Bürgermeister

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dialäkt: Züritüütsch

En Bürgermeischter isch s'Oberhaupt vonere Stadt oder Gmeind. Er wird je nach Land diräkt vo de Bürger oder vom Stadt-/Gmeindrat gwählt.

I vilne Regione und Gmeinde isch in früherer Zyt für d'Funktion vom Bürgermeischter der Begriff Schultes, oder Schultheiss verwendet worde. In menke Gegende vum Alemannische sait mer zum Burgemeischter au Vogt.

Under anderem händ d'Städt in frühere Jahrhunderte zytgliich mehreri Bürgermeischter gha, wobii sie denn ein Sprecher als wortfüehrende Bürgermeischter bestimmt händ. Als Bürgermeischter, wo viilfach au grad s'Richteramt bechleidet händ, sind jahrhundertelang uusschliesslich Volljurischte gewählt worde.

Gedenktafle för de Johan Rudolf Wettstei, Basler Bürgermeister vo 1645 bis 1666

Schwiiz[ändere | Quälltäxt bearbeite]

I der Schwiiz gits die Bezeichnig Bürgermeischter eso nümme. Bis zur Helvetische Revolution isch s in e baar Zunftstädt wie Basel, Züri, Sanggalle, Schaffuuse, Stei am Rhii und Chur dr höchst Poste gsi, währed anderi Stedt wie Bärn, Burgdorf, Friburg oder Luzern dr Titel Schultheiss bevorzugt hai. Under dr Helvetische Verfassig isch s Amt vom Bürgermeister ufghobe und 1803 mit dr Mediation vilerorts wider iigfüehrt worde. Vo dr Middi vom 19. Jahrhundert aa isch dr Titel ändgültig verschwunde. Hützutag isch die analogi Bezeichnig je nach Ort Stadtpräsident, Stadtammä, Ammä, Gmeindammä oder Gmeindspräsidänt. I nöd dütsche Spoochregione au Syndic, Maire oder Sindaco.

Düütschland[ändere | Quälltäxt bearbeite]

I de meischte grössere, vor allem i chreisfreye Städt gits in Düütschland en Oberbürgermeischter oder e Oberbürgermeischterin und eine oder mehreri Biig'ordneti, wo dänn au emal d'Amtsbezeichnig Bürgermeischter träged.

Öfters isch "Der Bürgermeischter" au d'Bezeichnig für d'Bhörde (Gemeindsverwaltig), wo am Bürgermeischter understaaht.

Öschterriich[ändere | Quälltäxt bearbeite]

Der Bürgermeischter wird je nach Bundesland gröschteteils diräkt gwählt, i einige Bundesländer (Niederösterreich, Steiermark und Wien) vo de Mitglieder vom Gmeindrat. In Wien wird der Bürgermeischter, wo zugliich au Landeshauptmann vom Bundeslandes Wien isch, nöd diräkt, sondern vom Gmeindrat (wo gliichzytig au Landtag isch) gwählt.

Wenn der Bürgermeischter nöd diräkt gwählt wird, dänn schtellt meischtens d'Mehrheitspartei (nöd verpflichtend) de Bürgermeischter. Das isch aber vo de jewiilige Mehrheitsverhältnis abhängig.

Der Bürgermeischter isch s'uusfüehrendi Organ vo de Gmeindratsbeschlüss. Usserdem füehrt er Bundes- und Landeswiisige uus. Die Gmeindsbedienschtete sind ihm underschtellt. Er vertritt e Gmeind au nach usse. In Bauaaglegeheite isch er die ersti Inschtanz. In Statutarstädt füehrt er ebeso d'Agende vom Bezirkshauptmaa uus.

I jedere Gmeind gits als Vertretig eine, zwei oder drüü Vizebürgermeischter, je nach Wahlergebnis und der Gmeindgrössi.

Weblingg[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Bürgermeister“ vu de dütsche Wikipedia.

E Liste vu de Autore un Versione isch do z finde.