Fröschbollwärk

S Fröschbollwärk am Schützegraabe isch vom 16. bis ins 19. Joorhundert Däil vo dr Basler Stadtbefestigung gsi.

Gschicht

Im 13.Joorhundert isch dört, wo die hütigi Schützemattstrooss am Schützegraabe aachunnt,^[2] e groosse, viereggige Durm, dr Brunnemäisterdurm gstande, wo dr Basler Brunnemäister din gwoont het. 1531 het mä aagfange, d Befestigunge vo dr Stadtmuure afo versterke und si em Artilleriizitalter aabasse. 1550 het mä dr Brunnemäisterdurm afo abrisse und het s Fröschbollwärk, wo men em au Spaalebollwärk gsäit het, baut. Es het d Form vom ene Huefiise ghaa wo vor dr Muure gläägen isch, sini Muure isch vier Meter dick und mit Ärde usgfüllt gsi. Noch dr Stadtaasicht vom Matthäus Merian vo 1642 het s Blatz für e Batterii vo öbben eme halbe Dotzed Kanoone gha und mä het s Gländ vor dr Stadtmuure vom Stäinegraabe bis fast zum Spaaledoor chönne beschiesse. Vo dr Fröschgass us het s e Rampe ghaa zum d Gschütz in d Posizioon uf em Bollwärk z bringe. Für zum zu de Wachhüüsli bi de Zinne cho, het mä e Stääge uufe müesse. Linggs vo dr Bastioon het s e chliises Döörli ghaa, wo s Wasser vom stedtische Fischweijer duure in d Stadt gflosse isch. Mä nimmt aa, ass dr Naame vom Gländ drvo cho isch, ass es dört vili Frösch gee het.

Wo d Basler sich in dr Middi vom 19. Joorhundert denn entschiide häi, d Stadtmuure abzbräche, isch s nid lang gange bis au s Fröschbollwärk an d Räije cho isch. Am 30. Dezämber 1865 het s dr Bauundernäämer äifach in d Luft gsprängt und drbii an e baar Hüüser in dr Noochberschaft Schaade aagrichdet. Dr Schutt het mä denn brucht zum dr Schützegraabe ufzfülle. Uf em Areal vom Bollwärk het mä 1877 s Spaaleschuelhuus baut, wo hüte e Grichtsgeböid isch.

Wo mä 1972 dört e Fuessgängerunderfüerig baut het, isch mä uf Räst vo dr Bollwärkmuure gstoosse. Die cha mä hüte no bschaue.

Kwelle

Fröschenbollwerk uf Basler Bauten
Das Fröschenbollwerk uf altbasel.ch

Fuessnoote

↑ Uf dr Aasicht vom Merian vo 1642 gseet mä s Fröschbollwärk uf dr rächte Site, e Bastion in dr Form vom ene Huefiise linggs vom Basler Wabbe.
↑ Bis zur Middi vom 19. Joorhundert het dr Abschnitt vo dr hütige Schützemattstrooss zwüsche dr Spalevorstadt und em Schützegraabe Fröschgass ghäisse. Im Middelalter het män ere Chrüzgass gsäit, wil si am ene Wäägchrüz us Stäi vrbiigange isch.

47.5564588958457.5815749168396Koordinate: 47° 33′ 23,3″ N, 7° 34′ 53,7″ O; CH1903: 610760 / 267315

[1] Uf dr Aasicht vom Merian vo 1642 gseet mä s Fröschbollwärk uf dr rächte Site, e Bastion in dr Form vom ene Huefiise linggs vom Basler Wabbe.

[2] Bis zur Middi vom 19. Joorhundert het dr Abschnitt vo dr hütige Schützemattstrooss zwüsche dr Spalevorstadt und em Schützegraabe Fröschgass ghäisse. Im Middelalter het män ere Chrüzgass gsäit, wil si am ene Wäägchrüz us Stäi vrbiigange isch.

[1]

[2]