D St. Jakobs-Kiirche Baasel

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

47.5419444444447.6177777777778Koordinaten: 47° 32′ 31″ N, 7° 37′ 4″ O; CH1903: 613488 / 265706

St. Jakobskirche Basel
Dialäkt: Baseldütsch

D St.-Jakobs-Kiirche isch e evangelisch-reformierti Kiirche in dr Stadt Baasel. Si befindet sich im Dalbe-Kwardier und isch em Jakobus em Eltere gweiht. D Kiirche zelt as e Baasler Kulturguet, wo für d Regioon vo Bedütig isch.

Baugschicht[ändere | Quälltäxt bearbeite]

In dr Nööchi vo dr Brugg über d Birs, wo um s Joor 1100 zum erste Mol erwäänt wird, het sich woorschinlig scho im 11. Joorhundert e Kapälle befunde, wo im Apostel Jakobus em Eltere, em Schutzpatron vo de Räisende, gweiht gsi isch.

Us em 13. Joorhundert git s die erste Ufzäichnige zum Siechehuus, wo denn zumol dusse vor dr Stadt glääge isch und wo leprachranki Lüt us Baasel gläbt häi. S Siechehuus und d Kapälle si dur d Schlacht bi St. Jakob an dr Birs 1444 bekannt worde, won e chliises äidgenössischs Kontingänt vo dr franzöösische Armaniakearmee dört massakriert worde isch. Noch dr Schlacht het mä d Geböid wider ufbaut. 1837 het dr Christoph Meriaa d Kiirche und d Liigeschafte drum ume ufkauft und si spööter as Däil vo dr Christoph Meriaa Stifdig dr Stadt Baasel vermacht.

1894 isch s Geböid vo Grund uf ernöijeret worde. Vom Langhuus im Weste het mä d Sitemuure und e baar Äinzeldäil wider bim Nöibau verwändet und het s uf Oste aane mit eme Kweerhuus vergrösseret. Im Oste het mä no en Altarruum aabaut und d Vorhalle im Weste abbroche. Die ganzi Innenusstattig und dr Dach- und Durmufbau stamme us em spoote 19. Joorhundert. D Freske an dr Fassade het dr Alfred Heinrich Pellegrini 1919 gmoolt und zäige dr Arnold Schick, wien er in dr Schlacht vo 1444 em Burkhard VII. Münch, wo choo isch zum d Äidgenosse z verspotte, e Stäi aagheit, und dä isch denn e baar Dääg spööter draa gstorbe. In dr Fassaade isch au e Gedänkdaafele, wo an d Schlacht vo 1444 erinneret.

Kwelle[ändere | Quälltäxt bearbeite]

  • Philipp Reclam Jun.: Reclams Kunstführer Schweiz und Liechtenstein. Reclam-Verlag, Stuttgart, 1966.
  • François Maurer-Kuhn: Kunstführer Kanton Basel-Stadt. Büchler Verlag, Wabern, 1980. ISBN 3-7170-0183-3.

Lueg au[ändere | Quälltäxt bearbeite]

Weblingg[ändere | Quälltäxt bearbeite]

Information icon.svg Dä Artikel basiert uff ere fräie Übersetzig vum Artikel „St.-Jakobs-Kirche_(Basel)“ vu de dütsche Wikipedia.

E Liste vu de Autore un Versione isch do z finde.