Viola Amherd

d Viola Amherd (2024)

D Viola Patricia Amherd (* 7. Juni 1962 z Brig im Kanton Wallis) isch e Schwiizer Politikeri (CVP). Vo 2000 bis 2012 isch si Stadtpräsidenti vo Brig-Glis gsi und sit em 2005 isch si Mitglid vom Nationalrot. Bi de Bundesratswahl am 5. Dezember 2018 isch si im erschte Wahlgang zur Nochfolgerin vo de Doris Leuthard gwählt worde.

Läbe

D Viola Amherd isch vo 1969 bis 1978 a d Primar- und d Sekundarschuele z Brig-Glis gange vom 1978 bis 1982 am Latingymnasium z Brig gsi, wo si im 1982 mit de Maturität Typ B abgschlosse het. Vo 1982 bis 1987 het si a de Universität Fryburg Jus gstudiird und s Studium mit em Lizentiat abgschlosse. Im 1990 het si s Notardiplom vom Kanton Wallis übercho und im 1991 s Aawaltsdiplom und s Aawaltspatänt. Sit em 1991 isch si Advokatin und Notarin mit emene eigete Büro z Brig-Glis gsi.

Politik

Vo 1992 bis 2012 isch d Amherd Mitglid vom Brig-Gliser Stadtrot gsi, daderbi sit em 1996 als Vizepresidänti und ab em 2000 als Presidänti. Im 2005 isch si in Nationalrot nachegrütscht, wo de Jean-Michel Cina vo dete in d Walliser Kantonsregiirig gwechsled het. Si isch Mitglid i de Kommission für Vercheer- und Färnmeldewese, Mitglied vo de Kommission für Rechtsfroge, Mitglid vom Büro vom Nationalrot und sit em 2011 Vizepräsidenti vo de CVP-Bundeshusfraktion gsi. Zudem isch si im Präsidium vo de CVP Oberwallis.

Bi de Bundesrotswahle am 5. Dezämber 2018 isch d Amherd zur Nachfolgeri vo de Doris Leuthard gwählt worde, und si isch dadermit di acht Frau überhaupt, wo i de Bundesrot gwählt worde isch.

Bi de Wahle vom Bundesroot am 11. Dezämber 2019 het die Vereinigti Bundesversamlig d Viola Amherd mit 218 Stimme (vo 243) wider is Amt gwählt. Das isch schynts s zwöitbeschten Ergäbnis vo allne bishärige Bundesrootswahle.

Weblink

 Commons: Viola Amherd – Sammlig vo Multimediadateie

• Viola Amherd uf dr Websyte vo dr Bundesversammlig
• d Websyte vo de Viola Amherd bim VBS

Fuessnoote

Vorgänger Doris Leuthard

Mitgliid im Schwizer Bundesrot sit 2019

Nochfolger —