Gipiger Grien

Us der alemannische Wikipedia, der freie Dialäkt-Enzyklopedy
s Naturschutzpiet Gipiger Grien isch i der undere Helfti vom Luftfoti

S Gipiger Grien isch es Naturschutzpiet im Kanton Aargau.

Es isch es letschts Stuck vom alten Auewald ganz zunderscht a dr Aare. D Naturflechi mit öpe vierzg Hektare lyt bim Doorff Gipige i dr Gmeind Lüggere, uf dr lingge Syte vom Fluss.

Bi Gipige und Chlingnau het sech d Aare früener uf em wyte Land usbreitet und es het grossi Chiisinsle zwüsche de Wasserlöif und im Schacheland gha; dene Flechine seit men i dr Mundart «Grien». Bi Chlingnau hän die sogar eigeti Näämen übercho: s Fischergrien, s Schteigrien, s Martisbuuregrien, s Schiffmüligrien und s Girizgrien, und uf der änere Syte isch ebe s Gipiger Grien.

Wo men i de 1930er Joore s Chraftwärch Chlingnau ufgstellt und für das dr Stausee vo Chlingnau gmacht het, het sich d Landschaft ganz veränderet. Der Fluss isch jetz zwüsche de Sytedämm, und der See isch e schööne und als Biotoop wärtvollen Ort, vo der alte wilde Flussebeni git’s nume no d Flechi im Gipiger Grien und die vom Fischergrien-Werd, wo hüt au es Naturschutzpiet isch. 1994 het me s Gipiger Grien under Schutz gstellt, und der eint Teil vonnem isch sid 2006 derzue ane au no als Naturwaldreservat gschützt.

S Gipiger Grien het im südliche Teil vil Wald und gäge Norde eender offnigs Gländ mit Wasserflechine, wo vo alte, teils verlandete Flusslöif vo dr Aare chöme; der Egge im Nordweschte isch di Chrumbi Woog, also es alts Gägewasser vo dr Aare; ganz z underscht, grad oben a dr Ysebahnbrugg bi Gischbärg, sind d Weiher mit em Underwasser vo dr Aare under em Chraftwärch verbunde, und es het dört au no grossi Riet. Bi der ARA, wo näbem Wuor vom Chraftwäärch isch, laufft dr Lüggerebach in en Wasserflechi vom Gipiger Grien, oben a Gipige chunt der lingg Binnekanal näbem Sytedamm in Lüggerebach.

I der verschidenartige Naturlandschaft isch non e rychi Vilfalt vo Läbewääse umme. Es het Wasservögel, Amfibie, Fisch, Insekte, und dr Biber isch wider doo. Bi de Pflanze säge d Botaniker, d Sumpfwasserfädere Hottonia palustris chöm i dr Schwiiz nume no a däm Platz bi Gipigen a dr Aare vor (em Mühlberg un em Wieland isch si änds 19. Joorhundert im Aargau au no im Girix bi Choblänz und vo de Aareschache bi Aarau und Rohr bekant gsi).[1]

S Gipiger Grien isch e Landschaft vom Aueschutzpark Aargau und es stoot uf dr Schwiizer Lischte vo de Auegebiet mit nazionaler Bedütig.[2]

Weblink[ändere | Quälltäxt bearbeite]

Fuessnoote[ändere | Quälltäxt bearbeite]

  1. Fritz Mühlberg: Die Standorte und Trivialnamen der Gefässpflanzen des Aargau’s. Verlag Sauerländer, Aarau 1880. Nr. 322, S. 135.
  2. Verordnung über den Schutz der Auengebiete von nationaler Bedeutung (Memento vom 26. Februar 2020 im Internet Archive) uf admin.ch vom 28. Oktober 1992 (Stand am 1. November 2017)

Koordinate: 47° 35′ 44,9″ N, 8° 13′ 1,9″ O; CH1903: 658557 / 271970