt d’ Thomas fìr d’ Beheerda vu da Verainigta Schtààta fìr d’ Internàzionàla Äntwìcklung (USAID) gschàfft. Bis 1968 ìsch sa Brìchtärschtällera fìr d’ Zittung Houston Chronicle ìm Vietnam gsìì, wu sa-n-ìwwer dr Vietnamkriag brìchtet hàt. Doo ìsch sa ìn’ra Schlàcht gsìì. Ìn dr Thomas ìhra Mainung ìwwer s’ Vietnam ìsch unterschiedlig gsìì vu da vun àndra Demokràta: sa hàt gsajt, àss d’ àmerikànischa Bìrger uffs Vietnam raisa solla, fìr ìn da Vietnameesa d’ Demokràtii z’ lehra. Wu sa uff Texas z’ruckkumma-n-ìsch, hàt sa bis ìhrem Tood ìn ìhrer Geburtschtàdt Nacogdoches gwoohnt. Doo hàt sa mehrera Gebäi räschtoriart, fìr s’ Hischtoorischa Dorf Millard’s Crossing grìnda. Drzüa ìsch sa wahrend ain Joohr ìm Verwàltungsroot vu dr Stephen F. Austin-Schtààtsüniwärsiteet gsìì, un ìsch Mìtglìed vu da Veraina Teechter vu dr Àmerikànischa Revolüzioon un Teechter vu dr Repüblik Texas worra. Üsserdam hàt d’ Thomas mehrera Üsszaichnunga bikumma, drunter d’ Gaala Roosa vum Texas ìm Joohr 1977, dr Ralph W. Steen-Priis ìm Joohr 1979, dr Priis vum Gouverneur vum Texas fìr d’ Äntwìcklung vum Tourischmus so wia dr Üsszaichneta Priis vu da Seehner vu dr Repüblik Texas ìm Joohr 1985. Sa ìsch àui ànna 1990 àls d’ „Fràui vum Tààg“ vu dr Àbtailung vu Nacogdoches vu dr Àmerikànischa Verain vu da Üniwärsiteetsfràuija, gwählt worra. Ànna 1991 ìsch sa àls „Paul-Harris-Gnossa“ vum Rotary International ärnännt worra.

D’ Lera Thomas ìsch àm 23. Jüüli 1993 t’haim z’ Millard’s Crossing gschtoorwa. Beardigt worra-n-ìsch sa ìm Grààbschtai vu dr Fàmìlia Thomas uff’m Oak Grove-Frìedhoof vu Nacogdoches.

Ìm Làuif vu dr Zitt hàt ma d’ Ärrìnnerung àn d’ Lera Thomas fàscht gànz vergassa. Ìn mehrera Kwalla hàt ma sìe d’ „Fràui Albert Thomas“ gnännt. Schpeeter han vìel Litt glàuiwa, àss d’ Barbara Jordan d’ äärschta texanischa Fràui ìm Represantàntahüss gsìì-n-ìsch, wàs fàlsch ìsch.

Lìteràtüür

• Lera Millard Thomas. In: Matthew Andrew Wasniewski (Hrsg.): Women in Congress: 1917–2006. Represantàntahüss vu da Verainigta Schtààta, Üssschuss um d’ Hüssverwàltung, Office of the Clerk, 2007, S. 319 (englisch, google.fr [abgerufen am 24. September 2021]). 
• Lera Millard Thomas. In: Women in Congress, 1917–1990. Government Printing Office, Washington 1991, S. 253–254 (englisch, google.fr [abgerufen am 24. September 2021]). 
• Abby Livingston, Claire Parker: Texas sent its first woman to Congress in 1966. Why has she been largely forgotten? In: The Texas Tribune. 15. Juni 2018 (englisch, texastribune.org [abgerufen am 24. September 2021]). 

Weblinks

 Commons: Lera Millard Thomas – Sammlig vo Multimediadateie

• Lera Millard Thomas im Biographical Directory of the United States Congress
• Lera Millard Thomas. Texas Women’s Foundation, abgruefen am 24. September 2021 (änglisch). 
• Lera Millard Thomas. Stephen F. Austin-Schtààtsüniwärsiteet, 26. April 2021, abgruefen am 26. April 2021 (änglisch). 

• Lera Millard Thomas in dr Datebank vu Find a Grave