Choice B. Randell
| Dialäkt: Mìlhüüserisch |
Dr Choice Boswell Randell (* 1. Janner 1857 bii Spring Place, Murray County, Georgia; † 19. Oktoower 1945 z’ Sherman, Texas) ìsch a àmerikànischer Jurischt un Politiker vu dr Demokràtischa Pàrtäi gsìì. Vu 1901 bis 1913 hàt’r dr Bundesschtààt Texas ìm Represantàntahüss vu da Verainigta Schtààta vertratta.
sii Laawa un Kàrriar
[ändere | Quälltäxt bearbeite]Dr Choice Boswell Randell ìsch ànna 1857 bii Spring Place ìm Murray County ìm Nordwäschta vum Bundesschtààt Georgia-n-uff d’ Walt kumma, àls Suhn vum James L. un vu dr Louisa Amantha Randell geborena Gartrell. Ar ìsch ìn siinera Haimet ìn äffentliga un ìn priwààta Schüala gànga, un hàt schpeeter àn dr Làndwìrtschàftliga Hoochschüal vum Nordgeorgia gschtudiart. Dia Schtudia hàt’r ànna 1878 unterbroocha, fìr wahrend ainem Joohr Racht schtudiara. Ìm gliicha Joohr ìsch’r àls Rachtsànwàlt züaglooh worra. Àls Ànwàlt hàt’r z’äärscht z’ Denison ìm Texas gschàfft. Ìm Janner 1879 hàt’r uff Denison gwàndelt, wu-n-’r sii aigana Ànwàltsbüroo grìnda hàt. Z’ Denison ìsch’r Hàuiptmànn ìn dr lokàla Milizia worra, un schpeeter Owerscht ìm viarta Regimant vu dr texanischa Schtààtsmilizia. Gliichzittlig hàt’r àls Mìtglìed vu dr Demokràtischa Pàrtäi siina politischa Kàrriar ààgfànga. Ar ìsch ànna 1881 àls Schtàdtànwàlt vu Denison gwählt worra. Züadam ìsch’r vu 1882 bis 1888 Bezirksschtààtsànwàlt vum Grayson County gsìì.
Bii da Kongrasswàhla vu 1900 hàt ma dr Randell ìm fìmfta Wàhlbezirk vum Texas ìns àmerikànischa Represantàntahüss gwählt, wu-n-’r àb’m 4. März 1901 àls Noohfolger vum Joseph Weldon Bailey gsassa-n-ìsch. Ar ìsch fìmfa Mool wìdergwählt worra un ìsch àlso bis àm 3. März 1913 ìm Kongrass blìewa. Nohdam àss ma d’ texanischa Wàhlbezirka umgschtällt hàt, hàt’r àb 1903 àls Noohfolger vum Morris Sheppard dr viarta Bezirk ìm Represantàntahüss vertratta. Zamma mìt’m Sheppard hàt’r a Gsätzäntwurf iigfiahrt, fìr àss d’ Bundesregiarung a Untersüachung màcha làsst, fìr dr Roota Fluss zwìscha Fulton (Arkansas) un Denison schìfffàhrbàr màcha. Züadam hàt’r mehrera Gsätzer befìrwortet, fìr àss d’ Regiarung äffentliga Gebäi ìn texanischa Schtädt bàuia làsst. A hàt àui a Gsätz gschrìewa, fìr d’ Beschtachung vu da Kongrassàbgoordneter bekampfa.[1] Àls Represantànt hàt dr Randell d’ Fràuijawàhlracht nìt unterschtìtzt: ar hàt ìn dr Fràuijarachtlera Ermina Thompson Folsom a Briaf gschrìewa, wu-n-’r sìch geega d’ Wàhlracht vu da àfroàmerikànischa Fràuija iigschtällt hàt.[2] Dia Mainung ìsch ìn dara Zitt verbraitet gsìì ìn da Süüdschtààta.[3] Ìm Joohr 1912 hàt dr Randell àn dr Wähl fìrs Represantàntahüss nìt mìtgmocht. Schtàttdässa hàt’r demokràtischer Kàndidàt wälla sìì fìr d’ Senàtwàhl,[1] àwwer ìsch nìt vu siinera Pàrtäi nominiart worra.
Noh-n-em And vu siinera Àmtszitt ìm Represantàntahüss ìsch dr Randell üss dr Politik z’rucktratta. Ìn da folgenda Joohra hàt’r witter àls Ànwàlt gschàfft, desmol z’ Sherman ìm Texas.
Dr Choice Randell ìsch àm 19. Oktoower ìn’ma Krànkahüss z’ Sherman gschtoorwa, ìm Àlter vun 88 Joohra. Beardigt worra-n-ìsch’r uff’m West Hills-Frìedhoof vu Sherman. Ar ìsch dr Nöövö gsìì vum Lucius Jeremiah Gartrell, wo Kongrassàbgoordneter fìrs Georgia gsìì-n-ìsch. Ar ìsch Presbyteriàner un Fräimüürer gsìì, so wia Mìtglìed vu da Orgànisàzioona Knights of Pythias,[4] Odd Fellows, Woodmen of the World un Improved Order of Red Men. Àm 29. Oktoower 1879 hàt’r z’ Natchez ìm Mississippi d’ Anna Marschalk ghiiroota ghàà. Mìt ìhr hàt’r a Suhn ghàà, wo Andrew ghaissa hàt.
Lìteràtüür
[ändere | Quälltäxt bearbeite]- Brian Hart: Randell, Choice Boswell. In: Handbook of Texas Online. Texas State Historical Association, 1952 (englisch, tshaonline.org [abgerufen am 7. Oktober 2021]).
- Choice Boswell Randell. In: Ben R. Guttery (Hrsg.): Representing Texas. 2007, ISBN 978-1-4196-7884-4, S. 125–126 (englisch, google.fr [abgerufen am 7. Oktober 2021]).
Weblinks
[ändere | Quälltäxt bearbeite]- Choice B. Randell im Biographical Directory of the United States Congress
- Choice B. Randell in dr Datebank vu Find a Grave
Ainzelnohwiisa
[ändere | Quälltäxt bearbeite]- ↑ 1,0 1,1 Anthony Champagne, Dr. Douglas B. Harris, James W. Riddlesperger Jr, Dr. Garrison Nelson: The Austin-Boston Connection: Five Decades of House Democratic Leadership, 1937–1989. TAMU, 2009, ISBN 978-1-60344-120-9, S. 36 (englisch).
- ↑ C.B. Randell to Erminia Folsom, November 25, 1910. Texas State Library and Archives Commission, archiviert vom Original am 5. Mai 2016; abgruefen am 7. Oktober 2021.
- ↑ Deborah C. Pollack: Visual Art and the Urban Evolution of the New South. University of South Carolina Press, 2015, ISBN 978-1-61117-433-5 (englisch, google.fr [abgerufen am 7. Oktober 2021]): “As ludicrous as it sounds to twenty-first-century minds, Randell’s reasoning was apparently widespread throughout the South (...).”
- ↑ Notable Pythians. Knights of Pythias, abgruefen am 7. Oktober 2021 (änglisch).
