Doris Leuthard

Dialäkt: Züridütsch (See)

Doris Leuthard (2012)

D Doris Leuthard (* 10. April 1963 z Merischwann) isch e Schwiizerer Politikerin (CVP). Sie hät de Kanton Aargau im Nationalrat vertrete und isch Parteipräsidentin vo dr CVP gsii. Am 14. Juni 2006 isch si vo dr Vereinigte Bundesversammlig mit 133 Schtimme zur Bundesrätin gwählt worde. Im 2010 isch si Bundespräsidentin gsi.

Werdegang

D Doris Leuthard isch als ältischts vo vier Gschwüschterte uufgwachse. Ihre Vater isch viili Jahr Gmeindsschriiber von Merischwann gsii und isch im Grosse Rat (Parlament) vom Kanton Aargau gsesse. Nach Abschluss vo dr obligatorische Schuelziit in Merischwann und Muri hät si d Kantonsschuel in Wole bsuecht. Si hät Rechtswüsseschaft a dr Universität Züri gschtudiert und hät Schtudieuufenthalt in Paris und Calgary gmacht. 1991 hät si s Rechtsanwaltspatent überchoo.

Politik

Ihri politischi Karriere hät 1993 aagfange, wo si zur Schuelrätin vom Bezirk Muri gwählt worde isch. 1997 isch d Wahl in Grosse Rat vom Kanton Aargau gfolgt. Dur die Tätigkeite isch si rasch bekannt worde. 1999 hät sie sowohl für de Nationalrat als au für de Schtänderat kandidiert. Ihre Wahlkampf hät für Uufsehe gsorgt, wil de Parteisekretär vo dr (CVP) Aargau Tuusigi vo Duschmittel-Beutel mit ihrem Porträt bedrucke und verteile laa hät. D Aargauer Ziitig hät d Schlagziile „Duschen mit Doris“, kreiert wo zum inoffizielle Wahlkampfslogan worde isch. Zwar häts nöd ganz für d Wahl zur Schtänderätin glanget, doch d Leuthard hät bi dr Wahl in Nationalrat eis vo de beschte Ergebnis vom gsamte Kanton erreicht.

Im Jahr 2000 hät sie ihri Mandat als Schuel- und Grossrätin uufgeeh und isch Vizepräsidentin sowohl vo dr Kantonalpartei als au vo dr CVP Schwiiz worde. Im Nationalrat ghört si dr Kommission für Wirtschaft und Abgaabe aa. Nach em Rücktritt vom Parteipräsident Philipp Stähelin hät d Doris Leuthard d Partei interimistisch während einige Monate gleitet. Am 18. September 2004 isch si schliesslich zur Parteipräsidentin vo dr CVP gwählt worde.

Am 14. Juni 2006 isch d Doris Leuthard inere Einzelkandidatur mit 133 (von 234 gültige) Schtimme als Nachfolgerin vom Joseph Deiss in Bundesrat gwählt worde. Im Johr 2010 isch si s erschti Mol Bundespräsidentin gsi. Uf de 1. November 2010 het sie vom Eidgenössische Volkswirtschaftsdepartement (EVD) ins Eidgenössisch Departement für Umwelt, Verchehr, Energie und Kommunikation (UVEK) gwächslet.

Weblink

 Allmänd (Commons): Doris Leuthard – Sammlig vo witere Multimediadateie

• Website vo dr Doris Leuthard
• Doris Leuthard uf dr Websyte vo dr Bundesversammlig
• Artikel Leuthard, Doris im Historische Lexikon vo dr Schwiiz

Vorgänger Joseph Deiss

Mitgliid im Schwiizer Bundesrot 2006–...

Nochfolger —

Dä Artikel basiert uff ere fräie Übbersetzig vum Artikel „Doris_Leuthard“ vu de dütsche Wikipedia. E Liste vu de Autore un Versione isch do z finde.