S Chleibasler Obere Rhiidoor

Us der alemannische Wikipedia, der freie Dialäkt-Enzyklopedy
Uschnitt us dr Stadtaasicht vom Matthäus Merian im 17. Joorhundert[1]
S oobere Rhiidoor isch grad am Rhii gsi am Ändi vo dr Riechestrooss (rächts oobe).
Dialäkt: Baseldütsch

S Obere Rhiidoor, wäge siiner Grössi het men em au s Obere Rhiidöörli gsait und es chunnt au as Lessersdürli vor, isch e Basler Stadtdoor im Chleibasel und Deil vo dr Basler Stadtmuure gsi. Es isch in dr Middi vom 19. Johrhundert abgrisse worde.

S Obere Rhiidoor isch grad am Rhii am Aafang vo dr Riechedoorstrooss gstande, e chli rhiiab vom Bulverdurm. Es het e Pultdach gha, wo gege d Stadt zue abgfallen isch, und e Zinnechranz wie dr Bulverdurm näbedra. Zwüsche dene beide Dürm het s sit de Armagnakechrieg (1444) e Wehrgang gee, wo bis zur Kartause gloffen isch. Em Durm si Vorbau isch 1843 abbroche worde. Wo mä dr Oberi Rhiiwäg, wo 1823 baut worden isch, erneueret het, isch s Door abgrisse worde, wohrschiinlig im 1858i.

S Rhiiufer vor em Door isch as Schiffländi bruucht worde, wo Ware, vor allem Stei und Holz, vo Flöss und Schiff usglade worde si. Dorum het dr Rhiizoller in de obere Stöck vom Döörli gläbt und sis Büro, s Rhiizollerstübli, isch grad rhiiab vor em Door gläge. S Stübli isch 1843 zsämme mit em Vorbau abgrisse worde.

Wo dr Oberi Rhiiwäg 1858 erneueret worden isch, het mä dr Bauschutt vom Door und vo dr Stadtmuure bruucht, zum dr Rhiiwäg und d Riechestross e Meter ufzschütte. Wo mä 1985 wäge Wasserleitige dört het müesse grabe, het mä d Fundamänt vom Rhiidöörli gfunde, und si gnaui Lag isch jetzt dokumentiert.

Äini vo de Baasler Fäärene landet hüte e chlii bachab vom ehemoolige Rhiidöörli.

Quelle[ändere | Quälltäxt bearbeite]

Fuessnoote[ändere | Quälltäxt bearbeite]

  1. Die ganz Aasicht vo dr Stadt Baasel vom Matthäus Merian vo 1642.