Bad Liabazell
| Wappa | Deitschlandkart | |
|---|---|---|
|
| |
| Basisdata | ||
| Dialekt: | Alemannisch | |
| Hauptvariante: | Schwäbisch | |
| Regionalvariante: | Nordschwarzwald | |
| Bundesland: | Bade-Wirttebärg | |
| Regierongsbezirk: | Karlsrua | |
| Landkroes: | Calb | |
| Heh: | 333 m i. NHN | |
| Fläch: | 33,8 km² | |
| Eiwohner: |
9795 (31. Dez. 2022)[1] | |
| Bevelkerongsdicht: | 290 Eiwohner je km² | |
| Boschtloetzahl: | 75378 | |
| Vorwahlen: | 07052 07084 Maisenbach-Zainen | |
| Kfz-Kennzoeche: | CW | |
| Gmoedsschlissel: | 08 2 35 008 | |
| Stadtgliderong: | 7 Ortsdoel | |
| Adress vo dr Stadtverwaltong: |
Kurhausdamm 2-4 75378 Bad Liebezell | |
| Webpräsenz: | ||
| Schuldes: | Dietmar Fischer (CDU) | |
| Lag vo de Stadt Bad Liebezell em Landkroes Calb | ||
 | ||
| Dialäkt: Schwäbisch |
Bad Liabazell (amtlich Bad Liebenzell) isch a Schdäddle em Nagolddaal midd-ora laanga Gschiicht. Dor Hirsauer Codex låd vormuada, dass Bad Liabazell scho vår 1100 exischdird hådd. Em schbåda Middlaldor hådd´s Amt Liebenzell de Markgrafe vo Bade ghaerd. Em Jår 1604 isch´s durch Dausch zo Wirddabärg komma.
Midd saenor Paracelsus-Therme isch Bad Liabazell oene vo de vier Gmaendena em Graes Calw midd-em Titl "Bad". Ausor Bad Liabazell send dees no Bad Härraalb, Bad Daenach ond Bad Wildbad. Deswäaga håesd sich der Graes Calw ao Bädorgraes. D Stauferburg ausem 13. Jårhondord isch s´ bedeidensde Bauwärg vo Bad Liabazell, mo må mor scho vo Weidem här siid. En Liabazell schwäddsd-mor schwäbisch, mid-ma ganz leichda sidfränggischa Aeschlag. Em Jår 2011 håd Liabazell 9.295 Aewohnor zeeld.
S´ Schdaddwabba zaegd a silbrichs Zäld, en dem a näggichor Mã en-ra volla Baadwann hoggd ond on blaua Kelch en dor Hãd hådd. Dui gold-gfliasda Baadwann schdåd uf-ma schachbrädd-ardicha schwarz-goldena bläddleda Boda. Em blaoa Hemml iborm Zäld dribor schwäbd a oenzälna Hirschschdang, was so vil håesd wia dass Bad Liabazell zo Wirddabärg ghaerd. D´ Schdaddfarba send Blao-Weis.
Seid 1992 geid´s a Partnorschafd mid Villaines la Juhel en Franggreich.
Schdaddaedåelong
[ändere | Quälltäxt bearbeite]Zo Bad Liabazell ghaered ausarom seggs Flägga, älle uff dor Haeche ibor dor Nagold:
- Em Osda, rächds vo dor Nagold: Meddleng (Möttlingen), Monakam ond Ondorhaugsdedd (Unterhaugstett).
- Em Wäsda, lenggs vo dor Nagold: Boabärg (Beinberg), Måasabach-Zåana (Maisenbach-Zainen) ond Ondorlengahaard (Unterlengenhardt).
Em Daal en Liabazell und rächds vo dor Nagold schwätzed d´ eldore Leid "oe/åe", ond en de Flägga lenggs vor dor Nagold "oa/åa".
Geografi
[ändere | Quälltäxt bearbeite]Bad Liabazell leid ogfär 10 km nerdlich vo Calw, an dor Nagold; dui fliasd middla durch dor Flägga durch. Dor diafsde Punkt leid 310 m diaf, då må d´ Nagold d´ Gemarkung vorlessd, dor haechschde Punkt leid 687 m haoch uff dor Gemarkung vo Måesabach-Zåena.
Gschichd
[ändere | Quälltäxt bearbeite]Bad Liabazell ischd zom erscht Mol gnennd worde em Johr 1091 als zu Chele.
Verwaltong
[ändere | Quälltäxt bearbeite]Bad Liabazell hod mit dr Gmoed Onderereichabach a Verwaltongsgmoeschaft vereibard.
Dr Birgermoeschter vo Bad Liabazell ischt dr Dietmar Fischer.
Wahla
[ändere | Quälltäxt bearbeite]Ergäbnis vo de Landdagswahla seid 2006:[2]
| Johr | CDU | Greane | SPD | FDP | Lenke1 | AfD | Sonschtiche |
| 2016 | 31,3 % | 28,5 % | 8,1 % | 7,8 % | 2,5 % | 18 % | 3,8 % |
| 2011 | 41,8 % | 24,6 % | 17,3 % | 6,1 % | 2,9 % | 7,3 % | |
| 2006 | 43,4 % | 11,8 % | 21,7 % | 11,5 % | 3,4 % | 8,2 % |
1 2006: WASG, seid 2011: Die Linke
Schuala
[ändere | Quälltäxt bearbeite]Bad Liabazell hådd mid saem Reuchlin-Schulzentrum a Grondschual, a Haobdschual, a Realschual ond a Ferderschual. En de Ortsdåel Meddleng ond Ondorhaugsdedd geid´s jeweils ao a Grundschual.
Religiona
[ändere | Quälltäxt bearbeite]Bad Liabezell mid saenor Bläsikirch (St. Blasiuskirche) isch vo aldors här evangelisch, s´ hådd enzwischa abor ao a Katholischa Kirch em Flägga. En Liabazell isch d´ Zendrale vo dor gleichnamiga "Liebenzeller Mission". Dådurch isch Bad Liabazell en vile Lendor uff dor Wäld bekannd.
Tourismus ond Vorkehr
[ändere | Quälltäxt bearbeite]Bad Liebenzell isch durch d´ Nagoldtalbahn (Pforzheim - Horb am Neckar) ans iborregionale Schdregganetz ãgschlossa.
Vo Liabazell aus kã-mor viel scheene Wandoronga macha, em Daal ond uff d´ Bärg nuff. Bsondors schee isch a Wandorong durchs Mõbachdaal nuff zom Ordsdåel Monakam. Bad Liabazell leid ausordem am Oschdwäag, dem Fernwandorwäag vo Pforze nåch Schaffhausa.
Tradiziona
[ändere | Quälltäxt bearbeite]Uffm Hofgut Georgenau bei Meddleng fended äll Jår am Palmsonndich dor Calwer Palmridd schdadd, dees isch a Reidorprozessio, må vom-a Esl ãgfird wird. Vorbonda isch dui Prozessio am Schluss midd-ma evangelischa Gottesdianschd em Griana.
Dialekt
[ändere | Quälltäxt bearbeite]Dr Dialekt vo Bad Liabazell ghert zom Schwäbische.
Bekannde Leid
[ändere | Quälltäxt bearbeite]- Joh. Christoph Blumhardt, * 16.6.1805 en Schduagord (Stuttgart), † 25.8.1880 en Bad Boll. Dor Blumhardt isch vo 1838 bis 1852 en Meddleng Pfarror gwäa. Saene Gebetshaelonga hend en ganz Deidschland Ufsäha erregd. En Bad Boll hådd-or dornåch a Seelsorgzentrum grended.
- Marie Hart (1856–1924), Mundartautori us em Elsass, hadd z Liabazell ihr Läbesobed verbroocht
Em Web
[ändere | Quälltäxt bearbeite]- Offiziella Homepage vo Bad Liabazell
- Möttlinger-Unterhaugstetter Tischtennisverein Bad Liebenzell e. V.
- Unterlengenhardt Ortsteil von Bad Liebenzell uf stadtverwaltung.bad-liebenzell.de
Fuaßnote
[ändere | Quälltäxt bearbeite]- ↑ Statistisches Landesamt Baden-Württemberg – Bevölkerung nach Nationalität und Geschlecht am 31. Dezember 2022 (CSV-Datei).
- ↑ Statistisches Landesamt Baden-Württemberg: Landtagswahl (Memento vom 7. Juli 2019 im Internet Archive)
|
Dä Artikel basiert uff ere fräie Übersetzig vum Artikel „Bad_Liebenzell“ vu de dütsche Wikipedia. E Liste vu de Autore un Versione isch do z finde. |