Oliver Kahn

Us der alemannische Wikipedia, der freie Dialäkt-Enzyklopedy
Dialäkt: Bärndütsch
Oliver Kahn
Oliver Kahn (2018)
Personalia
Name Oliver Rolf Kahn
Wänn uf d Wält choo 15. Juni 1969
Wo uf d Wält choo KarlsruheDütschland
Größi 188 cm
Position Goali
Junioren
Johr Station
1975–1987 Karlsruher SC
Herre
Johr Station Spil (Tor)1
1987–1994 Karlsruher SC 128 (0)
1994–2008 FC Bayern Münche 429 (0)
Nationalmannschaft
Johr Uuswahl Spil (Tor)
1993–2006 Dütschland 86 (0)
1 Aagää sind nur Ligaspiil.

Der Oliver Rolf Kahn (* 15. Juni 1969 z Karlsruhe) isch e ehemalige dütsche Fuessballgoali u hütige -manager.
Är het bim Karlsruher SC mit em Fuessball agfange. So isch är Profi worden u het 1994 mit 25i zu FC Bayern Münche gwächslet. Dert het är 14 Jahr lang zahlrychi Titel gwunne. Zu dene Title het ou der Champions League u der Wältpokal ghört. Är isch drümal zum Wälttorhüeter vom Jahr gwählt worde u het 2002 als erschte u bislang einzige Goali der Guldig Ball für e beschti Spiler bi der Wältmeischterschaft übercho. Vo 1993 bis 2006 isch är bi 86 Länderspil im Goal vo der dütsche Nationalmannschaft gstanden u isch mit ihre 1996 Europameischter u 2002 Vizewältmeischter worde.

Syt 2008 het är als Fuessballexperte bim ZDF gschaffet u isch als Undernähmer tätig gsi. Syt em Jänner 2020 isch der Oliver Kahn Vorstandsmitglid vom FC Bayern Münche.

Usbildig u Familie[ändere | Quälltäxt bearbeite]

Der Oliver Kahn isch der Sohn vom Karlsruher Bundesliga-Fuessballspiler Rolf Kahn. Em Oliver Kahn sy eltere Brüetsch heisst Axel u isch äbefalls e ehemalige Karlsuher Profi-Fuessballer.

Der Oliver Kahn het 1988 ds Abitur im Helmholtz-Gymnasium z Karlsruhr abgleit u het afa Wirtschaftswüsseschaft a der Fernuniversität z Hage studiere, är het aber nur ds Grundstudium abgleit. Vo 2009 bis 2011 her är a der Privatuniversität Schloss Seeburg der Studiegang General Managemant mit em Nebefach Sportmanagemant studiert. Der Studiegang het är mit em akademische Grad Master of Business Administration abgschlossse.[1]

Im Juni 1999 het der Kahn syni langjährigi Fründin d Simone Belz ghürate. Mit ihre het är e Tochter (* 1998) u e Sohn (* 2003). Vo 2003 bis 2008 het är e Liaison mit der spätere Moderatori Verena Kerth gha. 2008 isch är zu syre Ehefrou zrügg u het sech im 2009 trennt. Am 8. Juli 2011 het är ds Model Svenja Kögel ghürate. Mit ihre het är e Sohn (* 2011) u e Tochter (* 2016).

D Karriere als Spiler[ändere | Quälltäxt bearbeite]

Im Verein[ändere | Quälltäxt bearbeite]

Der Kahn bim ene Spil vom FC Bayern Münche gäge FC Tokyo (2005)

Wo der Kahn 6i isch gsi het är mit Fuessballspile agfange. Zersch isch är Fäldspiler gsi. Är het du aber gly i’s Goal gwächselt. Nach eigete Agabe söll der Alass für dä Entscheid gsi sy, das sy Grossvater ihm zum Geburtstag e Goalidress vo der “Sepp-Maier-Edition” gschänkt het.[2] Sy erschti Verein isch der Karlsruher SC gsi, wo scho sy Vater der Rolf Kahn vo 1963 bis 1965 i der Bundesliga gspilt het. Ou sy Brüetsch Axel het für e KSC mehreri Spil im Profifuessball absolviert. Als Goali het der Oliver Kahn der Jugendbereich dürloufe u het aschliessned i der Amateurmannschaft vo däm Verein gspilt.[3] I der Saison 1987/88 isch är z erschte Mal bi de Profis uf der Uswächselbank gsässen u het am 27. Novämber 1987 z Köln sys Bundesligadebüt gä. Im Novämber 1990 het är sech i der Bundesligamannschaft vom KSC e Stammplatz erarbeitet u het bis zum Wächsel als unagfochteni Nummer eis im Goal gspilt. Der KSC het under em Trainer Wini Schäfer im Jahr 1993 u 1994 jewile der 6. Platz erreicht. Das isch di bislang beschti Platzierig vom KSC i der Bundesliga gsi. Der Oliver Kahn isch ou bim Wunder vom Wildpark 1993 im Goal gstande, wo der KSC der FC Valencia i mene UEFA-Pokal-Spil mit 7:0 gschlage het.[4]

Der Kahn isch du für 4,6 Millione D-Mark (rund 1,4 Millione Franke) 1994 als Nachfolger vom Raimond Oumee zum FC Bayern Münche gwächslet. So vil het me bis här no nie für ne Bundesliga-Goali zahlt.[5] Währed syre Zyt bim FC Bayern het är der UEFA-Pokal, acht mal di Dütschi Meischterschaft, sächs mal der Ligapokal, sächs mal der DFB-Pokal, einisch d UEFA-Champions League u einisch der Wältpokal gwunne. Nume der Baschtian Schweinschteiger het der DFB-Pokal hüfiger gwunne als der Oliver Kahn. Zäme mit em Mehmet Scholl, em Baschtian Schweinschteiger u em Philipp Lahm teilt der Kahn mit acht gwunnene dütsche Meischtertitel der zwöiti Platz hinder em Franck Ribéry mit nün gwunnene Title.

Währed syre Vereinskarriere isch der Kahn oft vo de gägnerische Fans mit Banane beworfe worde, um ne wäg syre agäbleche Ähnlechkeit mit em ne Gorilla z verspotte. I der Saison 2000/01 isch es am 34. Spiltag (19. Mai 2001) im Spil gäge der Hamburger SV wäg däm zu mene bemerkenswärte Ereignis im Fernduell mit Schalke 04 um di dütschi Meischterschaft cho. D Parti isch wäg de Banane wo uf’s Spilfäld sy gschosse wurden u der dadruus resultierende Ufrumarbeite verspätet Apfiffe worde. Das het derzue gfüehrt, dass i de andere Stadie d Parti scho isch Abpfiffe gsi, wäret im Volksparkstadion z Hamburg geng no isch gspilt worde. Nachdäm der HSV mit 1:0 i Füehrig gangen isch, het’s für d Meischterschaft schlächt usgseh. I der dritte Minute vo der Nachspilzyt het eine vo der HSV Spiler der Ball zum Goali Mathias Schober gspilt. Da dä der Ball i d Hand gno het, het der Schitsrichter Dokter Markus Merk das als Rückpass gwärtet u e indiräckte Freistoss für e FC Bayern gä. Der Patrik Andersson het i der 94. Minute dä Freistoss verwandlet u zum 1:1-Ändstand usgliche. Dür dä Träffer isch d Meischterschaft a FC Bayern Münche gange u nid a FC Schalke 04, wo wäg em verspätete Apfiff u em ne Missverständnis der gwinn vo der Meischterschaft vor em Ändi vom Spil z Hamburg gfyret hei. Nach däm der Merk Abpfiffe het, isch der Oliver Kahn zu der Eggfahne gsecklet, het die us em Bode grisse u mit ere uf em Rügge gjubliet.[6]

Der Oliver Kahn bi sym Abschidsspil i der Münchner Allianz Arena (2008)

Am erschte Spiltag vo der Saison 2006/07 het der Oliver Kahn im Spil gäge Borussia Dortmund sys 500. Bundesligaspil u am 5. Dezämber 2006 im Spil gäge Inter Mailand sys 100. Champions-League-Spil absolviert. Am 2. Septämber 2007 het är i der Parti gäge de Hamburger SV der Eike Immel als Rekord-Goali mit syne 535. Bundesligaspil abglöst. I der Saison 2001/02 het är under de Goalis der Reckort für d Saison mit de meischte Bundesligaysätz ohni Gägeträffer (19 Spil) ufgstellt u dä isch ersch 13 Jahr später vom Manuel Neuer mit 20 Spil ohni Gägeträffer broche worde. Der Kahn isch ou dä Bundesligagoali mit de meischte Spilminute (49.302) u de meischte Spil ohni Gägegoal (204).

Sys letschte Pflichtspil het der Kahn am 17. Mai 2008, am letschte Spiltag vo der Bundesliga-Saison 2007/08 bestritte, woner im Heimspil gäge Hertha BSC i der 89. Minute der Platz het verlah u sy Nachfolger der Michael Rensing ihn ersetzt het. Bayern Münche het das Spil mit 4:1 gwunnen u het mit nur 21 Gägegoal e neue Bundesligarekord ufgstellt. Es isch em Oliver Kahn sys 557 Bundesligaspil gsi. Ds letschte Pflichtspilgoal wo der Kahn kassiert het, het der Waleri Domowitschijski gschosse. Der FC Bayern isch när no uf ere Asie-Reis gsi, wo der Oliver Kahn am 27. Mai 2008 z Kalkutta gäge indisch Club Mohun Bagan AC vor rund 120.000 im Goal gstanden isch. Das Spil hei d Bayern mit 3:0 gwunnen u der Kahn het vo de Gaschtgäber underanderem e Roller über cho.[7] Ds Abschidsspil für e Kahn het am 2. Septämber 2008 i der Allianz Arena stattgfunde u isch zwüsche dem FC Bayern u der Dütsche Nationalmannschaft ustreit worde. Vor däm Spil isch der Kahn zum Ehrespilfüehrer vom FC Bayern ernennt worde. I der 75. Minute isch er dür e Michael Rensing ersetzt worde u ds Spil churz underbroche worde damit sech der Kahn het chönne verabschide. D Fans sy wäret em Spil druuf higwise worde das sechs hie um ne Abschidsspil handlet u me doch uf ds Übleche uspfiffe vo einzelne Spiler söll verzichte. Ds Spil het mit 1:1 gändet.

Wächselgrücht[ändere | Quälltäxt bearbeite]

Manchester United het mehrmals under der Leitig vo der Trainerlegände Sir Alex Ferguson inträsse a mene Transfer gha. Am konkretischte sy d Wächselambitionen im Summer 2003 gsi. ManU het denn nach ere bessere Alternative zum Fabian Barthez gsuecht. Ou bim FC Arsenal het der Arsène Wenger nach em ne Nachfolger für e 40-jährig David Seaman gsuecht.[8] Der Kahn het atütet, das ihn e Wächsel i z Usland würd reize. Nach em Ändi vo syre Karriere het är gseit, dass är’s bereut het, di reizvolli Useforderig nid agno z ha. Denn sys ihm aber wichtig gsi, z Münche e Ära z präge.[9]

I der Nationalmannschaft[ändere | Quälltäxt bearbeite]

Der Oliver Kahn bim Konfödereischens-Pokal 2005

Ds Erschtemal wo der Kahn i d Nationalelf beruefe worden isch, isch im Herbscht 1993 gsi, är isch aber nid zum Ysatz cho. A der Wältmeischterschaft 1994 i der USA het är als dritte Goali teil gno.

Sys Debü im DFB-Team het der Kahn am 23. Juni 1995 bim 2:1-Sig z Bärn gäge d Schwyz gä.[10] 1996 isch är als Resärvegoali hinder em Andreas Köpke bi der Europameischterschaft z Ängland derby gsi. Als zwöite Goali het är du a der Wältmeischterschaft 1998 z Frankrych teil gno. Wo der Köpke nach em Turnier us der Nationalmannschaft zrüggträtten isch, isch der Kahn als Stammgoali ufgrückt. Am 26. Jänner 2002 het är zudäm d Funktion als Kapitän vo der dütsche Nationalmannschaft übercho. Vorhär het der Oliver Bierhoff die Funktion gha.

Ou mit der Nationalmannschaft het der Kahn einigi Erfolge z verbueche. So zum bischpil bi der Wältmeischterschaft 2002 z Japan u z Südkorea, woner mit syre Leischtig massgäblech derzue bytreit het, das die dütschi Nationalmannschaft ds Finale erreicht het. Är isch denn mit em Guldige Ball als beschte Spiler vo der WM uszeichnet worde. Im Ändspil gäge Brasilien isch är e Schuss vom Rivaldo unglücklech vor d Füess vom Ronalsinio abgwerd u dä het so ds 1:0 erziehlt. Im Ouguscht 2004, nach em unglückleche verlouf vo der Europameischterschaft z Portugal, isch der Mannschaftskolleg vom FC Bayern Münche, der Michael Ballack der neui Kapitän vo der Nationalmannschat worde.

D Goalhändsche vom Kahn.

Im Vorfäld vo der Wältmeischterschaft 2006 im eigete Land het der Oliver Kahn mit em Jens Lehme ume Poste im Goal konkuriert. Der Bundestrainer Jürgen Klinsmann het im Ouguscht 2004 ganz bewusst druuf verzichtet, d Nummer 1 im Goal so früech bekannt z gä. D Folg dervo isch du gsi, dass die beide Goalis über einehalb Jahr es Fernduell um e Stammplatz im dütsche Goal gliferet hei. Das isch vo mene grosse Medieecho begleitet worde.

Am 7. April 2006 isch der Konkuränzkampf zugunschte vom Jens Lehme entschide worde. Am 10. April 2006 het der Kahn uf ere Pressekonferänz bekannt gä, das är bi der Wältmeischterschaft 2006 als zwöite Goali wird zur verfüegig stah. Bim Spil um e Platz drü, gäge Portugal, isch der Kahn zum letschtemal für d Nationalmannschaft uf em Platz gstande. Das Spiel het die Dütschi Mannschaft mit 3:1 gwunne. Nach däm Spiel het är sy Rücktritt us der Nationalelf bekannt gä. Är het 86 Länderspil gmacht.[11]

Der Kahn isch dä Goali gsi, wo am hüüfigschte, nämlech 47-mal, d Mannschaft als Spilfüehrer uf ds Fäld gfüehrt het.

Karriere als Funktionär[ändere | Quälltäxt bearbeite]

Im Jänner 2020 isch der Kahn Vorstandsmitglid vo der FC Bayern München AG worde. D FC Bayern München AG betrybt d Lizänzspilerabteilig vom FC Bayern Münche. Är het e Füfjahresvertrag underschribe u söll ab em Jänner 2022 der Karl-Heinz Rummenigge als Vorstandsvorsitzenden ersetze.[12]

Sünschtigi Aktivitäte[ändere | Quälltäxt bearbeite]

Im Mai 2004 het der Oliver Kahn syni Outobiografie mit em Titel Nummer eins veröffendlecht. Vier Jahr später isch sys zwöite Buech, Ich. Erfolg kommt von innen use cho. Syt em Septämber 2010 isch sys Jugedbuch Du packst es! Wie du schaffst, was du willst uf e Markt cho.

Nach der Europameischterschaft 2008 z Öschtrrych u i der Schwyz, het der Kahn d Experteposition bi de Fuessballübertragige bim ZDF a der Syte vom Johannes B. Kerner überno. Der Kerner isch später vo der Katrin Müller-Hohenstei abglösst worde.[13] Wäret der Fuessball-Europameischterschaft 2012 isch der Kahn zäme mit der Katrin Müller-Hohenstei uf em Oschtseestrand z Usedom als Experte ufträtte. Die Art Vo Brichterstattig isch vo einige Medie kritisiert worde: Es isch underanderem bemängelt worde das der Kahn “kes Analyse-Füür azünd het”, wi das em ARD-Experte Mehmet Scholl zuegstande worden isch.[14][15] Zur Wältmeischterschaft 2014 isch der Oliver Kahn als Experte a der Syte vom Oliver Welke z gseh gsi.[16]

Im Früelig 2009 het der Kahn es Agebot vom FC Schalke 04 abglehnt, dert hätti är sölle Manager wärde.

Z Asie gilt der Kahn vor allem syt der Wältmeischterschaft 2002 z Japan u z Südkorea als eine vo der beliebtischte Stars vom dütsche Fuessball. Dert isch är under anderem ou mal i nere Wärbig vo der Shinki-Bank z gseh isch gsi.[17][18] Ab em April 2009 het der Kahn als Jurymitglid i der Unterhaltigsschou China suecht der Super-Goeli Golis im chinesische Staatsfernseh (CCTV) bewärtet, das Format isch letschtäntlech du doch nid usgstrahlt worde.[19]

Syt Ändi 2012 isch der Oliver Kahn Marketigbotschafter vom Wettabierte Tipico. Wo Tipico Partner vo der Dütsche Fuessballliga worden isch, isch d Rolle vom Oliver Kahn vo der Transparency Inernational Dütschland als problematisch agluegt worde.[20] Syni Tätigkeit für Tipico widersprächi de Richtlinie vom ZDF. Nach däre sygi Wärbig dür Sportler u Funktionäre wäge ihrer Vorbildfunktion müssi underblybe. D Transparency International het der ZDF-Fernsehrat ufgforderet, die “Kommentatore-Lücke” i de eigete Richtlinie z besitige.[21]

Im Jahr 2016 het är ds Undernähme Goalplay gründet. Das Undernäme het zum Zil Golis online z schuele.[22]

Syt em Herbscht 2017 ungerstützt der Kahn der saudi-arabischi Fuessballverband bi der Usbildig vo Golis. Är söll ne langfrischtig d Methode vom moderne Golispil lehre. Für das isch e Akademi namens “Oliver Kahn International Academy” gründet worde. Das Ongaschmo isch bis nach der Wäldmeischterschaft 2018 z Russland planet gsi.[23]

Erfolge, Titel u Uszeichnige[ändere | Quälltäxt bearbeite]

Nationalmannschaft[ändere | Quälltäxt bearbeite]

Verein[ändere | Quälltäxt bearbeite]

Uszeichnige[ändere | Quälltäxt bearbeite]

International[ändere | Quälltäxt bearbeite]

National

Persönlechkeit u Würkig i der Öffentlechkeit[ändere | Quälltäxt bearbeite]

I synere über 20-jährige Karriere entwicklet sech der Kahn zu nere Kultfigur vom dütsche Fuessball. Berüehmt isch är für sy usgeprägti Ehrgyz, sy Perfektionismus, syni Ussetzer, syni Attackene uf gägnerischi Spiler u syner Zitat worde. Nachfolgend es paar Byspil:

  • Am 3. April 1999 im Spil Borussia Dortmund gäge FC Bayern Münche nöcheret sech der Kahn em Heiko Herrlech derart a, das es us gseht als well är im Herrlech i Hals bysse. Im glyche Spil springt der Oliver Kahn mit gstrecktem Bei uf e Stéphane Chapuisat zue um der Ball no z verwütsche. Die Aktion geit als Kong fu tritt i d Gschicht y.[27]
  • Am 18. Septämber 1999 im Spil Eintracht Frankfurt gäge der FC Bayern Münche isch der Kahn bim Stand von 1:0 für Eintracht so unglücklech mit sym Mitspiler Samuel Kuffour zäme gstosse, dass der Kahn ohnmächtig worden isch. Är isch minutelang behandlet u schliesslech i der 55. Minute usgwächslet worde. Später het me e schwäri Ghirnerschütterig diagnoschtiziert. Für e Oliver Kahn isch der Ersatzgoali Bernd Dreher ygwächslet worde. Dä het sech aber bereits wenigi Minute später e Chrüzbandriss zuzoge. Für ihn isch der Fäldspiler Michael Tarnat ygwächslet worde, wo für e Räscht vo der Parti d Rolle vom Goali het über no. Der FC Bayern het no zwöi Goal gschosse u so het der Äntstand 2:1 für Bayern glutet.[28]
  • Am 12. April 2000 im Spil SC Fryburg gäge de FC Bayern Münche schmeisst e Zueschouer e Golfball uf e Kahn, dä Golfball breicht ne a der Schläfe.[29] D Wunde blüetet starch. Nach ere churze Beguetachtig vo der Wunde geit der Kahn i ds Goal zrügg. Der SC Fryburg het für dä Zwüschefall 15.000 DM Straf müesse zale.
  • Am 3. März 2001 im Spil Hansa Roschtock gäge de FC Bayern Münche het der Oliver Kahn bim Stand vo 3:2 für d Roschtocker i der Schlussminute im gägnerische Strafruum, der Ball nach ere Egge i ds Goal gfuschtet u het dadrufabe wäg der Regelwidrigkeit vom Schidsrichter Markus Merk di Gälb-Roti Charte übercho.[30][31] Später het är im scherz gseit: “I ha dänkt, der Goali darf im Strafruum der Ball mit der Hand spile.”
  • Am 28. Septämber 2002 im Spil Bayer 04 Leverkuse gege de FC Bayern Münche het der Kahn sy Gägespiler Thomas Brdarić im Äcke packt. Der Kahn u der Brdarić sy vom Schidsrichter Hellmuet Chrueg mit der Gälbe Charte verwarnt. Was i der Öffentlechkeit für grossi Kritik gstossen isch, wil e ähnlechi Situation einigi Spiltäg vorhär mit em ne Platzverwis isch gandet worde.[32]
  • Nach ere 0:2-Niderlag uf Schalke am 1. Novämber 2003 het der Oliver Kahn uf d Frag vom Premiere-Reporter Tom Bartels, was de Bayern gfählt heigi gseit: “Eier!”[33][34] Der Bartels het sech du vergwüsseret: “D Mannschaft het sech nid gwehrt. D Mannschaft het nid das zeigt, was Dir scho syt Wuche ygforderet heit, han i nech da richtig verstande?” Der Kahn het du mit sym Legendäre Satz, womit är bis hüt i verbindig bracht wird gantwortet: “I säges ja: Eier, mir bruuche Eier!”[34] Im Jahr 2013 het d Fast Food-Chötti McDonald’s in Ahlenig a Satz vom Kahn e Wärbekampanie mit em Titel “Dütschland bruucht Eier”, für d Wärbig füre McMuffin Bacon & Egg-Burger, wo’s Eier drinn het, gmacht.[35][36][37] Im Novämber 2018 het der Joshua Kimmich e Spiler vom FC Bayern Münche äbefalls “Eier” vo syre Mannschaft ygforderet.[38]
  • Am 16. April 2005 (29. Spiltag) het sech der Oliver Kahn nach em ne knappe 1:0-Sig vo der Bayern gäge Hannover 96, wo für d Vorentscheidig im Titelkampf 2004/05 gsorgt u dür eis Goal i der letschte Spilminute z stand cho isch, über e sogenannt Bayern-Bonus gseit: “Us der Tradition vom FC Bayern use hei mir gueti Närve. Es git kei Glück. Me muess es erzwinge.[39]
  • Nach em Achtelfinal-Rückspil vo der Champions League am 7. März 2007 gäge Real Madrid isch der Kahn nach ere erschte, unbeobachtete Dopingprob vom UEFA-Dokter Franz Krösslhueber ufgforderet, e neui Prob ab z gä u das Mal under Ufsicht. Der Kahn het dadruufabe sy gfüllt Urinbächer i nes WC gschosse. Usserdäm söll der Kahn d Kontrollstation nid unmittelbar nach em Spiländi ufgsuecht ha, sondern syg zersch emal under d Duschi gange.[40] Wäge der nid korräkt abgäne Dopingprob u em aschliessende Wuetafall het der Kahn e Sperri vo eim Spil i der Champions League u e Gäldstraf i nere Höchi vo 20.000 Franke (ca. 12.000 Euro, entsprächend em damalige Umrächnigskurs) kassiert.[41]

Der Kahn isch ou under em Spitzname “Der Titan” bekannt gsi. Dä Spitzname het är wäret der Fuessballwältmeischterschaft 2002 über cho.

Im Jahr 2002 het d Leipziger Popgruppe Die Prinzen der Song “Olli Kahn” gwittmet. 2004 het d Band Dominoe ds Lied “Der Titan” veröffentlecht. 2006 isch das Stück du uf der CD Stadion Hits 2006 under em Title Der Titan (King Kahn Edit) erschine.

Soziales Angaschmo[ändere | Quälltäxt bearbeite]

Der Oliver Kahn understützt mit der Münchner Strassefuessball-Liga buntkicktguet, d Justin-Rockola-Soforthilf u der Sepp-Herberger-Stiftig drü soziali Projekt. Usserdäm het är d Oliver Kahn Stiftig i ds Läbe grüeft, wo syt em Herbscht 2011 mit der Roland Bärger Stiftig a Schuele i nüün Bundesländer zämeschaffet. D Stiftig schaffet mit em sälber etwicklete Programm “Du packsch es!”, wo d Motivation vo de Schüeler söll sterche. D Stiftig treit derzue bi, us em Oliver Kahn, em Sportheld, d Oliver Kahn, Sportmarke z gstalte.[42]

Publikatione[ändere | Quälltäxt bearbeite]

Lueg ou[ändere | Quälltäxt bearbeite]

Weblink[ändere | Quälltäxt bearbeite]

 Commons: Oliver Kahn – Sammlig vo Multimediadateie

Quelle[ändere | Quälltäxt bearbeite]

  1. Dr. Kahn? Ex-Torhüter will vielleicht promovieren In: Hamburger Abendblatt online vom 24. Jänner 2012.
  2. Kahn, Oliver, 1969-: Nummer eins Droemer, Münche 2004, ISBN 3-426-27346-2.
  3. Matthias Arnhold: Oliver Rolf Kahn - Matches and Goals in Bundesliga. RSSSF. 16. Juni 2016. Abgrüeft am 8. Juni 2020.
  4. Marcel Haisma: Oliver Kahn - Matches in Europan Cups. RSSSF. 16. Juni 2016. Abgrüeft am 8. Juni 2020.
  5. R. Dankert: Einer wie keiner. Kahns Aufstieg zum Weltstar begann im Wildpark. In: BNN, 25. Jänner 2014, S. 20.
  6. Kahns „Meisterkrimi“
  7. FCB siegt bei Kahn und Hitzfelds Abschied, fcbayern.com, 27. Mai 2008, abgrüeft am 15. Juni 2020
  8. DER SPIEGEL: Lockruf aus England: Kahn liebäugelt mit Wechsel zu ManU - DER SPIEGEL - Sport. Abgrüeft am 15. Juni 2020.
  9. FC Bayern: Oliver Kahn bereut Absage an Manchester United | Goal.com. Abgrüeft am 15. Juni 2020.
  10. Matthias Arnhold: Oliver Kahn - International Appearances. RSSSF. 16. Juni 2016. Abgrüeft am 16. Juni 2020.
  11. Kahn erklärt Nationalmannschafts-Rücktritt, dfb.de, abgrüeft am 20. Novämber 2020
  12. Oliver Kahn in den Vorstand der FC Bayern München AG berufen, fcbayern.com, 30. Ouguscht 2019, abgrüeft am 20. Novämber 2020.
  13. Oliver Kahn wird der neue Klopp beim ZDF WELT-online
  14. "Über Gebühr – ZDF klotzt auf leerer Insel Usedom.“ WELT-online
  15. „Kahn und ‚KMH‘ – das ZDF-Debakel auf Usedom.“ WELT-online
  16. „WM 2014 im Fernsehen: Oliver Kahn und Oliver Welke könnten auch an der Ostsee stehen.“, Tagesspiegel, 14. Juni 2014.
  17. „Kahn wirbt für dubiose japanische Kreditgesellschaft.“ Spiegel.de.
  18. Fußball: Die Asiawochen Zeit.de.
  19. Der bewegte Mann Spiegel Online, vom 7. Januar 2020.
  20. Tipico wird offizieller Partner der Bundesliga OnlineCasinosDeutschland.com vom 16. Januar 2018, abgrüeft am 20. Novämber 2020
  21. Transparency Deutschland fordert von der DFL gesellschaftliche Verantwortung beim Thema Sportwetten Transparency.de vom 10. Januar 2018, abgrüeft am 20. Novämer 2020
  22. Oliver Kahn geht unter die Gründer – und seine Fans flippen aus. 11. Oktober 2016, abgrüeft am 20. Novämber 2020
  23. Kahn soll Saudische Torhüter WM-fit machen. In: weltfussball.de 7. Juni 2018 abgrüeft am 20. Novämber 2020.
  24. www.iffhs.de IFFHS Website
  25. Website Oliver Kahns (Memento vom 29. Juni 2007 im Internet Archive)
  26. kicker, Nürnberg, Germany: Erweiterte Vidal das ohnehin volle FCB-Lazarett? In: kicker. (kicker.de [abgrüeft am 20. Novämber 2020]).
  27. „Vampir“ Kahn
  28. Kahns „Ohnmacht“
  29. Kahns „Platzwunde“
  30. Kahns „Faustball“
  31. Oliver Kahn: Erstes Tor im letzten Spiel? In: bild.de (bild.de [abgrüeft am 20. Novämber 2020]).
  32. Kahns „Nackengriff“
  33. Fabian Langkamp: „Eier, wir brauchen Eier“: Warum heute alle an Oliver Kahn denken! 2glory.de, 14. Oktober 2016, abgrüeft am 20. Novämber 2020.
  34. 34,0 34,1 Das legendäre Interview auf YouTube
  35. Frauke Schrobelt: Spotpremiere: „Deutschland braucht Eier“: Die neue Kampagne von McDonald’s. wuv.de, 11. März 2013, abgrüeft am 20. Novämber 2020.
  36. Beispielspot 1 auf YouTube
  37. Beispielspot 2 auf YouTube
  38. FC Bayern gegen AEK Athen – Joshua Kimmich motiviert wie einst Oliver Kahn: „Mit Eiern!“ Abendzeitung München, 7. Novämber 2018, abgrüeft am 20. Novämber 2020.
  39. Marcus Bark: Der FC Dusel. In: Berliner Zeitung. 18. April 2005, abgrüeft am 22. Novämber 2020.
  40. Pinkel-Affäre: Bayern legt Berufung gegen Kahn-Sperre ein. Spiegel Online, 26. März 2007.
  41. Kahn-Sperre bleibt. Kicker online, 29. März 2007.
  42. Julia Kramer: „Metamorphosen im Sport. Die Wandlung des Spitzensportlers vom Helden zur Marke.“ In: Arnd Krüger, Swantje Scharenberg (Hrsg.): Zeiten für Helden – Zeiten für Berühmtheiten im Sport. LIT Verlag, Münster 2014, ISBN 978-3-643-12498-2, S. 195–212.
Dä Artikel basiert uff ere fräie Übersetzig vu dere Version vum Artikel „Oliver_Kahn“ vu de dütsche Wikipedia. E Liste vu de Autore un Versione isch do z finde.