Dr Baasler Salzdurm

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

47.5601697.587904Koordinate 47° 33′ 37″ N, 7° 35′ 16″ O; CH1903: 611235 / 267728

Usschnitt us dr Stadtaasicht vo Basel vom Matthäus Meriaa, 1642.[1] Dr Salzdurm isch grad an dr Schiffländi. In dr Stadtmuure het s dört zwäi Öffnige, äini für e Birsig, wo dört in Rhii fliesst, und die anderi as diräggte Zuegang zum Schiffländiblatz und zum Salzhuus.
Dialäkt: Baaseldütsch

Dr Salzdurm isch e Durm vo dr Stadtmuure vo Baasel gsi. Er isch am Rhii grad näbe dr Schiffländi gstande und isch 1829 abbroche worde.

Gschicht[ändere | Quälltäxt bearbeite]

Dr Salzdurm isch woorschinlig scho im 11. Joorhundert uf römische Fundamänt baut worde zur Verdäidigung vom middelalterlige Baasler Rhiihaafe, dr Schiffländi, am Blatz, wo dr Birsig in Rhii gmündet het. Er isch also elter as s Rhiidoor, wo erst entstande isch, wo mä 1225 d Rhiibrugg baut het.

Dr Naame het er vom Handel mit Salz bekhoo, wo in sinere Umgääbig driibe worde isch, zerst am Salzbärg und spööter im stedtische Salzhuus, wo grad näben em Durm baut worde isch. S Salz isch uf Schiff vom Niiderrhii und us Schwoobe brocht worde.

Vom Salzdurm us häi die bischöflige Ministeriale d Schiffländi könne überwache. Spööter isch au s Archiiv vom Root dört ufbewaart worde.

Dr Salzdurm het an Bedütig verloore, wo im Joor 1225 d Rhiibrugg baut worde isch und d Rhiifäärene nüme verkeert häi. Aber wo mä 1478 d Kapälle uf dr Brugg ufgstellt het, het au dr Salzdurm e nöije Spitzhelm bekhoo mit farbige und sogar vergoldete Ziegel. 1530 het er e verzinnte Knopf bekhoo, wo mä din Dokumänt ufbewaart het, wie mä s no bis ins 20. Joorhundert doo und dört gmacht het.

Wo d Dampfschifffaart uf em Rhii ufkhoo isch, het mä 1827 s Salzhuus zum ene groosse Laagerhuus usbaut und 1829 dr Salzdurm abbrotzt, so dass mä au in die Richdig s Laager het könne usbaue.

Kwelle[ändere | Quälltäxt bearbeite]

Weblingg[ändere | Quälltäxt bearbeite]

Fuessnoote[ändere | Quälltäxt bearbeite]

  1. Merian Basel 1642.jpg
    Uf dr Aasicht vom Meriaa vo 1642 gseet mä d Schiffländi und dr Salzdurm grad bi dr Rhiibrugg uf dr Groossbaasler Site.