John B. Long
| Dialäkt: Mìlhüüserdiitsch |
Dr John Benjamin Long (* 8. Septamber 1843 z' Douglass, Texas; † 27. Àwril 1924 z' Rusk, Texas) ìsch a àmerikànischer Pflànzer, Politiker un Zittungsverlager gsìì. Ar hàt vu 1891 bis 1893 dr Bundesstààt Texas ìm US-Repräsantàntahüs vertratta, un schpeeter vu 1913 bis 1914 s’ Cherokee County ìm Repräsantàntahüs vu Texas.
si Lawa un sina Kàrriar
[ändere | Quälltäxt bearbeite]Dr John Benjamin Long ìsch àm 8. Septamber 1843 z' Douglass, ìm texanischa Nacogdoches County, uf d' Walt kumma. Ar ìsch dr Suhn gsìì vum William T. un vu dr Elizabeth Long geborena Payne. Ànna 1846 hàt’r mìt sina Ältra uf Rusk ìm Cherokee County gwàndelt. Sìe sìn aina vu da dräi ärschta Fàmìlia gsìì, wo z' Rusk iwàndelt han. Doo ìsch dr John Long ìn d' Priwàtschüala gànga. Wahrem Sezessionskriag hàt’r ìm 3rd Texas Cavalry Regiment vum Heer vu da Konfederiarta Schtààta bdiant un ìsch zwaimol schwar verlätzt worra. Noh-n-em Kriag hàt’r Racht gschtudiart un ìsch àls Rachtsànwàlt züagloo worra, àwer ar hàt nia àls Jurischt gschàfft. Schtàttdässa ìsch’r Pflànzer worra. Dr’züa ìsch’r Mìtglìed worra vu dr Demokràtischa Pàrtäi.
Àn da Kongresswàhla vu 1890 ìsch dr John Long ìm 2. Wàhlbezirk vum Texas àls Mìtglìed vum àmerikànischa Represantàntahüss gwählt worra. Ìm Represantàntahüss ìsch’r àb em 4. März 1891 ìm William Harrison Martin si Nohfolger gsìì. Ànna 1892 ìsch’r àwer fìr d' Kongresswàhl nìtt nominiart worra; ar hàt àlso noh sinera ainziga Àmtszitt dr Kongress àm 3. März 1893 müassa fàraloh.
Ànna 1874 ìsch dr Long Mìtglìed worra vu da Patrons of Husbandry (d' „Grange“), un ìsch ànna 1891 àls Laiter vum Grange vu Texas gwählt worra. Üsserdam ìsch’r ànna 1883 Biigordneter gsìì bim dr National Cotton Planters Association z' Vicksburg ìm Mississippi. Vu 1886 bis 1905 ìsch’r Verlager gsìì vu dr Zittung Standard Herald z' Rusk. Ànna 1895 ìsch’r Laiter gsìì vum „Agricultural and Mechanical College of Texas“ (hitt d’ Texas A&M University). Vu 1913 bis 1914 hàt ar s' Cherokee County vertratta ìm Represantàntahüss vu Texas. Ar hàt d' Prohibition befìrwortet.
Dr Long ìsch àui a Fräimürer gsìì, so wia a Mìtglìed vum Independant Order of Fellows, un àui àb 1867 a Älscht vu dr Cumberland Presbyterian Church. Mìt sinera Fràui Emma Wiggins hàt ar sewana Kìnder ghàà.
Dr John Long ìsch àm 27. Àwril 1924 z' Rusk gschtorwa un ìsch àui doo beardigt worra.
Literàtür
[ändere | Quälltäxt bearbeite]- Bill Tichnell: Long, John Benjamin (1843–1924). In: Handbook of Texas Online. Texas State Historical Association (englisch, tshaonline.org [abgerufen am 13. Januar 2021]).
- Long, John Benjamin, (1843-1924). In: Jan Onofrio (Hrsg.): Texas Biographical Dictionary (= United States Biographical Dictionary. Band 32). Somerset Publishers, Inc., 2001, ISBN 0-403-09992-7, S. 360/361 (englisch, google.fr [abgerufen am 13. Januar 2021]).
- John Benjamin Long. In: Ben R. Guttery (Hrsg.): Representing Texas. Ben Guttery, 2007, ISBN 1-4196-7884-1, S. 103 (englisch, google.fr [abgerufen am 13. Januar 2021]).
- John B. Long. In: Lewis E. Daniell (Hrsg.): Personnel of the Texas State Government: With Sketches of Representative Men of Texas. Maverick Print. House, 1892, S. 164/5 (englisch, google.fr [abgerufen am 13. Januar 2021]).
Externa Links
[ändere | Quälltäxt bearbeite]- John B. Long im Biographical Directory of the United States Congress
- John B. Long in dr Datebank vu Find a Grave
- Dr John Benjamin Long ìn dr Legislative Reference Library (änglisch)
