S Santihansdoor

Us der alemannische Wikipedia, der freie Dialäkt-Enzyklopedy


S Santihansdoor
Dialäkt: Baseldütsch
Uf dere Charte vo 1642 isch s Santihannsdoor d Nummere 28 rächts grad näben em Rhii

S Santihansdoor isch en ehemoligs Stadtdoor vo dr Stadt Basel an dr Santihannsvorstadt und emol Bestanddeil vo dr Basler Stadtmuure gsi. Es isch eins vo de drei Stadtdoor, wo s hüt no git, und stoht under Dänggmoolschutz.

S Santihansdoor het d Strooss uf Mülhuuse und s Elsass bewacht und isch zwüsche 1367 und 1375 baut worde am en Ort, wo s früehner scho en Aalag gha het, wie mä bi Usgrabige im Johr 1984 usegfunde het. Noch ere Zeichnig vom Matthäus Merian isch das aber nid e Door gsi, sondern en Art Halle mit Giibeldach und eme Rundboogeiigang. Dr Name vom Santihansdoor wird in dr Wachornig vo 1374 erwähnt.[1]

S Usgseh[ändere | Quälltäxt bearbeite]

Dr Durm het en öbbe quadratische Grundriss, isch 25 Meter hooch und het anderthalb Meter dicki Muure. Dr Vorbau nördlig drvo isch rächteggig.[2] D Fänster uf dr Stadtsite si wohrschiinlig zwüsche 1431 und 1448 uusebroche worde, wo mä d Stadtmuure umbaut het. 1482 het d Stadt s Door mit Moolereie lo schmücke. Zum dr Durm nid zum ene aaziehende Ziil für findligi Kanone z mache, het mä s Dach zum e Pyramidedach umbaut, 1582 isch s mit eme Pultdach mit Zinnechranz ersetzt worde. In däm Johr het mä au e Rammpfahlaalag iibaut. S Vorwärk, wo mä kennt, isch in einere Linie mit dr Muure und stoht nid vor, wie mä s von ere Verdeidigungsaalag wurd erwarte. Vom sim erste Stock het mä s Fallgatter bedient. 1669-70 het mä uf dr Stadtsite e Terrasse baut, wo d Muure lings und rächts vom Door mitenander verbunde het. Am Nordwestegge vom Vorwärk het mä e chliine Erker mit Schiessscharte aabaut, wo mit groteske Fratze verziert gsi isch. Das isch 1921 renoviert worde.[1]

Nowiis[ändere | Quälltäxt bearbeite]

  1. 1,0 1,1 altbasel.ch - Das St.-Johanns-Tor
  2. Basler Bauten: St. Johannstor

Weblingg[ändere | Quälltäxt bearbeite]


Koordinate: 47° 33′ 59,6″ N, 7° 34′ 55,4″ O; CH1903: 610793 / 268437