George H. W. Bush

Dr George Herbert Walker Bush, meischt eifach George Bush, (* 12. Juni 1924 z Milton, Massachusetts; † 30. Novämber 2018 z Houston, Texas) isch e US-amerikanische Politiker vo de Republikanische Party gsy. Vo 1989 bis 1993 isch er de 41. Presidänt vo de Vereinigte Staate gsy.

De Bush isch im Ölgschäft tätig gsy. Syni politischi Karriere het 1967 aagfange, als Abgordnete im Repräsentantehuus für Texas. Vo 1976 bis 1977 isch er Diräkter vo de CIA gsy. I de Amtszyt vom Ronald Reagan isch er vo 1981 bis 1989 de Vizepresidänt vo de USA gsy.

De Bush het d Presidäntschaftswahl 1988 gwunne und isch dademit de Nachfolger vom Reagan im Wysse Huus worde. Als Presidänt het er under anderem s Ändi vom Chalte Chrieg mit em Fall vo de Berliner Muur und de Uflösig vo de Sowjetunion miterläbt und het sys Land gschickt dur die schwirig Zyt manövriert. Äär isch es au gsy, wo d Widervereinigung vo Tütschland gäge de Widerstand vo de Brite, Franzose und Russe duregsetzt het. Nach em Überfall vom Irak uf Kuwait mit syne Ölfälder het er 1991 e Chrieg gäge s Regime vom Saddam Hussein gfüehrt, het aber – andersch as spääter syn Sohn – druff verzichtet, der Irak wele bsetze. I der amerikanische Innepolitik het er zum Teil mit de Demokrate zämegschaffet, was em under de Republikaner vil Gägnerschaft ypraacht het. I de Presidentschaftswahl 1992 het er sich em Demokrat Bill Clinton müesse gschlage gää und isch drum 1993 nach einere Amtsperiode abglöst worde.

Er isch de Vatter vom ehemalige US-Presidänt George W. Bush und vom ehemalige Gouverneur vo Florida, em Jeb Bush, gsy.