D Baasler Pauluskiirche

D Frontfassade vo dr Pauluskiirche

Dialäkt: Baseldütsch

D Apsis vo dr Kiirche, ufgno vo dr Paulusgass us.

D Pauluskiirche in dr Stadt Baasel isch en evangelisch-reformierti Kiirche im neuromanische Stil, wo uf eme dreieggige Grundstück e chli hööcher as d Umgääbig (öbbe 1.5 Meter) im Ring-Kwartier in dr Nööchi vo dr Schützematte stoot.

D Pauluskiirche stoot uf dr Liste vo de Kulturgüeter im Kantoon Basel-Stadt, wo nazionaali Bedütig häi.

Gschicht

D Kiirche isch zwüschen em Mai 1898 und em Novämber 1901 vo dr Archidektegmäinschaft Curjel und Moser baut worde. Am Sunndig, em 17. Novämber 1901, isch d Pauluskiirche mit drei Gottesdienst iigweiht worde.

D Archidektur

D Archidektursprooch

Dur si Laag und dur e monumental chrüzförmig Zentralbau mit em kwadratische Durm und dr Fänsterroose, wo mä vo witem cha gsee, bildet dr Kiirchebau dr Fluchtpunkt vom Baanhoof SBB in Richdig Viaduktstrooss. D Formesprooch erinneret in iire Grundforme an die spooti Romanik.

D Fassade

D Fassade zäigt Flächtbänder, wo vom geometrische Jugendstil beiiflusst und as Flachrölief garbäitet worde si. Dr Ufgang und Hauptiigang isch gege Oste grichdet, d Usrichdig, wo sust üüblig gsi isch, het mä für d Pauluskiirche ufgee. S Rölief an dr Hauptfassade Christus hilft eme gfallnige Sünder ufstoo stammt vom Carl Burckhardt. D Figur mit em Erzängel Michael, wo d Drache besigt, het dr Oskar Kiefer gmacht.

Dr Inneruum

Im Inneruum sin d Sitzbänk im Halbkräis ufgräiht und eso cha mä vo überall diräkt uf d Kanzle luege. Bi dr Pauluskiirche isch dr Inneruum ufdäilt worde, grad wie s im Wiesbadener Programm stoot. S Mosaik us dr Kanzelnische stammt vom Heinrich Altherr und vom Max Laeuger si d Entwürf für d Glaasfänster. Si stelle d Gschicht vom Jesus daar, mit dr Wienacht, Karfritig, Ostere und s «Ändi vo dr Zit» us dr Offebaarig (11,15), wo en Ängel verkündet: Jetz ghöört d Herschaft über d Wält unserem Heer und sim Gsalbte (Christus).

D Usstattig

D Orgle

D Pauluskiirche het en Orgle, wo vo Orgelbau Kuhn (Männedorf) 1987 baut worde isch. Öbbe d Helfti vo de Pfife stamme us dr Vorgängerorgle vom Baasler Orglebauer Zimmermann us em Joor 1901. Si het 53 Register uf 3 Manual und d Disposizioon isch eso:

I Hauptwärk C–g3 Prinzipal 16′ Prinzipal 8′ Doppelflöte 8′ Rohrdeckt 8′ Viola da Gamba 8′ Oktave 4′ Blockflöte 4′ Quinte 22/3′ Superoktave 2′ Grossmixtur V 22/3′ Kläimixtur IV 11/3′ Kornett III–V (ab c0) 8′ Drumbeete 8′

II Positiv (schwellbar) C–g3 Quintadöön 16′ Giigeprinzipal 8′ Bourdon 8' Viola 8' Prinzipal 4′ Roorflöte 4′ Gämshorn 4′ Flascholet 2′ Gämsquinte 11/3′ Mixtur III–IV 2′ Drumbeete 8′ Klarinette 8′ Tremulant

III Schwellwärk C–g3 Bourdon 16′ Prinzipal 8′ Hoolflöte 8′ Salicional 8′ Voix céleste 8′ Oktave 4′ Querflöte 4′ Nasard 22/3′ Waldflöte 2′ Tièrce 13/5′ Sifflet 1′ Plein-jeu V 22/3′ Trompette harmonique 8′ Oboe 8′ Voix humaine 8′ Clairon harmonique 4′ Tremulant

Pedal C–f1 Subbass 32′ Prinzipalbass 16′ Subbass 16′ Zartbass 16' Oktavbass 8′ Lieblig Deckt 8′ Violoncello 8′ Oktave 4′ Flötbass 4′ Posuune 16′ Drumbeete 8′ Clairon 4′

• Kopple: II/I, III/I, III/II, I/P, II/P, III/P.
• Spiilhilfe: 6 festi Kombinazioone (P, MF, F, FF, TT, Pedaltutti), Setzeraalaag mit 256 Kombinazioone und Memory-Kartelääser, Registercrescendo.

D Glogge

D Pauluskiirche het im Ganze fümf Glogge.

Doon	Gwicht in kg	Spruch
b	432	Seid allezeit fröhlich!
ges	910	Betet ohne Unterlass!
es	1497	Seid dankbar in allen Dingen.
des	2088	Wandelt in der Liebe.
B	3575	Seid stark im Herrn.

Litratuur

• Evangelisch-reformierte Kirchengemeinde St. Leonhard: Pauluskirche. Baasel 2001.

Weblingg

 Commons: St. Paul's Church, Basel – Sammlig vo Multimediadateie

• ERK Basel-Stadt - Gemeinde Paulus
• Fotografie in dr Bilder-Datebank vom Kanton Basel-Stadt

47.5516666666677.5783333333333